Петӧм 40 - Коми Библия 2023

Вежа чом сувтӧдӧм

¹ Господь шуис Мӧисейлы:

² «Медводдза тӧлысьлӧн медводдза лунӧ сувтӧд вежа чом.

³ Пырт Йитӧд кудсӧ вежа чомйӧ да ӧшӧд куд водзӧ дӧра.

⁴ Пырт сэтчӧ пызан да пуктав сы вылӧ став коланаторсӧ. Пырт бикок да пуктав сы вылӧ би дозъяссӧ.

⁵ Йитӧд куд водзӧ пукты зарниысь вӧчӧм тшынӧдчан висьпуктанін. Вежа чом пыранінӧ ӧшӧд дӧра.

⁶ Вежа чом пыранін водзӧ сувтӧд сотан висьлы висьпуктанін.

⁷ Вежа чом да висьпуктанін костӧ сувтӧд мыссян доз, кисьт сэтчӧ ва.

⁸ Йӧрсӧ тупкы дӧраясӧн, йӧр пыранінӧ тшӧтш ӧшӧд дӧра.

⁹ Босьт мавтыштан вый да мавтышт вежа чомсӧ да ставсӧ, мый сэні эм. Тадзи тэ вежӧдан вежа чомсӧ да став дозмук-кӧлуйсӧ, и ставыс лоӧ вежа.

¹⁰ Мавтышт сотан висьлы висьпуктанінсӧ да став дозмук-кӧлуйсӧ. Тадзи тэ вежӧдан висьпуктанінсӧ, и сійӧ лоӧ вежасьыс-вежа.

¹¹ Мавтышт мыссян доз да сылысь коксӧ. Тадзи тэ вежӧдан найӧс.

¹² Вайӧд Ааронӧс да сылысь пиянсӧ вежа чом пыранінӧ да мыссьӧд найӧс ваӧн.

¹³ Пасьтӧд Ааронӧс вежа паськӧмӧн да мавтышт сійӧс. Тадзи тэ вежӧдан сійӧс, медым попӧн кесъялас Меным.

¹⁴ Дӧрӧмӧд Ааронлысь пиянсӧ.

¹⁵ Сэсся батьнысӧ моз мавтышт найӧс, медым найӧ попъясӧн кесъяласны Меным. Тайӧ мавтыштӧмыс петкӧдлӧ, мый найӧс индӧма кесъявны попъясӧн нэмъяс кежлӧ чужысьяссянь чужысьясӧдз».

¹⁶ Мӧисей ставсӧ вӧчис Господьлӧн тшӧктӧм серти.

¹⁷ Мӧд вонас [Египетысь петӧм бӧрын], тӧлысьлӧн медводдза лунӧ лои сувтӧдӧма вежа чом.

¹⁸ Мӧисей сувтӧдіс вежа чомсӧ тадзи: пукталіс подувъяс, на вылӧ сувтӧдаліс брусъяс, йитліс найӧс потшъяс отсӧгӧн, сэсся сувтӧдаліс сюръяяс.

¹⁹ Мӧисей вевттис вежа чомсӧ, а выліас нӧшта вевттьӧд шлапнитіс, кыдзи Господь тшӧктіс сылы.

²⁰ Мӧисей пуктіс кудйӧ Индӧд изпӧвъяс. Кудлӧн кольчаясӧ сюйис потшъяс да куд вылӧ пуктіс вевтсӧ.

²¹ Сэсся пыртіс Йитӧд кудсӧ вежа чомйӧ да куд водзӧ ӧшӧдіс дӧра, медым сайӧдны сійӧс. Тадзи Господь тшӧктіс Мӧисейлы.

²² Вежа чомйӧ войвывладорас, ӧшӧдӧм дӧра водзӧ, Мӧисей пуктіс пызан,

²³ а Господь водзӧ пызан вылӧ – вежа нянь, кыдзи Господь тшӧктіс сылы.

²⁴ Вежа чомйӧ лунвывладорас, пызаныслы воча, сувтӧдіс бикок.

²⁵ Сылысь би дозъяссӧ Мӧисей пуктіс Господь водзӧ, кыдзи Господь тшӧктіс сылы.

²⁶ Вежа чомйӧ ӧшӧдӧм дӧра водзӧ Мӧисей сувтӧдіс зарни висьпуктанін,

²⁷ сэсся тшынӧдіс сэні чӧскыд ӧвтантор, кыдзи Господь тшӧктіс сылы.

²⁸ Вежа чом пыранінӧ Мӧисей ӧшӧдіс дӧра,

²⁹ а пыранін водзӧ сувтӧдіс сотан висьлы висьпуктанін да вайис сэні сотан висьяс да нянь висьяс, кыдзи Господь тшӧктіс сылы.

³⁰ Вежа чом да висьпуктанін костӧ Мӧисей сувтӧдіс мыссян доз, сэтчӧ кисьтіс ва, мед мыссьыны.

³¹ Мӧисей, Аарон да сылӧн пияныс мыськавлісны сэні ки-кокнысӧ.

³² Вежа чомйӧ пыригӧн либӧ [кесъявны] висьпуктанін дорӧ матыстчигӧн найӧ мыссисны, кыдзи Господь тшӧктіс Мӧисейлы.

³³ Вежа чом да висьпуктанін гӧгӧр Мӧисей вӧчис йӧр, а йӧр пыранінӧ ӧшӧдіс дӧра. Тадзи помаліс уджсӧ.

Господьлӧн дзирдлуныс тыртӧ вежа чом

³⁴ Сэки вежа чомсӧ вевттис кымӧр. Господьлӧн дзирдлуныс тыртіс вежа чомсӧ.

³⁵ Мӧисей эз вермы пырны вежа чомйӧ, ӧд вежа чомсӧ вӧлі вевттьӧма кымӧр. Господьлӧн дзирдлуныс тыртіс вежа чомсӧ.

³⁶ Кор кымӧрыс кыпӧдчыліс вежа чом весьтысь, Израиль пиян петлісны туйӧ. Тадзи пыр вӧлі налӧн ветлігчӧжныс.

³⁷ Кымӧрыс кӧ эз кыпӧдчыв, сэки найӧ эз мӧдӧдчывлыны, а виччысисны кымӧрлысь кыпӧдчӧмсӧ.

³⁸ Став Израиль войтыр аддзыліс, мый луннас Господьлӧн кымӧрыс сулаліс вежа чом весьтын, а войнас кымӧр пытшкас ӧзйис би. Тадзи пыр вӧлі налӧн ветлігчӧжныс.