Римӧ 3 - Коми Библия 2023

Енмыс веськыд

¹ Мый бурыс, тэ кӧ иудей? Мый сетӧ вундыштчӧмыс?

² Унатор сетӧ, да быд боксянь бур. Медводз, налы вӧлі сетӧма Енлысь кывсӧ.

³ На пӧвстысь кӧ кодсюрӧ эз эскыны, налӧн эскытӧмысь ӧмӧй бырӧ Енлӧн эсканлуныс?

⁴ Дерт, оз. Енмыс эскана, а мортыс пӧръясьысь. Гижӧма: – Шуӧмыд Тэнад веськыд, Аслад ёрд вылын Тэ верман.

⁵ Миян лёк вӧчӧмным кӧ восьтӧ Енлысь веськыдлунсӧ, сэки мый миянлы шуны? Енмыс ӧмӧй абу веськыд, кисьтӧ кӧ миян вылӧ Ассьыс скӧрлунсӧ? Тадзи мортыс мӧвпалӧ.

⁶ Дерт, тайӧ абу тадз. Енмыс кӧ оз ло веськыд, вермас-ӧ Сійӧ мыждыны муюгыдсӧ?

⁷ Менам ылалӧмысь кӧ тыдовтчӧ Енлӧн збыльыс да Сійӧс ошкӧмыс содӧ, сідзкӧ, мыйла менӧ мыждынысӧ мыжаӧс моз?

⁸ Гашкӧ, пондам вӧчны лёксӧ, мед вӧлі бур? Кодсюрӧ омӧльтӧны миянӧс да шуӧны, мый ми тадзи велӧдам. Татшӧмъяссӧ виччысьӧ веськыда мыждӧм.

Енсӧ некод оз корсь

⁹ Сідзкӧ, ми, иудейяс, ӧмӧй бурджыкӧсь? Абу. Ме водзынджык нин висьтавлі, мый иудейяс да грекъяс – ставныс мыжыслӧн кипод улынӧсь.

¹⁰ Гижӧма: – Веськыда олысьыс весиг ӧтик абу,

¹¹ абу гӧгӧрвоысьыс, некод оз корсь Енсӧ.

¹² Ставныс кежӧмаӧсь, ӧтитӧг шогмытӧмӧсь, бур вӧчысьыс абу, весиг ӧтик абу.

¹³ Налӧн горшныс – восьса гу, кывнас найӧ пӧръясьӧны, льӧб выланыс налӧн змей яд.

¹⁴ Налӧн вомныс тырӧма курыд ёрӧмӧн,

¹⁵ кокныс тэрыб вир кисьтны,

¹⁶ налӧн туй вылын – бырӧдӧм да шог.

¹⁷ Найӧ оз тӧдны лӧньлунсӧ,

¹⁸ Енсьыс полӧмыс налӧн абу.

¹⁹ Ми тӧдам, мый Индӧдыс висьталӧ Индӧд улын олысьяслы. Та вӧсна некод оз вермы мыйкӧ паныд шуны, ӧд став муюгыдыс Ен мыждӧм улын.

²⁰ Индӧд серти уджъяс некодӧс оз вӧчны Ен водзас веськыдӧн. Индӧдыс сӧмын восьтӧ мыжсӧ.

²¹ Ӧні Индӧд вылӧ видзӧдтӧг воссис Енлӧн веськыдлуныс. Та йылысь висьталӧ Индӧдыс да пророк гижӧдъяс.

²² Исус Кристослы эскӧм пыр сетӧма веськыдлунсӧ быд эскысьлы, Енмыс некодӧс оз торйӧд.

²³ Ӧд ставныс мыжмисны да олӧны Ен дзирдлунтӧг.

²⁴ Но Сылӧн буралӧмсянь, дон мынтытӧг найӧ лоӧны веськыдӧн, ӧд Исус Кристос став пыддиыс вештысис.

^25-26 Енмыс сетіс Кристосӧс мыж вештан вись пыдди, Сылӧн вирыс мездӧ быдӧнӧс эскӧм пыр. Терпитӧмнас Ен петкӧдліс Ассьыс веськыдлунсӧ: прӧститіс йӧзлысь важся мыжъяссӧ. Ӧні Енмыс петкӧдлӧ Ассьыс веськыдлунсӧ сыын, мый Сійӧ Ачыс веськыд да вӧчӧ веськыдӧн Исуслы эскысьясӧс.

²⁷ Сюрас-ӧ миян ошйысянторйыс? Оз. Сійӧс бырӧдӧма. Мыйӧн? Индӧд серти уджъясӧн? Абу. Эскӧмӧн.

²⁸ Ми аддзам, мый мортсӧ веськыднас вӧчӧ эскӧмыс, а оз Индӧд серти уджъясыс.

²⁹ Енмыс ӧмӧй сӧмын иудейяслӧн Ен, абу-ӧ тшӧтш мукӧд войтыръяслӧн? Дерт, тшӧтш мукӧд войтыръяслӧн Ен.

³⁰ Енмыс ӧти. Вундыштчӧмаӧс и вундыштчытӧмӧс Сійӧ вӧчӧ веськыдӧн эскӧм пыр.

³¹ Сідзкӧ, мый артмӧ? Эскӧмнаным ми бырӧдам Индӧдсӧ? Огӧ. Мӧдарӧ, вынсьӧдам.