Псалтыр 131 - Коми Библия 2023

131 Псалом

1 Крамӧ мунігӧн сьылӧм.

¹ Крамӧ мунігӧн сьылӧм. Господьӧй, эн вунӧд Давидӧс, эн вунӧд сылысь сьӧкыд нуӧмсӧ.

² Сійӧ кыв сетіс Господьлы, Яковлӧн вына Енлы кӧсйысьӧмӧн шуис,

³ мый оз пыр аслас керкаӧ, оз вод аслас вольпасьӧ,

⁴ оз тупкы ассьыс синсӧ да оз кут узьны,

⁵ кытчӧдз оз аддзы Господьлы овмӧдчанін, Яковлӧн вына Енлы оланін.

⁶ Ми кывлім, мый Господьлӧн оланіныс Епрафаын, аддзим сійӧс Ярим эрд вылысь.

⁷ Мунамӧй Сылӧн оланін дорӧ, копыртчамӧй Сылӧн кок улӧдз.

⁸ Господьӧй, чеччы да лок Аслад шойччанінӧ, Тэ да Тэнад выныдлӧн кудйыс, локтӧй!

⁹ Тэнад попъясыд мед вевттьысясны веськыдлунӧн, Тэнад эскана войтырыд мед нимкодясяс.

¹⁰ Аслад Давид кесйӧг вӧсна эн ӧтдорт Ассьыд мавтыштӧматӧ.

¹¹ Господь сетіс зумыд кыв Давидлы, Сійӧ оз торк Ассьыс кывсӧ. Сійӧ кӧсйысис: «Тэсянь чужысьӧс Ме пуксьӧда тэнад юралан пуклӧсӧ.

¹² Тэнад пияныд кӧ кутасны видзны Менсьым йитӧдӧс да тшӧктӧмъясӧс, мыйӧ Ме велӧда найӧс, сэки налӧн пияныс тшӧтш кутасны пукавны тэнад юралан пуклӧсын нэмъяс чӧж».

¹³ Господь бӧрйис Сион Аслыс оланінӧн, Сійӧ ёна кӧсйис овмӧдчыны сэтчӧ,

¹⁴ шуис: «Тайӧ – Менам шойччанінӧй нэмъяс кежлӧ. Ме овмӧдча татчӧ, тані Меным сьӧлӧм серти.

¹⁵ Сэні олысьясӧс Ме озыра бурсиа сёянӧн, сэтчӧс корысьясӧс Ме пӧткӧда няньӧн.

¹⁶ Сионса попъясӧс Ме вевття мездмӧмӧн, эскана войтыр кутас долыда нимкодясьны.

¹⁷ Тані Ме ёнмӧда Давидлысь ыджыдалӧмсӧ, ӧзта югыд би Аслам мавтыштӧмалы.

¹⁸ Сійӧс мустӧмтысьясӧс Ме вевття янӧдӧмӧн, а сылӧн юр вылас кутас дзирдавны юркытш».