Псалтыр 89 - Коми Библия 2023

89 Псалом

¹ Енлӧн морт Мӧисейлӧн кевмысьӧм.

² Господьӧй, чужысьяссянь чужысьясӧдз Тэ миянлы сайӧдчаніныс.

³ Керӧсъяс артмытӧдз, мусӧ да ентыкӧласӧ вӧчтӧдз Тэ вӧлін нин, Тэ эм Ен.

⁴ Мортсӧ Тэ бӧр бергӧдан муӧ, Тэ шуан: «Мувывса йӧз, бӧр бергӧдчӧй муӧ».

⁵ Тэнад син водзын сюрс воыс тӧрытъя кольӧм лун кодь, кар видзысьлӧн войся дӧзьӧритан кад кодь.

⁶ Тэ кылӧдан йӧзӧс ытваӧн моз, налӧн олӧмыс вӧт кодь дженьыд, найӧ вежӧдысь турун кодьӧсь, асывнас сійӧ чепӧсйӧ-быдмӧ, а рытнас нярмӧ-косьмӧ.

⁷ Тэнад скӧралӧмысь ми бырам, Тэнад лӧгалӧмысь ми полам-тіралам.

⁸ Тэ тӧдан миянлысь лёк вӧчӧмнымӧс, Тэ аддзан миянлысь гуся мыжъяснымӧс.

⁹ Тэнад скӧралӧмысь миян лунъясным бырӧны, миян олӧмным помасьӧ ышлолыштӧм моз.

¹⁰ Миян олан лунъясным – сизимдас во, а ёнджыкъяслӧн – кӧкъямысдас. Миян олан лунъясысь унджыкыс – мырсьӧм да шогсьӧм, найӧ ӧдйӧ кольӧны, и ми лэбам.

¹¹ Коді тӧдӧ Тэнад скӧралӧмлысь вынсӧ? Коді вермӧ муртавны Тэнад ярлунысь полӧмсӧ?

¹² Велӧд миянӧс артавны ассьыным олан лунъяснымӧс, медым миян вӧлі мывкыд сьӧлӧм.

¹³ Господьӧй, дыр-ӧ на виччысьнысӧ? Бергӧдчы миянлань, ло бур сьӧлӧма Аслад кесйӧгъяс дінӧ.

¹⁴ Быд асыв сет миянлы пӧткӧдчыны Тэнад буралӧмӧн, медым ми нимкодясим да гажӧдчим став олӧм чӧжным.

¹⁵ Гажӧд миянӧс сійӧ лунъясыс пыдди, кор Тэ дойдалін миянӧс, сійӧ воясыс пыдди, кор ми нуим сьӧкыдсӧ.

¹⁶ Тэнад кесйӧгъясыд мед аддзасны Тэнсьыд уджъястӧ, налӧн ныв-пиныс – Тэнсьыд дзирдлунтӧ.

¹⁷ Господьӧй, миян Енмӧй, Тэнад бурлуныд мед лоӧ миян олӧмын, сет миянлы отсӧгсӧ уджъясын, отсав миянлы кипомса уджъясын.