Псалтыр 25 - Коми Библия 2023

25 Псалом

1 Давидлӧн псалом.

¹ Давидлӧн псалом. Господьӧй, мыжды менӧ веськыда, ӧд ме ола сӧстӧма да Тэ вылӧ зумыд лача кута.

² Господьӧй, видзӧдлы менам сьӧлӧмӧ да тӧдмав менӧ, тӧдмав менсьым мӧвпъясӧс да сьӧлӧмӧс.

³ Тэнсьыд буралӧмтӧ ме пыр кута тӧд вылын, ме ветлӧдла Тэнад збыль туйӧд.

⁴ Ылӧдчысь йӧзкӧд ӧтлаын ме ог пукав, наян йӧзкӧд ог ӧтувтчы.

⁵ Лёк вӧчысьяслысь чукӧртчӧмсӧ ме мустӧмта, Ентӧг олысьяскӧд ӧтлаын ог пуксьы.

⁶ Господьӧй, ме мыжтӧм, мыська киӧс да кута ветлӧдлыны Тэнад висьпуктанін гӧгӧр,

⁷ кута аттьӧавны Тэнӧ, юӧртны Тэнад шензьӧдана уджъясыд йылысь.

⁸ Господьӧй, меным муса Тэнад крамыд, Тэнад дзирдлуныдлӧн оланіныс.

⁹ Эн бырӧд менӧ мыжаяскӧд, эн босьт менсьым олӧмӧс вир кисьтысьяскӧд ӧтвыв.

¹⁰ Асланыс киясӧн найӧ лёксӧ вӧчӧны, налӧн веськыд киныс виччысьӧ козинъяс.

¹¹ Но ме ола сӧстӧма. Мезды менӧ, [Господьӧй,] ло бур сьӧлӧма ме дінӧ!

¹² Ме ветлӧдла веськыд туйӧд, Ен войтырлӧн чукӧртчӧмын ме ошка Господьӧс.