Псалтыр 39 - Коми Библия 2023

39 Псалом

¹ Сьылысьясӧн веськӧдлысьлы. Давидлӧн псалом.

² Ме куті зумыд лача Господь вылӧ, и Сійӧ копыртіс мелань пельсӧ, кыліс менсьым бӧрдӧмӧс.

³ Сійӧ лэптіс менӧ пемыд гуысь, петкӧдіс менӧ зыбуч нюрысь, сувтӧдіс менӧ зумыд из вылӧ, ёнмӧдіс менсьым воськовъясӧс,

⁴ пуктіс менам вомӧ выль сьыланкыв – миян Енмӧс ошкана сьыланкыв. Тайӧс аддзигӧн унаӧн кутасны повны-вежавидзны Господьысь, лача кутасны Сы вылӧ.

⁵ Шуда сійӧ мортыс, коді лача кутӧ Господь вылӧ, а оз шыась вылӧ кыпӧдчысьяс да ылӧгас кежысьяс дінӧ.

⁶ Господьӧй, менам Енмӧй, Тэ вӧчин уна шензьӧданатор, Тэ дугдывтӧг мӧвпалан миян йылысь. Кодӧс позяс ӧткодявны Тэкӧд? Ме эськӧ кӧсйи висьтавны Тэнад уджъясыд йылысь, но весиг лыддьӧдлынысӧ ог вермы найӧс.

⁷ Вись да вайӧмтор Тэныд оз ков, сотан вись да мыжысь вись Тэ он кор, но Тэ вӧчин меным пель, медым кывны.

⁸ Та вӧсна ме шуи: «Со, ме локті, кыдзи гартӧм гижӧдас ме йылысь гижӧма.

⁹ Енмӧй, ме кӧсъя збыльмӧдны Тэнсьыд кӧсйӧмтӧ, Тэнад Индӧдыд олӧ менам сьӧлӧмын».

¹⁰ Ен войтырлӧн ыджыд чукӧртчӧмын ме юӧрті Тэнад веськыдлуныд йылысь, эг тупкыв ассьым вомӧс. Господьӧй, Тэ тӧдан тайӧс!

¹¹ Тэнсьыд веськыдлунтӧ ме эг дзеблы, а восьсӧн висьтавлі, мый Тэ эскана Мездысь. Тэнад войтырлӧн ыджыд чукӧртчӧмын ме висьтавлі Тэнад буралӧмыд да збыльыд йылысь.

¹² Господьӧй, эн тупкы меысь Ассьыд бурлунтӧ. Тэнад буралӧмыд да збыльыд мед дугдывтӧг видзасны менӧ.

¹³ Лыдтӧм-тшӧттӧм шогъяс кытшалӧны менӧ, менам мыжъясӧй суӧдісны менӧ, та вӧсна менам синмӧй бердӧма. Менам мыжъяслӧн лыдыс юрси сі дорысь унджык, менам сьӧлӧмӧй дзикӧдз нюкыртчис.

¹⁴ Господьӧй, ло бур сьӧлӧма, мезды менӧ, Господьӧй, тэрмась отсавны меным!

¹⁵ Мед яналасны да лоӧны серамтуйынӧсь менсьым олӧмӧс корсьысьяс, мед бӧр бергӧдчасны да лоӧны серамтуйынӧсь меным лёксӧ кӧсйысьяс.

¹⁶ Мед яналасны да шӧйӧвошасны найӧ, кодъяс шуалӧны, тадзи пӧ тэныд и колӧ.

¹⁷ Господьӧй, Тэнӧ корсьысьяс мед долыда нимкодясясны, Тэсянь воӧм мездӧмсӧ радейтысьяс мед дугдывтӧг шуаласны: «Господь ыджыд!»

¹⁸ Ме гӧль да коньӧр морт, но Господь тӧждысьӧ ме вӧсна. Тэ меным отсӧг сетысьыс да менӧ Мездысьыс. Енмӧй, эн ньӧжмась! Ошкӧм.