Шусьӧгъяс 17 - Коми Библия 2023

Господь тӧдмалӧ сьӧлӧмтӧ

¹ Тыр пызан да зык-вена олӧм дорысь бурджык кос няньтор да лӧнь олӧм.

² Мывкыд кесйӧг веськӧдлӧ ыджыдыслӧн яндысьтӧм пинас, сылы вуджӧ ыджыдыслӧн овмӧсыс пилы моз.

³ Эзысьтӧ да зарнитӧ биын сывдӧны, а сьӧлӧмтӧ Господь тӧдмалӧ.

⁴ Лёк вӧчысь кывзӧ наян сёрнияс, ылӧдчысь кывзӧ лёк вомаӧс.

⁵ Коді сералӧ гӧль мортӧс, омӧльтӧ сійӧс Вӧчысьӧс, коді нимкодясьӧ мӧдлӧн шогыслы, сійӧс лоӧ мыждӧма, [а бур сьӧлӧма дінӧ Енмыс буралӧ].

⁶ Пӧрысьыдлӧн юркытшыс – ныв-пиыслӧн ныв-пиыс, ныв-пиыдлӧн ошйысянторйыс – бать-мамыс. [Эскысьлӧн уна озырлун, эскытӧмлӧн нинӧм абу.]

⁷ Вежӧртӧмлы оз лӧсяв тӧдчана сёрни нуӧдны, пыдди пуктана мортлы – пӧръясьны.

⁸ Мортыд чайтӧ, мый сылӧн козиныс – шуд вайысь из: быдлаысь, кытчӧ мунас, шуд аддзас.

⁹ Коді радейтӧ, сійӧ вунӧдӧ сылы шуӧм лёк кывъяссӧ, коді лёксӧ казьтылӧ, сійӧ воштӧ ассьыс ёртсӧ.

¹⁰ Вежӧртӧмӧс сё пӧв кучкӧм дорысь бурджык вежӧраӧс чирыштны.

¹¹ Лёк морт Енлы паныд кыпӧдчӧ, та понда Енмыс мӧдӧдас сылы паныд чорыд сьӧлӧма анделӧс.

¹² Йӧй руа вежӧртӧм морткӧд паныдасьӧм дорысь бурджык паныдасьны пиянсӧ воштӧм ошкӧд.

¹³ Коді бурсьыс лёкӧн мынтысьӧ, сылысь керкасӧ лёкыс оз эновт.

¹⁴ Пинь-зык панӧмыд ва ызӧбтӧм кодь, пансьытӧдзыс сувтӧд сійӧс.

¹⁵ Лёк вӧчысьӧс дорйысь да мыжтӧм мортӧс мыждысь – Господьлы зывӧктанаӧсь.

¹⁶ Вежӧртӧмлӧн кӧ абу вежӧрыс, медым мывкыдсявны, мый сылы озырлунсьыс? [Керкасӧ джуджыда лэптысьӧс бырӧдӧм суас, коді оз кӧсйы велӧдчыны, лёкас усьӧ.]

¹⁷ Ёртыдлы тэ быд кадӧ муса, вокыд локтӧ отсавны шог дырйиыд.

¹⁸ Вежӧртӧм мортыд кыв сетӧ – мӧдлысь уджйӧзсӧ мынтыны кӧсйысьӧ.

¹⁹ Вензьыны радейтысь радейтӧ мыж, вылӧ кыпӧдчысь усьӧмсӧ корсьӧ.

²⁰ Наян сьӧлӧма шудсӧ оз аддзы, ылӧдчысьӧс шог суас.

²¹ Вежӧртӧмӧс чужтысь аслыс шог вайӧ, нимкодьлунсӧ батьыслы вежӧртӧмыд оз вай.

²² Долыд сьӧлӧмыд бурдӧдӧ, нюкыртчӧм лолыд лыястӧ косьтӧ.

²³ Ентӧг олысь гусьӧн козинтӧ босьтӧ, медым торкны веськыда мыждӧмсӧ.

²⁴ Вежӧра мортлӧн мывкыдлуныс син водзас, вежӧртӧмлӧн синмыс му помъясті ветлӧ.

²⁵ Вежӧртӧм пи батьсӧ дӧзмӧдӧ, аслас мамыслы курыд шог вайӧ.

²⁶ Веськыда вӧчысьӧс абу бур мыждыны, пыдди пуктанаӧс – збыльсьыс нӧйтны.

²⁷ Мывкыд морт кужӧ кывсӧ кутны, вежӧра морт – чӧв овны.

²⁸ Вежӧртӧм кор чӧв олӧ, мывкыд мортӧн сійӧс чайтӧны, кор вомсӧ тупкӧма, сюсь мортӧн шуӧны.