Псалтыр 24 - Коми Библия 2023

24 Псалом

1 Давидлӧн псалом.

¹ Давидлӧн псалом. Господьӧй, Тэлань веськӧда сьӧлӧмӧс.

² Енмӧй, Тэ вылӧ лача кута да ог янав. Вӧрӧглы Тэ он сет нимкодясьны менӧ вермӧмысь.

³ Тэ вылӧ лача кутысьяс оз янавны, но Тэнад Индӧдлы паныд кыпӧдчысьяс яналасны.

⁴ Господьӧй, инды меным Ассьыд туйтӧ, велӧд менӧ ветлыны Тэнад кок туйӧд.

⁵ Веськӧд менӧ Аслад збыляд да велӧд менӧ, ӧд Тэ – менӧ мездысь Ен, Тэ вылӧ ме лача кута быд кадӧ.

⁶ Господьӧй, эн вунӧд Ассьыд мелілунтӧ да буралӧмтӧ, ӧд налы помыс абу.

⁷ Господьӧй, эн казьтывлы менсьым томдырся мыжъясӧс, эн казьтывлы менсьым лёк вӧчӧмъясӧс, но петкӧдлы меным Ассьыд буралӧмтӧ да бурлунтӧ, эн вунӧд менӧ!

⁸ Господь бур сьӧлӧма да веськыд, Сійӧ веськӧдӧ мыжаясӧс бур туй вылӧ.

⁹ Рамъясӧс Сійӧ туйдӧдӧ веськыдлунас, велӧдӧ найӧс ветлыны Аслас туйӧд.

¹⁰ Господьлӧн туйясыс бурӧсь да веськыдӧсь налы, кодъяс видзӧны сьӧлӧмас Сылысь тшӧктӧмъяссӧ да йитӧдсӧ, мый Сійӧ кӧрталіс накӧд.

¹¹ Господьӧй, Аслад нимыд вӧсна прӧстит менсьым мыжӧс, ӧд сійӧ вывті ыджыд.

¹² Коді олӧ Господьысь полӧмӧн, сылы Господь индас колана туй.

¹³ Сылӧн олӧмас ставыс лоӧ тырмымӧн, сысянь чужысьяслы вичмас му.

¹⁴ Господь восьтӧ Ассьыс гусяторсӧ Сыысь полысьяслы, тӧдмӧдӧ найӧс йитӧдӧн, мый кӧрталіс накӧд.

¹⁵ Менам синмӧй пыр видзӧдӧ Господь вылӧ, ӧд Сійӧ мездӧ менсьым кокӧс налькйысь.

¹⁶ Господьӧй, бергӧдчы мелань да ло бур сьӧлӧма, ӧд ме дзик ӧтнамӧн, шогӧн тырӧма.

¹⁷ Сьӧлӧм дойясӧй менам содісны, мезды менӧ курыд шогъясысь.

¹⁸ Видзӧдлы менам шог да сьӧкыдалӧм вылӧ, прӧстит менсьым мыжъясӧс.

¹⁹ Видзӧдлы, мыйта паныд сувтысьыс, найӧ ёна мустӧмтӧны да дзескӧдӧны менӧ.

²⁰ Видз менсьым олӧмӧс да мезды менӧ, медым ме эг янав, мый Тэ вылӧ лача кута.

²¹ Сӧстӧмлуныс да веськыдлуныс мед видзасны менӧ, ӧд Тэ вылӧ ме лача кута.

²² Енмӧй, мезды Израиль войтырӧс налӧн шогъясысь!