Шусьӧгъяс 13 - Коми Библия 2023

Веськыда олысьлы бурыс вуджӧ

¹ Мывкыд пи кывзӧ батьыслысь велӧдӧмсӧ, батьсӧ омӧльтысь ӧлӧдӧмсӧ оз кывзы.

² Аслас бур кывъясысь мортыд бурнас пӧтӧ, ылӧдчысьыд вины-дзескӧдны видзӧдчӧ.

³ Топыд вома видзӧ ассьыс ловсӧ, паськыд вома бырӧдас асьсӧ.

⁴ Дыш морт унатор кӧсйӧ, но весьшӧрӧ, зіль мортлӧн кӧсйӧмыс збыльмӧ.

⁵ Веськыда олысь мустӧмтӧ пӧръясьӧмсӧ, лёк вӧчысь асьсӧ янӧдӧ да пежалӧ.

⁶ Сӧстӧм сьӧлӧмаӧс веськыдлуныс видзӧ, а мыжаӧс пежыс виӧ.

⁷ Ӧтилӧн нинӧм абу, но асьсӧ озырӧ пуктӧ, мӧдлӧн озырлуныс уна, но асьсӧ гӧльӧ пуктӧ.

⁸ Олӧмтӧ видзны озырлуныд отсалӧ, гӧль мортлӧн повзьӧдлысьыс абу.

⁹ Веськыда олысьлӧн биыс югыда ломалӧ, лёк вӧчысьлӧн – кусӧ. [Наян сьӧлӧма вошӧ мыжас, веськыда олысь жалитӧ да буралӧ.]

¹⁰ Вылӧ пуксьӧмыд сӧмын вензьӧм чужтӧ, мывкыд мортыд туйдӧдӧмсӧ сибӧдӧ.

¹¹ Кокньыда шедӧм озырлуныд чунь костӧдыд визувтӧ, а удж помысь чукӧртӧмаыд содӧ.

¹² Дыр виччысьӧмысь сьӧлӧмыд нюкыртчӧ, збыльмӧм кӧсйӧмыд олӧмыслӧн пу кодь.

¹³ Коді мустӧмтӧ туйдӧдӧмсӧ – аслыс лёксӧ вӧчӧ, а коді пыдди пуктӧ тшӧктӧмъяссӧ – тырдон босьтӧ.

¹⁴ [Наян пилӧн нинӧм бурыс абу, мывкыд кесйӧглӧн уджыс бура мунӧ, сылӧн туйыс веськыд.]

¹⁵ Мывкыд мортлӧн туйдӧдӧмыс вайӧ олӧм, ылыстӧ кулӧмыслӧн тывйысь.

¹⁶ Бур вежӧр козьналӧ пыдди пуктӧм, ылӧдчысьлӧн туйыс кулӧмӧ вайӧдӧ.

¹⁷ Вежӧра морт тӧдӧмлуннас олӧ, а вежӧртӧм петкӧдлӧ ассьыс вежӧртӧмлунсӧ.

¹⁸ Юӧр вайысь кӧ лёк, ачыс лёкас веськалӧ, кывзысьысь кӧ, мездӧм вайӧ.

¹⁹ Велӧдӧмсӧ ӧтдортысьлы вичмӧ гӧльлун да яналӧм, ӧлӧдӧмсӧ сибӧдысьлы – пыдди пуктӧм.

²⁰ Кӧсйӧмыд кор збыльмӧ, сьӧлӧмыд нимкодясьӧ, вежӧртӧм оз кӧсйы эновтны лёксӧ.

²¹ Мывкыд морткӧд кӧ волысян, мывкыд лоан, вежӧртӧмкӧд кӧ ёртасян, аслыд лёксӧ вӧчан.

²² Мыж вӧчысьӧс лёкыс суӧ, а веськыда олысьлы бурыс вичмӧ.

²³ Бур мортлӧн овмӧсыс кольӧ ныв-пиыслӧн челядьыслы, а мыжа мортлӧн – веськыда олысьлы.

²⁴ Гӧль мортлӧн муыс вермӧ уна нянь сетны, но Индӧд торкӧм вӧсна сійӧ воштӧ няньсӧ.

²⁵ Писӧ мустӧмтысь ньӧртӧ оз босьтлы, а писӧ радейтысь ичӧтдырсяньыс чирыштӧ сійӧс.

²⁶ Веськыда олысь пӧттӧдзыс сёйӧ, а лёк вӧчысьлӧн кынӧмыс пыр сюмалӧ.