Псалтыр 107 - Коми Библия 2023

107 Псалом

¹ Сьыланкыв. Давидлӧн псалом.

² Енмӧй, менам сьӧлӧмӧй дась нин, кута сьывны да ошкыны Тэнӧ.

³ Садьмӧй, арфа да гусли! Ме садьмӧда асъя кыасӧ.

⁴ Господьӧй, ме ошка Тэнӧ войтыръяс пӧвстын, сьыла Тэныд чужанкотыръяс пӧвстын,

⁵ ӧд Тэнад буралӧмыд енэжъясысь вылынджык, Тэнад збыльыд кымӧръясысь вылынджык.

⁶ Енмӧй, Тэнӧ нимӧдӧмыс мед кыптас енэжъясысь на вылӧджык, Тэнад дзирдлуныд мед паськалас став му пасьтала!

⁷ Мезды Ассьыд мусаястӧ, дорйы найӧс Аслад веськыд кинад, вочавидз меным!

⁸ Енмыс шуис Аслас вежаинсянь: «Нимкодьпырысь Ме юкла тіянлы Сикем му, муртала тіянлы Суккот ковтыс.

⁹ Галаад му – Менам, Манассей чужанкотырлӧн му – Менам, Ефрем му – Менам юртупкӧдӧй, Иуда му – Менам юралан беддьӧй,

¹⁰ Моав му – Менам мыссян дозйӧй, Эдом муӧ Ме шыбита Ассьым кӧмкотӧс, Филистим муӧс вермӧм йылысь кута гораа горзыны».

¹¹ Коді пыртас менӧ изкарӧ, коді вайӧдас менӧ Эдом муӧдз?

¹² Он-ӧ Тэ, Енмӧй? Но Тэ, Енмӧй, эновтін миянӧс, миян тышкайӧзкӧд ӧтвыв эн пет тышӧ.

¹³ Отсав миянлы, ӧд миянӧс дзескӧдӧны, а йӧзсянь отсӧгсӧ виччысьны весьшӧрӧ.

¹⁴ Енмыскӧд ми вӧчам ыджыд уджъяс, миянӧс дзескӧдысьясӧс Сійӧ талялас.