Руфа 1 - Коми Библия 2023

Иуда муӧ бӧр локтӧм

¹ Израиль муын ёрдысьяслӧн веськӧдлан кадӧ вӧлі тшыгъялӧм. Иуда муысь ӧти морт эновтіс Виплием кар да овмӧдчис Моав муӧ. Сыкӧд тшӧтш мунісны гӧтырыс да кыкнан пиыс.

² Тайӧ мортсӧ шуисны Элимелек, гӧтырсӧ – Ноеминь, пиянсӧ – Махлон да Килион. Найӧ вӧліны иудаса Виплием-Епрафа карысь.

³ Элимелек куліс, и Ноеминь ӧтнасӧн колис пияныскӧд.

⁴ Пияныс гӧтрасисны Орфа да Руфа нима моавса нывъяс вылӧ. Матӧ дас во Моав муын олӧм бӧрын

⁵ Махлон да Килион кулісны. Ноеминь колис верӧстӧг да пиянтӧг.

⁶ Ноеминь шуис бӧр мунны аслас чужанінӧ, ӧд сылы кывсис, мый Господь тӧждысьӧма Аслас войтырыс вӧсна – сетӧма налы нянь. Моньясыс шуисны тшӧтш мунны сыкӧд.

⁷ Ноеминь кыкнан моньыскӧд мӧдӧдчис Иуда муӧ. Муніганыс

⁸ сійӧ шыасис на дінӧ: «Бергӧдчӧй мамъясныд дорӧ. Господь мед лоас бур сьӧлӧма тіян дінӧ, кыдзи ті вӧлінныд бурӧсь менам пиян дінӧ да ме дінӧ.

⁹ Господь мед сетас кыкнанныдлы выль верӧсӧс – отсалас аддзыны аслыныд дорйысьӧс». Ноеминь окыштіс найӧс, но найӧ кутісны бӧрдны

¹⁰ да шуавны: «Ми тэкӧд тшӧтш мунам тэнад войтырыд дінӧ».

¹¹ «Мунӧй гортаныд, нывъясӧй, – ӧлӧдіс Ноеминь. – Мыйла тіянлы мекӧд муннысӧ? Ме ӧд ог нин вермы чужтыны пиянӧс, медым найӧ сэсся босьтасны тіянӧс гӧтырӧ.

¹² Бӧр бергӧдчӧй, нывъясӧй. Верӧс саяд ме ог нин мун, ме пӧрысь нин. Весиг кӧ вӧлі на менам лача, мый тавой узя верӧскӧд да чужта,

¹³ ті ӧмӧй виччысянныд пиянлысь быдмӧмсӧ? Та дыра верӧстӧг овны тіянлы сьӧкыд лоӧ. Менам сьӧлӧмӧй бӧрдӧ тіян вӧсна, ӧд ті мекӧд тшӧтш сьӧкыдаланныд. Но тайӧ курыд шогыс меным Господьсянь».

¹⁴ Моньясыс бара кутісны бӧрдны. Орфа окыштіс Ноеминьӧс [да бӧр муніс ас войтырыс дінӧ], а Руфа кольччис Ноеминькӧд.

¹⁵ Ноеминь шуис Руфалы: «Видзӧд, Орфаыд бергӧдчис ас войтырыс дінӧ да аслас енъяс дінӧ. Тэ тшӧтш мун».

¹⁶ Но Руфа вочавидзис: «Эн тшӧкты менӧ бергӧдчыны. Тэнӧ ме ог эновт. Кытчӧ тэ мунан, сэтчӧ и ме муна. Кытчӧ тэ кольччан, сэтчӧ и ме кольчча. Тэнад войтырыд лоӧ менам войтырӧн, и тэнад Енмыд лоӧ менам Енмӧн.

¹⁷ Кӧні тэ кулан, сэні и ме кула, сэтчӧ мед менӧ и дзебасны. Господь мед чорыда мыждас менӧ, кулӧмысь ӧтдор кӧ мыйкӧ торйӧдас тэа-меаӧс».

¹⁸ Ноеминь гӧгӧрвоис, мый Руфа оз веж шуӧм кывсӧ, а мунас сыкӧд. Ноеминь сэсся эз кут сёрнитны сылӧн бӧр бергӧдчӧм йылысь.

¹⁹ Ноеминь да Руфа водзӧ мунісны кыкӧн. Кор найӧ воисны Виплиемӧ, став карыс ёна шызис. Аньяс юасисны ӧта-мӧдныслысь, абу-ӧ тайӧ Ноеминь.

²⁰ Ноеминь шуис налы: «Энӧ шуӧй менӧ Ноеминьӧн, а шуӧй Мараӧн, ӧд Ставсӧвермысь мӧдӧдіс меным курыд шог.

²¹ Татысь мунігӧн менам ставыс вӧлі, а ӧні, кор Господь менӧ бӧр вайӧдіс, менам нинӧм абу. Мыйла менӧ шуны Ноеминьнас, ӧд Господь сетіс меным сьӧкыдавнысӧ, Ставсӧвермысь мӧдӧдіс меным шогсӧ?»

²² Тадзи Ноеминь бӧр локтіс Моав муысь Виплиемӧ. Сыкӧд тшӧтш локтіс моав войтырысь Руфа моньыс. Буретш сэки заводитчис ид вундӧм.