Псалтыр 78 - Коми Библия 2023

78 Псалом

1 Асафлӧн псалом.

¹ Асафлӧн псалом. Енмӧй, войтыръяс локтісны Тэнад муӧ, пежалісны Тэнсьыд вежа крамтӧ, подулӧдзыс жугӧдісны Ерусалим.

² Тэнад кесйӧгъяслысь шойяссӧ колисны енэжвыв лэбачьяслы, Тэнад эскана войтырлысь шойяссӧ – мувывса зверъяслы.

³ Налӧн вирыс шорӧн визувтіс Ерусалим гӧгӧр, найӧс некодлы вӧлі гуавнысӧ.

⁴ Орччӧн олысьяс серамвыв лэптӧны миянӧс, миян гӧгӧр олысьяс лёкӧдӧны да омӧльтӧны миянӧс.

⁵ Господьӧй, дыр-ӧ пондан лӧгавны миян вылӧ? Дыр-ӧ пондас би моз ыпъявны Тэнад скӧрлуныд?

⁶ Кисьт Ассьыд скӧрлунтӧ войтыръяс вылӧ, кодъяс оз тӧдны Тэнӧ, кодъяс оз шыасьны Тэ дінӧ.

⁷ Ӧд найӧ бырӧдісны Яковсянь чужысьясӧс, куштісны налысь оланіннысӧ.

⁸ Эн пукты миян вылӧ батьяснымлысь мыжъяссӧ, тэрмась петкӧдлыны миянлы Ассьыд бурлунтӧ, ӧд ми дзикӧдз жебмим.

⁹ Енмӧй, миян Мездысьӧй, отсав миянлы, медым та пыр лоӧ ошкӧма Тэнсьыд нимтӧ. Аслад нимыд вӧсна мезды миянӧс да вешты миянлысь мыжнымӧс.

¹⁰ Мыйла лэдзан войтыръяслы шуасьны: «Кӧні налӧн Енмыс?» Тэнад кесйӧгъяслысь вирсӧ кисьтӧмысь сет миянлы аддзыны водзӧс перйӧмтӧ. Та йылысь мед тӧдмаласны войтыръяс!

¹¹ Енмӧй, кыв дзескыдінын пукалысьяслысь ойзӧмсӧ, Аслад вына кинад мезды кулӧм вылӧ мӧдӧдӧмаясӧс.

¹² Господьӧй, водзӧс перйы миянкӧд орччӧн олысьяслысь, сизим пӧв унджык водзӧс перйы Тэнӧ лёкӧдӧмысь.

¹³ А ми, Тэнад войтырыд, Тэнад йӧрысь ыжъясыд, кутам помтӧг нимӧдны Тэнӧ, кутам ошкыны Тэнӧ чужысьяссянь чужысьясӧдз.