Псалтыр 60 - Коми Библия 2023

60 Псалом

¹ Сьылысьясӧн веськӧдлысьлы. Ворсӧны струнаа ворсанторйӧн. Давидлӧн псалом.

² Енмӧй, кыв менсьым гораа бӧрдӧмӧс, кывзы менсьым кевмысьӧмӧс.

³ Му пельӧссянь ме шыася Тэ дінӧ шогсян сьӧлӧмӧн. Нуӧд менӧ изкырта вылӧ, кытчӧ ачым ме ог вермы кайнысӧ.

⁴ Ӧд Тэ – менам сайӧдчаніныс, Тэ – вына Дорйысь паныд сувтысьясысь.

⁵ Ме кӧсъя пыр овны Тэнад оланінын, кӧсъя сайӧдчыны Тэнад бордъяс улӧ.

⁶ Енмӧй, Тэ кылін менсьым кыв сетӧмӧс, Тэ вичмӧдін меным сійӧ, мый кӧсйысин сетны Тэнад нимысь полысьяслы.

⁷ Нюжӧд ӧксылысь олан лунъяссӧ, мед сылӧн юралӧмыс лоас чужысьяссянь чужысьясӧдз,

⁸ мед сылӧн юралан пуклӧсыс пыр лоӧ Тэ водзын. Тэнад буралӧмыд да збыльыд мед видзасны сійӧс.

⁹ Сэки ме помтӧг кута сьывны ошкӧмсӧ Тэнад нимлы, лунысь-лун кута вӧчны аслам кыв сетӧм серти. Ошкӧм.