Псалтыр 19 - Коми Библия 2023

19 Псалом

¹ Сьылысьясӧн веськӧдлысьлы. Давидлӧн псалом.

² Мед вочавидзас тэныд Господь сьӧкыд кадӧ, мед доръяс тэнӧ Яков Енлӧн нимыс!

³ Мед мӧдӧдас тэныд отсӧгсӧ вежаинсянь, мед ёнмӧдас тэнӧ Сионсянь!

⁴ Мед казьтыштас тэнсьыд вайӧмторъястӧ, мед сибӧдас тэнсьыд сотан висьястӧ!

⁵ Мед [Господь] сетас тэныд сьӧлӧм сертиыд, мед збыльмӧдас став тэнсьыд кӧсйӧмтӧ!

⁶ Сэки ми кутам нимкодясьны тэнад вермӧмысь, Ен нимӧн ми кыпӧдам вермӧм йылысь дӧрапас. Господь мед могмӧдас став тэнсьыд корӧмтӧ!

⁷ Ӧні ме тӧда, мый Господь мездӧ Ассьыс мавтыштӧмасӧ, вочавидзӧ сылы Аслас вежа енэжсянь, мездӧ сійӧс вына веськыд кинас.

⁸ Ӧтияс ошйысьӧны вӧвъяснас, мӧдъяс – тарантаснас, а ми ошйысям асланым Господь Ен нимӧн.

⁹ Найӧ лигышмунісны да усисны, а ми сувтім кок выланым да зумыда сулалам.

¹⁰ Господьӧй, мезды ӧксыӧс! Кор шыасям Тэ дінӧ, вочавидз миянлы!