Шусьӧгъяс 21 - Коми Библия 2023

Веськыда олысь аддзӧ олӧм

¹ Ӧксылӧн сьӧлӧмыс Господь киын визувтысь ва кодь, Господь веськӧдӧ сійӧс, кытчӧ кӧсйӧ.

² Быдӧн чайтӧ ассьыс туйсӧ веськыдӧн, но Господь тӧдмалӧ сьӧлӧмъяс.

³ Веськыда олӧмыд да веськыда мыждӧмыд вись вайӧм дорысь Господьлы шогманаджык.

⁴ Лёк вӧчысьлӧн биыс – тшаплун да вылӧ кыпӧдчӧм, но тайӧ мыж.

⁵ Мортыд мырсьӧм-зільӧмнас унатор судзӧдӧ, а тэрмасьӧмӧн кӧ вӧчӧ, унатор воштӧ.

⁶ Ылӧдчӧмӧн озырмӧдчӧмыд тӧвру пӧльыштӧм кодь да кулӧмсӧ корсьӧм кодь.

⁷ Ентӧг олысь оз веськыда вӧч, сійӧс бырӧдас аслас лёк вӧчӧмыс.

⁸ Мыжа морт чукльӧдлӧмӧн ветлӧ, а сӧстӧм морт веськыда вӧчӧ.

⁹ Бурджык ӧтнадлы керка вевт вылын овны пинясьысь гӧтыркӧд керкаын олӧм дорысь.

¹⁰ Ентӧг олысьлӧн лолыс кӧсйӧ лёксӧ, весиг ёртыс дінӧ сійӧ оз бурсьӧлӧмтчы.

¹¹ Омӧльтысьӧс кӧ мыждан, мывкыдтӧмъяс мывкыдсяласны, а мывкыд мортӧс кӧ велӧдан, сійӧ тӧдныджык кутас.

¹² Веськыда олысь аддзӧ, кыдзи лёк вӧчысь олӧ аслас керкаын, и кыдзи лёк вӧчысьӧс лоӧ бырӧдӧма.

¹³ Коді оз кыв гӧль мортлысь бӧрдӧмӧн корӧмсӧ, сійӧс асьсӧ оз кывны, кор кутас бӧрдны-корны.

¹⁴ Гусьӧн сетӧм козин кусӧдӧ лӧглун, питшӧгысь сетӧмтор лӧньӧдӧ ыджыд скӧрлун.

¹⁵ Веськыда олысь веськыда мыждӧмысь долыдмӧ, лёк вӧчысь – полӧ.

¹⁶ Коді кежӧ мывкыдлуныслӧн туйысь, кулӧмаяскӧд куйлыны кутас.

¹⁷ Гажӧдчыны радейтысьыд гӧльмӧ, вина юысьыд да уна вый сёйысьыд оз озырмы.

¹⁸ Лёк вӧчысьӧс лоӧ вузалӧма, медым мездыны веськыда олысьӧс, ылӧдчысьӧс – медым мездыны веськыда вӧчысьӧс.

¹⁹ Зыньгысь да скӧралысь гӧтыркӧд олӧм дорысь бурджык овны овтӧминын.

²⁰ Мывкыд мортлӧн керкаын уна озырлун да сёян, а вежӧртӧм мортыд ставсӧ лотӧ-шердйӧ.

²¹ Коді кӧсйӧ овны веськыда да бур сьӧлӧмӧн, аддзас олӧмсӧ, веськыдлунсӧ да пыдди пуктӧмсӧ.

²² Мывкыд мортыд босьтӧ вынаяслысь карсӧ, жугӧдӧ стенсӧ, мый вылӧ найӧ лача кутісны.

²³ Коді вомсӧ оз паськӧдлы, ассьыс ловсӧ шогысь видзӧ.

²⁴ Ыкша да наян мортӧс шуӧны омӧльтысьӧн, этшсьыс петмӧнъя сійӧ вылӧ пуксьӧ.

²⁵ Дышлӧн кӧсйӧмыс виас сійӧс, ӧд сійӧ кисӧ сюркнялӧмӧн пукалӧ.

²⁶ Дыш мортыд асланьысджык кыскӧ, а веськыда олысь лышкыда сетӧ.

²⁷ Лёк вӧчысьлӧн висьыс – зывӧктана, торйӧн нин, наянпырысь кӧ висьсӧ вайӧ.

²⁸ Ылӧг висьталысь олӧмсӧ воштӧ, а коді висьталӧ сійӧ, мый збыльысь тӧдӧ, сійӧс пыр кывзӧны.

²⁹ Лёк вӧчысь яндысьтӧг видзӧдӧ, веськыд морт аслас оласногӧ кутчысьӧ.

³⁰ Господьтӧгыд мывкыдлуныс абу, вежӧрыс абу, и туйдӧдӧмыс абу.

³¹ Вӧлӧс дасьтӧны тышкасян лун кежлӧ, но вермӧмсӧ Господь сетӧ.