Петӧм 5 - Коми Библия 2023

Мӧисей да Аарон сёрнитӧны фараонкӧд

¹ Мӧисей да Аарон локтісны фараон дінӧ да шуисны сылы: «Господь, Израильлӧн Ен, тадзи висьталӧ: ”Лэдз Менсьым войтырӧс мунны овтӧминӧ, медым найӧ пасъясны Меным сиӧм гаж”».

² Но фараон вочавидзис: «Коді сійӧ Господьыс, медым ме кывзыси Сылысь да лэдзи Израиль войтырӧс? Ме ог тӧд Господьӧс, и Израиль войтырӧс ме ог лэдз».

³ Найӧ шуисны сылы: «Еврейяслӧн Ен корис миянӧс. Лэдз миянӧс овтӧминӧ куим лун мунан ылнаӧ. Сэні ми вись ваям Господьлы, асланым Енлы, медым Сійӧ эз бырӧд миянӧс пӧрӧс висьӧмӧн либӧ шыпуртӧн».

⁴ Египетса ӧксы шуис налы: «Мӧисей да Аарон, мыйла ті падмӧданныд войтырӧс уджысь? Мунӧй [ставныд], уджалӧй!»

⁵ «Вывті уна войтырӧс ті кӧсъянныд торкны уджысь», – содтіс фараон.

⁶ Израиль войтырӧс уджӧдысь-нартитысьяслы да удж бӧрся видзӧдысьяслы фараон сійӧ жӧ луннас шуис:

⁷ «Дугдӧй сетны тайӧ войтырыслы кирпич вӧчалӧм вылӧ идзассӧ, кыдзи водзын сетлінныд. Найӧ мед асьныс кутасны ветлӧдлыны да чукӧртны идзассӧ.

⁸ А кирпичсӧ мед вӧчаласны воддза мындаыс. Дышнысла найӧ шуалӧны, мунам пӧ асланым Енлы вись вайны.

⁹ Содтӧй налы уджсӧ! Мед уджалӧны да ылӧг сёрнияс оз кывзыны».

¹⁰ Уджӧдысь-нартитысьяс да удж бӧрся видзӧдысьяс шуисны Израиль войтырлы: «Фараон шуис, мый оз кут сетны тіянлы идзас.

¹¹ Мунӧй асьныд корсялӧй идзассӧ, кытысь кӧсъянныд, а кирпичсӧ вӧчӧй воддза мындаыс».

¹² Израиль войтыр пондіс ветлӧдлыны Египет му пасьтала да чукӧртны идзас.

¹³ Уджӧдысь-нартитысьяс ӧтарӧ чиршӧдлісны найӧс да шуалісны: «Быд лун вӧчӧй кирпичсӧ сы мында, мыйта вӧчлінныд водзынсӧ, кор тіянлы вӧлі сетӧны идзассӧ».

¹⁴ Фараонлӧн уджӧдысь-нартитысьяс нӧйтісны израильсаясӧс, кодъясӧс вӧлі пуктӧмаӧсь видзӧдны удж бӧрся. Уджӧдысь-нартитысьяс юасисны удж бӧрся видзӧдысьяслысь: «Мыйла кирпичсӧ воддза мындаыс ни тӧрыт, ни талун энӧ вӧчӧй?»

¹⁵ Удж бӧрся видзӧдысь израильсаяс локтісны фараон дінӧ да юалісны: «Мыйла тэ миянкӧд, аслад кесйӧгъяскӧд, тадзи вӧчан?

¹⁶ Идзассӧ миянлы оз сетны, а кирпичсӧ тшӧктӧны вӧчны. Миянӧс, тэнсьыд кесйӧгъястӧ, нӧйтӧны. Тэнад войтырыд мыжмӧ таысь».

¹⁷ Но фараон вочавидзис налы: «Ті дзикӧдз дышминныд, та вӧсна кӧсъянныд мунны да вайны Господьлы вись.

¹⁸ Мунӧй, уджалӧй! Идзассӧ тіянлы оз сетны, но кирпичсӧ урчитӧм мында вӧчӧй».

¹⁹ Удж бӧрся видзӧдысь израильсаяс кор кылісны, мый кирпичсӧ быд лун колӧ вӧчны сы мында, мыйта вӧчлісны водзынджык, сэки гӧгӧрвоисны, кутшӧм сьӧкыд олӧм найӧс виччысьӧ.

²⁰ Фараон дінысь петӧм бӧрын найӧ матыстчисны Мӧисей да Аарон дінӧ, кодъяс виччысисны найӧс.

²¹ Найӧ шуисны Мӧисейлы да Ааронлы: «Господь мед аддзас, мый ті вӧчинныд, да мыждас тіянӧс. Тіян вӧсна фараон да сылӧн йӧзыс кутісны мустӧмтны миянӧс. Ті сетінныд налы шыпурт, медым миянӧс вины».

²² «Ыджыдӧй, – шыасис Мӧисей Господь дінӧ, – мыйла Тэ сэтшӧма сьӧктӧдін войтырсӧ? Мыйла Тэ менӧ мӧдӧдін?

²³ Сійӧ кадсяньыс, кор ме муні фараон дінӧ сёрнитны Тэнад нимсянь, фараон кутіс чорыдджыка на дзескӧдны войтырӧс. Мыйла Тэ эн мезды Ассьыд войтыртӧ!»