Псалтыр 63 - Коми Библия 2023

63 Псалом

¹ Сьылысьясӧн веськӧдлысьлы. Давидлӧн псалом.

² Енмӧй, кыв менсьым гӧлӧс шыӧс, кор ме кевмыся, видз менсьым олӧмӧс мустӧмтысьлӧн повзьӧдлӧмысь.

³ Дорйы менӧ лёк йӧзлӧн гуся сёрнитчӧмысь, лёк вӧчысьяслӧн паныд кыпӧдчӧмысь.

⁴ Ӧд найӧ лэчтӧны ассьыныс кывнысӧ шыпурт моз, налӧн сёрниыс – яда ньӧв лыйӧм кодь.

⁵ Найӧ гусьӧн лыйлӧны мыжтӧмӧс, виччысьтӧг лыйӧны, нинӧмысь оз повны.

⁶ Найӧ ышӧдӧны ӧта-мӧднысӧ лёк вӧчны, сёрнитчӧны нальк пуктӧм йылысь, шуалӧны, миянӧс пӧ некод оз аддзы.

⁷ Найӧ кӧсйӧны лёксӧ вӧчны, шуалӧны, миян пӧ эм гуся сёрнитчӧм. Збыльысь, мортлысь сьӧлӧмсӧ он вермы туявны-тӧдмавны.

⁸ Но Енмыс лыйлас найӧс ньӧвйӧн, найӧс виччысьтӧг лоӧ дойдалӧма.

⁹ Налӧн кывйыс уськӧдас найӧс асьнысӧ кок йывсьыныс, и тайӧс аддзысьяс бергӧдчасны наысь.

¹⁰ Став йӧзыс повзясны, кутасны висьтавлыны Енлӧн уджъяс йылысь, гӧгӧрвоасны, мый Енмыс вӧчис.

¹¹ Веськыда олысь мед нимкодясяс Господьӧн да Сы вылӧ лача кутас. Веськыд сьӧлӧмаяс мед гажӧдчасны! Ошкӧм.