Псалтыр 95 - Коми Библия 2023

95 Псалом

[Давидлӧн ошкана сьыланкыв. Сьылӧны керка лэптігӧн.]

¹ Сьылӧй Господьлы выль сьыланкыв, му вылын олысьяс, сьылӧй Господьлы!

² Сьылӧй Господьлы, ошкӧй Сылысь нимсӧ, лунысь-лун юӧртӧй, мый Сійӧ мездӧ.

³ Висьтавлӧй войтыръяслы Сылӧн дзирдлуныс йылысь, быд войтырлы – Сылӧн шензьӧдана уджъясыс йылысь.

⁴ Ошкӧй Господьӧс, ӧд Сійӧ ыджыд, мукӧд енмыс дорысь медъёна Сыысь колӧ повны.

⁵ Войтыръяслӧн енъясыс – идолъяс, а Господь енэжъяс вӧчис.

⁶ Сылӧн эм ыджыдалӧм да дзирдлун, Сылӧн вежаинын – вын да мичлун.

⁷ Войтыръяс, кыпӧдӧй ошкӧм Господьлы, ошкӧй-нимӧдӧй Господьӧс,

⁸ ошкӧй Господьлысь нимсӧ, локтӧй Сылӧн крамбердса йӧръясӧ, вайӧй Сылы козинъяс,

⁹ копыртчӧй Господьлы Сылӧн мича вежаинын! Му вылын олысьяс, полӧй-тіралӧй Сыысь!

¹⁰ Висьталӧй войтыръяс пӧвстын: «Господь ӧксыалӧ! Муюгыдыс сулалӧ зумыда, сійӧ оз вӧрзьыв. Господь кутас веськыда мыждыны войтыръясӧс».

¹¹ Мед гажӧдчас енэжыс, мед нимкодясяс муыс, мед шызяс саридзыс да став сэні олысьыс,

¹² мед нимкодясяс видз-муыс да ставыс, мый сэні эм, мед гажӧдчасны вӧрса пуяс

¹³ Господь водзын, ӧд Сійӧ локтӧ, локтӧ мыждыны муюгыдсӧ. Сійӧ кутас веськыда мыждыны муюгыдсӧ, кутас мыждыны войтыръясӧс Аслас збыльыс серти.