Шусьӧгъяс 20 - Коми Библия 2023

Господь вылӧ лачатӧ кут

¹ Винаыд дурмӧдӧ, сурыд тышкасьны ыззьӧдӧ, мывкыдтӧм сійӧ, кодӧс юӧмыс ылӧдлӧ.

² Ӧксылӧн скӧрлуныс левлӧн равзӧм кодь, сійӧс дӧзмӧдысьыс лёксӧ аслыс вӧчӧ.

³ Коді вензьытӧг олӧ, сійӧс пыдди пуктӧны, коді зыксьӧмӧ пырӧ, сійӧ – вежӧртӧм.

⁴ Дыш мортыд пуктысян кадӧ оз гӧр, и вундан кадӧ нинӧм оз босьт.

⁵ Сьӧлӧмпытшса мӧвпъясыд – джуджыд ва, но вежӧра морт вермӧ гумлавны и сэтысь.

⁶ Унаӧн шуӧны асьнысӧ бурӧн, но сюрас-ӧ на пӧвстысь эскана мортыс?

⁷ Веськыд мортыд сӧстӧм оласнога, майбырӧсь сылӧн ныв-пиыс.

⁸ Кор ӧксы пукалӧ ёрдысь пуклӧсын, сылӧн син водзысь став лёкыс разалӧ.

⁹ Коді вермӧ шуны, весалі пӧ ассьым сьӧлӧмӧс, сӧстӧмми пӧ аслам мыжъясысь?

¹⁰ Ылӧдлӧмӧн веситӧмыд да пӧръясьӧмӧн мурталӧмыд – Господьлы зывӧк.

¹¹ Морттӧ томдырсяньыс тӧдмалан уджъяс сертиыс, олӧ-ӧ сійӧ сӧстӧма да веськыда.

¹² Кылысь пельтӧ да аддзысь синтӧ – кыкнансӧ вӧчис Господь.

¹³ Узьнытӧ кӧ радейтан – гӧльман, синтӧ кӧ он куньлы – пӧттӧдзыд сёян.

¹⁴ Ньӧбасьысь шуасьӧ, вузӧсыд пӧ шогмытӧм, а муртса вешъяс да, ошйысьӧ нин ньӧбӧмторнас.

¹⁵ Эм зарни, эмӧсь дона изъяс, но медся донаыс – мывкыд сёрни.

¹⁶ Тӧдтӧм морт вӧсна кыв сетысьлысь босьт дӧрӧмсӧ да ас ордад видз, кытчӧдз уджйӧзыс оз ло мынтӧма.

¹⁷ Ылӧдлӧмӧн судзӧдӧм няньыд чӧскыд, но вомад сійӧ дзимбырӧ пӧрӧ.

¹⁸ Могъястӧ сувтӧд туйдӧдӧмсӧ кывзӧм бӧрын, туйдӧдтӧг тышӧ эн пет.

¹⁹ Суклясьысь морт восьтӧ мӧдлысь гусяторсӧ, паськыд вомакӧд эн волысь.

²⁰ Коді бать-мамсӧ лёкӧдӧ, сылӧн биыс сап пемыд дырйи кусас.

²¹ Батьыдлысь кадысь водз босьтӧм овмӧсыд бурсиӧмсӧ оз вай.

²² Эн шу: «Лёк вӧчӧмысь лёкӧн мынтыся», Господь вылӧ лачатӧ кут, и Сійӧ доръяс тэнӧ.

²³ Господь зывӧктӧ пӧръясьӧмӧн веситӧмтӧ, ылӧг вески Сылы оз шогмы.

²⁴ Господь веськӧдӧ мортлысь воськовъяссӧ, ӧд мортыд оз тӧд ассьыс туйсӧ.

²⁵ Тывйӧ шедан, тэрмасьӧмӧн кӧ Енлы вежа козин кӧсйысян, а сӧмын бӧрыннас мӧвпалан.

²⁶ Мывкыд ӧксы лёк вӧчысьясӧс тӧлӧдас, вартан гӧгыльӧн на вывті мунас.

²⁷ Мортлӧн лолыс – Господьлӧн югдӧданторйыс, пыдӧдз тӧдмалӧ мортлысь сьӧлӧмсӧ.

²⁸ Буралӧмыс да збыльыс ӧксыӧс видзӧны, буралӧмнас ӧксы юралӧмсӧ ёнмӧдӧ.

²⁹ Том мортлы ошкӧмсӧ вайӧ выныс, пӧрысьӧс мичмӧдӧ дзор юрсиыс.

³⁰ Нӧйтӧм-ньӧръялӧмыд торйӧдӧ лёксьыс, дойясыд весалӧны сьӧлӧмтӧ.