Шусьӧгъяс 2 - Коми Библия 2023

Мывкыдлуныс видзӧ лёкысь

¹ Пиӧй, менсьым кывъясӧс кӧ сибӧдан и тшӧктӧмъясӧс видзан сьӧлӧмад,

² пельтӧ кӧ бергӧдан мывкыдыслань и сьӧлӧмтӧ веськӧдан гӧгӧрвоны,

³ чукӧстан кӧ тӧдӧмлунсӧ и гора шыӧн коран вежӧрсӧ,

⁴ эзысьӧс моз кӧ кутан корсьны сійӧс и донасьыс-донаторйӧс моз корсьысьны,

⁵ сэки тӧдмалан, мый сійӧ Господьысь полӧмыс, да гӧгӧрвоан, мый сійӧ Енсӧ тӧдӧмыс.

⁶ Ӧд мывкыдлунсӧ сетӧ Господь, тӧдӧмлуныс да вежӧрсялӧмыс локтӧ Сысянь.

⁷ Веськыда олысьӧс Енмыс мездӧ, сӧстӧма олысьӧс Сійӧ сайӧдӧ,

⁸ Веськыд туйяс бӧрся Сійӧ видзӧдӧ, Сылы эскысьлысь туйсӧ видзӧ.

⁹ Тэ кӧ кывзан менӧ, сэки гӧгӧрвоан, мый сэтшӧм веськыдлуныс, веськыда вӧчӧмыс да збыльыс, тӧдмалан бурыслысь туйсӧ.

¹⁰ Мывкыдлуныс овмӧдчас сьӧлӧмад, тӧдӧмлуныс долыдмӧдас ловтӧ.

¹¹ Сюсь вежӧрыд пондас видзны тэнӧ, гӧгӧрвоӧмыд тэнӧ доръяс.

¹² Мывкыдлуныс мездас тэнӧ лёк туйысь, видзас тэнӧ ылӧг вома мортысь,

¹³ веськыд туйсӧ эновтысь йӧзысь, пемыдыслӧн туйӧд ветлысь войтырысь.

¹⁴ Найӧ нимкодясьӧны лёк вӧчӧмнас, ошйысьӧны ылӧгнас,

¹⁵ налӧн туйясыс чукыльӧсь, та вӧсна найӧ вошӧны.

¹⁶ Мывкыдлуныс видзӧ тэнӧ йӧз гӧтырысь, аньысь, коді небыд кывъяснас кыскӧ ас дінас.

¹⁷ Сійӧ эновтӧма томдырся верӧссӧ, вунӧдӧма Ен водзын кӧрталӧм йитӧдсӧ.

¹⁸ Сылӧн керкаыс – кулӧмыслӧн нальк, сылӧн туйыс вайӧдӧ кулӧмаяс дінӧ.

¹⁹ Сы ордӧ пырысь бӧрсӧ оз пет, олӧмыслысь туйсӧ оз нин аддзы.

²⁰ Сідзкӧ, ветлы бур йӧзлӧн туйӧд, веськыда олысьяс моз ов.

²¹ Ӧд веськыда олысьяс му вылын водзӧ оласны, сӧстӧмъяс сэні ловъяӧсь кольӧны.

²² А лёк вӧчысьясӧс лоӧ бырӧдӧма му вывсьыс, ылӧдчысьясӧс лоӧ нетшыштӧма вужнас.