Псалтыр 32 - Коми Библия 2023

32 Псалом

[Давидлӧн псалом.]

¹ Веськыда олысьяс, нимкодясьӧй Господьӧн! Веськыд сьӧлӧмаяслы лӧсялӧ ошкыны Господьӧс.

² Ошкӧй Господьӧс гуслиӧн, ворсӧй Сылы дас струнаа арфаӧн!

³ Сьылӧй Сылы выль сьыланкыв, кыпыда ворсӧй Сылы, гораа ошкӧй Сійӧс!

⁴ Ӧд Господьлӧн кывйыс збыль, Сылӧн уджъясыс веськыдӧсь.

⁵ Господь радейтӧ збыльсӧ да веськыда мыждӧмсӧ, муыс тыр Господьлӧн буралӧмӧн.

⁶ Господьлӧн кывйӧн вӧчӧма енэжъяссӧ, Сылӧн ловшыӧн артмис став енэжвывсаыс.

⁷ Ыджыд чукӧрӧ Сійӧ чукӧртіс саридзса ваяс, Аслас видзанінӧ пуктіс джуджыд юяс.

⁸ Став муыс мед полӧ Господьысь, муюгыдын став олысьыс мед дзӧрӧ Сы водзын.

⁹ Ӧд мый Сійӧ шуис, тайӧ лоис, мый Сійӧ тшӧктіс, тайӧ артмис.

¹⁰ Господь торкӧ войтыръяслысь шуӧмсӧ, жугӧдӧ налысь кӧсйӧмсӧ. [Сійӧ бырӧдӧ ӧксыяслысь сёрнитчӧмсӧ.]

¹¹ Но Господьлӧн шуӧмыс олӧ нэмъяс чӧж, Сылӧн кӧсйӧмыс чужысьяссянь чужысьясӧдз оз вежсьы.

¹² Шуда сійӧ войтырыс, кодлӧн Енмыс эм Господь. Шуда сійӧ войтырыс, кодӧс Господь бӧрйис Аслыс.

¹³ Господь видзӧдӧ енэжсянь да аддзӧ став йӧзсӧ.

¹⁴ Аслас юралан пуклӧссянь Сійӧ видзӧдӧ мувывса став олысьыс вылӧ.

¹⁵ Сійӧ вӧчис быд мортлысь сьӧлӧмсӧ, тӧдӧ быдӧнлысь уджъяссӧ.

¹⁶ Уна лыда тышкайӧз оз мездыны ӧксыӧс, вына мортӧс оз видз сылӧн ёнлуныс.

¹⁷ Вӧлыс оз мезды верзьӧмаӧс, сылы оз отсав вӧвлӧн ыджыд выныс.

¹⁸ Но Господь тӧждысьӧ на вӧсна, кодъяс полӧны Сыысь да лача кутӧны Сылӧн буралӧмыс вылӧ.

¹⁹ Сійӧ пӧткӧдас найӧс тшыг кадӧ, видзас найӧс кулӧмысь.

²⁰ Миян ловным лача кутӧ Господь вылӧ, Сійӧ миянлы отсӧг сетысьыс да миян сайӧдыс.

²¹ Миян сьӧлӧмным нимкодясьӧ Сыӧн, ми лача кутам Сылӧн вежа нимыс вылӧ.

²² Господьӧй, Тэнад буралӧмыд мед лоӧ миянкӧд, ӧд ми лача кутам Тэ вылӧ.