Псалтыр 36 - Коми Библия 2023

36 Псалом

1 Давидлӧн псалом.

¹ Давидлӧн псалом. Эн дӧзмы лёк вӧчысьяс вылӧ, эн вежав Индӧд торкысьяс вылӧ.

² Ӧд турунӧс моз найӧс регыд лоӧ ытшкыштӧма, веж быдмӧг моз найӧ нярмунасны.

³ Лача кут Господь вылӧ да вӧч бурсӧ, ов му вылас да видз збыльсӧ.

⁴ Бурмӧд сьӧлӧмтӧ Господьӧн, и Сійӧ збыльмӧдас тэнсьыд сьӧлӧм кӧсйӧмтӧ.

⁵ Сет ассьыд олан туйтӧ Господьлы да лача кут Сы вылӧ, и Сійӧ тӧждысяс тэ вӧсна.

⁶ Тэнсьыд мыжтӧмлунтӧ Сійӧ петкӧдас югыдас, тэнад веськыдлуныд кутас дзирдавны луншӧрся шонді моз.

⁷ Лӧня виччысь Господьӧс да лача кут Сы вылӧ. Эн вежав наяна вӧчысьлы, кодлӧн ставыс артмӧ.

⁸ Дугды скӧравнытӧ да эновтчы лёксьӧмысь, эн ыпъяв скӧрлуннад сы выйӧдз, медым вӧчны лёксӧ.

⁹ Ӧд лёк вӧчысьясӧс лоӧ бырӧдӧма, а Господь вылӧ лача кутысьяслы вичмас му.

¹⁰ Нӧшта этшаник кад, и лёк вӧчысь оз ло. Видзӧдлан сылӧн оланін вылӧ, а сійӧ куш.

¹¹ Но рам сьӧлӧмаяслы вичмас му, найӧ кутасны ёна нимкодясьны лӧнь олӧмнас.

¹² Ентӧг олысь мӧвпалӧ лёк вӧчны веськыда олысьлы, пиньсӧ йирӧ сы вылӧ.

¹³ Но Господь сералӧ Ентӧг олысь вылын, аддзӧ, мый матын нин сійӧс мыждан луныс.

¹⁴ Лёк вӧчысьяс перйӧны ассьыныс шыпуртсӧ, зэвтӧны ньӧввужсӧ, медым лыйны гӧльӧс да коньӧрӧс, медым вины веськыд туйӧд ветлысьясӧс.

¹⁵ Но налӧн шыпуртыс сатшас аслыныс сьӧлӧмас, налӧн ньӧввужйыс чегас.

¹⁶ Веськыда олысьлӧн этшаникыс ёна бурджык лёк вӧчысьлӧн уна озырлунысь.

¹⁷ Ӧд лёк вӧчысьяс вынтӧммӧны, а веськыда олысьясӧс ёнмӧдӧ Господь.

¹⁸ Господь тӧдӧ сӧстӧм сьӧлӧмаяслысь олан лунъяссӧ, налы вичманаыс некор оз бырлы.

¹⁹ Сьӧкыд кадӧ найӧ оз янавны, тшыг кадӧ пӧттӧдзныс сёясны.

²⁰ А лёк вӧчысьяс бырасны, Господьӧс мустӧмтысьяс ыж гос моз сыласны, тшын моз разаласны.

²¹ Лёк вӧчысь водзӧсӧн босьтӧ, но бӧрсӧ оз мынтысь, а веськыда олысь бур сьӧлӧма, сійӧ лышкыда сетӧ.

²² Господьлӧн бурсиӧмаяслы вичмӧ му, но Господьӧн ёрӧмаясӧс лоӧ бырӧдӧма.

²³ Господь ёнмӧдӧ веськыда олысьлысь воськовъяссӧ, сылӧн туйыс шогмана Господьлы.

²⁴ Сійӧс шатовтӧдас, но сійӧ оз усь, ӧд Господь кутӧ сійӧс киӧдыс.

²⁵ Ме том вӧлі, ӧні пӧрысьми, но некор эг аддзывлы, мый веськыда олысьӧс вӧлі эновтӧма, и сылӧн челядьыс нянь корӧны.

²⁶ Веськыда олысь быд лун буралӧ да водзӧсӧн сетӧ, сылӧн челядьыс вайӧны бурсиӧм.

²⁷ Ылыстчы лёксьыс да вӧч бурсӧ, сэки тэ кутан овны нэмъяс чӧж.

²⁸ Ӧд Господь радейтӧ веськыдлунсӧ, Сійӧ оз эновт Ассьыс эскана войтырсӧ, пыр кутас видзны найӧс. [Индӧд торкысьясӧс лоӧ вӧтлӧма.] Лёк вӧчысьяслысь рӧдсӧ лоӧ бырӧдӧма.

²⁹ Веськыда олысьяслы вичмас му, найӧ кутасны овны сэні нэмъяс чӧж.

³⁰ Веськыда олысь сёрнитӧ мывкыд кывъясӧн, сылӧн вомыс висьталӧ збыльсӧ.

³¹ Сылӧн сьӧлӧмын – Енлӧн Индӧдыс, сылӧн воськовъясыс зумыдӧсь.

³² Лёк вӧчысь кыйӧдчӧ веськыда олысь бӧрся, кӧсйӧ вины сійӧс,

³³ но Господь оз сет сійӧс лёк вӧчысьлӧн киӧ, ёрд водзын оз лэдз сійӧс мыждыны.

³⁴ Лача кут Господь вылӧ да ветлы Сылӧн туйӧд! Сійӧ вылӧ кыпӧдас тэнӧ, и тэныд вичмас му, тэ аддзан, кыдзи лоӧ бырӧдӧма лёк вӧчысьясӧс.

³⁵ Ме аддзылі чорыд сьӧлӧма лёк вӧчысьӧс, сійӧ вӧлі паськыда быдмысь пу кодь, крепыд вужъяса да уна вожа.

³⁶ Но сійӧ бырис, и эз нин вӧв, ме корси сійӧс, но эг аддзы.

³⁷ Видзӧд сӧстӧм сьӧлӧмаяс да веськыда олысьяс вылӧ, ӧд найӧс виччысьӧ лӧнь олӧм.

³⁸ А мыж вӧчысьясӧс лоӧ бырӧдӧма, лёк вӧчысьяслӧн оз ло локтана кадыс.

³⁹ Веськыда олысьяслы мездмӧмыс воас Господьсянь, Сійӧ доръяс найӧс шог дырйи.

⁴⁰ Господь отсалас налы да мездас найӧс, мездас лёк вӧчысьяслӧн киысь, доръяс найӧс, ӧд найӧ Сы вылӧ лача кутӧны. Ошкӧм.