Псалтыр 8 - Коми Библия 2023

8 Псалом

¹ Сьылысьясӧн веськӧдлысьлы. Ворсӧны гефса ворсанторйӧн. Давидлӧн псалом.

² Господьӧй, миян Ыджыдӧй, кутшӧм шензьӧдана Тэнад нимыд став му пасьталаыс! Тэныд ошкӧмыс кыптӧ енэжъясысь вылӧджык на.

³ Челядь да морӧсбердса кагаяс вомсянь Тэ кыпӧдан Аслыд ошкӧмсӧ, медым янӧдны Тэнӧ мустӧмтысьясӧс, медым тупкыны лӧгалысьяслысь да водзӧс перйысьяслысь вомсӧ.

⁴ Кор ме видзӧда енэжас – Тэнад киӧн вӧчӧмтор вылӧ, тӧлысь да кодзувъяс вылӧ, кодъясӧс Тэ пуктін енэжас,

⁵ сэки мӧвпала: мортыс – коді сэтшӧмыс, мый Тэ казьтывлан сійӧс, мортлӧн пиыс – коді сэтшӧмыс, мый Тэ тӧждысян сы вӧсна?

⁶ Тэ пуктін сійӧс Ас дорсьыд сӧмын неуна улӧджык, мичмӧдін сійӧс дзирдлунӧн да нимӧдӧмӧн.

⁷ Тэ сувтӧдін сійӧс веськӧдлыны Аслад вӧчӧмторъяснад, пуктін сы кок улӧ ставсӧ:

⁸ ыж-мӧскӧс да зверъясӧс,

⁹ енэжвывса лэбачьясӧс, саридзса чериясӧс да саридзын став уялысьсӧ.

¹⁰ Господьӧй, миян Ыджыдӧй, кутшӧм шензьӧдана Тэнад нимыд став му пасьталаыс! Ошкӧм.