Шусьӧгъяс 12 - Коми Библия 2023

Мывкыд кывйыд бурдӧдӧ

¹ Кодлы муса тӧдӧмлуныс, сылы муса велӧдӧмыс, но ӧлӧдӧмсӧ мустӧмтысь – вежӧртӧм морт.

² Наян мортӧс Господь мыждас, шань мортлы Сысянь бурыс вуджас.

³ Лёк вӧчӧмнад мортыд асьсӧ оз вынсьӧд, но веськыда олысьлӧн вужйыс зумыд.

⁴ Бур гӧтыр аслас верӧслы юркытш, яндысьтӧм гӧтыр верӧсыслысь лыяссӧ сісьтӧ.

⁵ Веськыда олысь кӧсйӧ веськыда вӧчны, Ентӧг олысьлӧн мӧвпъясыс наянӧсь.

⁶ Лёк вӧчысь вермӧ кывнас вины, а веськыда сёрнитысьӧс кывйыс мездӧ.

⁷ Лёк вӧчысь кор усьӧ, сыысь нинӧм оз коль, а веськыда олысьлӧн керкаыс кольӧ сулавны.

⁸ Мортӧс ошкӧны сылӧн мывкыдыс серти, лёкӧн тырӧм сьӧлӧмаӧс зывӧктӧны.

⁹ Абу тӧдчана, но ас вылас уджалысь мортыд бурджык сы дорысь, коді олӧ-тшыгъялӧ, а асьсӧ ыджыдӧ пуктӧ.

¹⁰ Веськыда олысь аслас ыж-мӧскыс вӧсна тӧждысьӧ, а мыжа мортлӧн сьӧлӧмыс чорыд.

¹¹ Му вӧдитысь оз кут тшыгъявны, абутӧмсӧ кыйӧдысь – вежӧртӧм морт. [Коді кадсӧ коллялӧ вина бӧрся вӧтлысьӧмӧн, янӧдӧ ассьыс керкасӧ.]

¹² Мыж вӧчысь кӧсйӧ лёкыслӧн тывйӧ кыскыны, но веськыда олысь зумыд вужъя.

¹³ Лёк мортӧс тывъялӧ вомсьыс петан мыжыс, а веськыда олысь мынӧ шогсьыс. [Рам морт дінӧ Енмыс буралӧ, а коді мӧдӧс ёрд водзӧ кыскӧ, мыжалӧмнас сійӧс дзескӧдӧ.]

¹⁴ Аслас бур кывъясысь мортыд бурнас пӧтӧ, мортыдлы тырдоныс уджъясыс серти вичмӧ.

¹⁵ Вежӧртӧмыд ассьыс туйсӧ веськыдӧн чайтӧ, мывкыд мортыд туйдӧдӧмсӧ кывзӧ.

¹⁶ Вежӧртӧм мортыд дзик пыр петкӧдлӧ скӧрмӧмсӧ, вежӧра мортыд яналӧмсӧ оз петкӧдлы.

¹⁷ Эскана морт збыльсӧ висьталӧ, наян морт пӧръясьӧ.

¹⁸ Думышттӧг шуӧмыд шыпурт моз сатшкӧ, а мывкыд мортлӧн сёрниыс бурдӧдӧ.

¹⁹ Збыльсӧ висьталысьыд пыр лоӧ, ылӧгсӧ сёрнитысьыд дыр оз ов.

²⁰ Лёк вӧчны мӧвпалысьлӧн сьӧлӧмыс наян, бурас туйдӧдысьлӧн – долыд.

²¹ Веськыда олысьӧс лёкыс оз су, а лёк вӧчысьлӧн олӧмыс тырӧма шогнас.

²² Пӧръясьысь мортыд Господьлы зывӧк, збыльсӧ висьталысьыд шогмана Сылы.

²³ Вежӧра мортыд тӧдӧмлуннас оз ошйысь, а вежӧртӧмлӧн сьӧлӧмсьыс петӧ йӧйталӧм.

²⁴ Зіль морт пондас юравны, дыш мортлы быть ковмас уджавны.

²⁵ Майшасьӧмыд сьӧлӧмтӧ топӧдӧ, а бур кывйыд – гажӧдӧ.

²⁶ Веськыда олысь аслас матыссаыслы индӧ туй, а лёк вӧчысь ачыс вошӧ.

²⁷ Дыш мортыд пӧтка яйтӧ оз сёй, а зіль мортыдлӧн эмбурыс вывті уна.

²⁸ Веськыдлуныслӧн туйыс олӧмӧ нуӧдӧ, сэні кулӧмыс абу.