Псалтыр 68 - Коми Библия 2023

68 Псалом

¹ Сьылысьясӧн веськӧдлысьлы. Сьылӧны ”Шушан” шылад улӧ. Давидлӧн псалом.

² Енмӧй, мезды менӧ, ӧд ваыс пӧдтіс менӧ юрвывтыр.

³ Ме вӧйи зыбуч нюрӧ, меным некытчӧ сувтнысӧ. Ме веськалі джуджыд ваӧ, сылӧн визулыс кылӧдӧ менӧ.

⁴ Горзӧмӧйла менам эбӧсӧй бырис, менам гӧлӧсӧй сибдіс, синмӧй мудзис Енмӧс виччысьӧмысь.

⁵ Помкатӧг менӧ мустӧмтысьыс унджык менам юрси дорысь, менӧ дзескӧдысьяс ёнмӧдчӧны, меным ковмас сетны весиг сійӧ, мый эг босьтлы налысь.

⁶ Енмӧй, Тэ тӧдан менсьым мывкыдтӧм олӧмӧс, аддзан менсьым мыжъясӧс.

⁷ Ыджыдӧй, Господь Саваоф, Тэ вылӧ лача кутысьяс мед оз янавны ме понда. Израильлӧн Енмӧй, Тэнӧ корсьысьяс мед оз янавны ме понда.

⁸ Тэ вӧсна менӧ лёкӧдӧны, менам чужӧмӧй сотчӧ.

⁹ Аслам вокъяслы ме лои бокысаӧн, аслам мамлӧн пиянлы – локтысь мортӧн.

¹⁰ Тэнад керка вӧсна вежӧгтӧмыс топӧдӧ менсьым сьӧлӧмӧс, Тэнӧ омӧльтысьяслӧн лёкӧдӧмыс уси ме вылӧ.

¹¹ Кор ме видзала да бӧрда, таысь менӧ серамвыв лэптӧны.

¹² Кор ме пасьтала шогалан паськӧм, сэки ме йылысь кывбертӧны.

¹³ Кар дзиръя дорын пукалысьяс ме йылысь суклясьӧны, вина юысьяс сьылӧны ме йылысь.

¹⁴ Господьӧй, ме кевмыся Тэныд ӧні, кор Тэ бур сьӧлӧма ме дінӧ. Енмӧй, эскана Мездысьӧй, Аслад ыджыд буралӧмыд кузя вочавидз меным!

¹⁵ Перйы менӧ нюйтсьыс, эн лэдз меным вӧйны, мезды менӧ мустӧмтысьясысь да джуджыд ваысь.

¹⁶ Вабергачыс мед оз кыскы менӧ, джуджыд ваыс мед оз ньылышт менӧ, гуыс мед оз тупкы ассьыс вомсӧ менам юр весьтын.

¹⁷ Господьӧй, вочавидз меным, ӧд Тэ бур сьӧлӧма. Ыджыд буралӧмыд кузя видзӧдлы ме вылӧ.

¹⁸ Эн тупкы Ассьыд чужӧмбантӧ Аслад кесйӧгысь, ӧд ме ёна шогся. Тэрмась вочавидзны меным!

¹⁹ Матыстчы ме дінӧ да дорйы менӧ, мустӧмтысьяс вӧсна мезды менӧ.

²⁰ Тэ тӧдан, кыдзи лёкӧдісны, янӧдісны да серавлісны менӧ, Тэ аддзан менӧ дзескӧдысьясӧс.

²¹ Лёкӧдӧмыс дойдіс менсьым сьӧлӧмӧс, ме дзикӧдз жебми. Ме виччыси жалитӧм, но сійӧ эз ло, виччыси бурӧдысьясӧс, но найӧ эз тыдавны.

²² Сёян пыдди меным сетісны курыд сӧп, горш косьмигӧн менӧ юктӧдісны уксусӧн.

²³ Сёянныс мед лоӧ налы тывйӧн, чӧсмасьӧмныс – налькйӧн.

²⁴ Налӧн синныс мед дзикӧдз пемдас, налӧн кокныс мед лигышмунас пыр кежлӧ.

²⁵ Кисьт на вылӧ Ассьыд скӧрлунтӧ, Тэнад скӧралан биыд мед ньылыштас найӧс.

²⁶ Налӧн оланінъясыс мед кушмасны, налӧн чомъясын мед оз ло олысьыс.

²⁷ Ӧд найӧ дзескӧдӧны сійӧс, кодӧс Тэ пасьвартін, содтӧны дойсӧ сылы, кодӧс Тэ дойдалін.

²⁸ Мыж вылӧ мыж содты, мед налы оз вичмы Тэнад веськыдлуныд.

²⁹ Налысь нимъяссӧ мед лоӧ вуштӧма Олӧмыслӧн небӧгысь, найӧс мед оз ло гижӧма веськыда олысьяс лыдӧ.

³⁰ Ме коньӧр морт, ме ёна сьӧкыдала, отсав меным, Енмӧй, дорйы менӧ.

³¹ Ме кута сьылӧмӧн ошкыны [Аслам] Енлысь нимсӧ, аттьӧалӧмӧн кута нимӧдны Сійӧс.

³² Тайӧ лоӧ Господьлы шогманаджык ӧш дорысь, сюра да гыжъя ӧшпи дорысь.

³³ Тайӧс аддзасны рам сьӧлӧмаяс да кутасны нимкодясьны, Енсӧ корсьысьяслӧн сьӧлӧмныс ловзяс.

³⁴ Господь кылӧ коньӧръяслысь кевмӧмсӧ, Сійӧ оз ӧтдорт Ассьыс йӧзсӧ, дзескыдінын пукалысьясӧс.

³⁵ Мед ошкасны Господьӧс енэжыс да муыс, саридзыс да сэні став олысьыс.

³⁶ Ӧд Енмыс мездас Сион, выльысь кыпӧдас Иудаын каръяс. Сэні кутас овны Сылӧн войтырыс, налы вичмас кӧсйысьӧм му.

³⁷ Сэтчӧ овмӧдчасны Сылӧн кесйӧгъяссянь чужысьяс, сэні кутасны овны Сылысь нимсӧ радейтысьяс.