Петӧм 25 - Коми Библия 2023

Вежа чом вӧчӧм вылӧ вайӧмторъяс

¹ Господь шуис Мӧисейлы:

² «Висьтав Израиль войтырлы, мед ваясны Меным козинъяс. Сибӧдӧй быдӧнлысь ас кӧсйӧм серти вайӧм козинъяссӧ:

³ зарни, эзысь, ыргӧн,

⁴ гӧрдовлӧз, пемыдгӧрд да югыдгӧрд вурун шӧртъяс, вӧсни шабді, кӧза вурун,

⁵ гӧрд рӧма меж кучикъяс, лӧз рӧма кучикъяс, акация пу,

⁶ би дозйӧ кисьтан олив вый, ӧвтанторъяс, мыйысь вӧчӧны мавтыштан вый да тшынӧдчанторъяс,

⁷ оникс из да мукӧд дона изъяс, медым наӧн мичмӧдны ефод да морӧсводз.

⁸ Израиль пиян мед вӧчасны Меным вежаин, и Ме кута овны на пӧвстын.

⁹ Вежа чомсӧ да сэтчӧ колана дозмук-кӧлуйсӧ вӧчӧй сідзи, кыдзи Ме петкӧдла тэныд».

Йитӧд куд

¹⁰ «Вӧч акация пуысь куд: кузьтанас кык да джын гырддза, пасьтанас гырддза да джын, судтанас гырддза да джын.

¹¹ Пытшкӧссяньыс да ортсысяньыс эж сійӧс весалӧм зарниӧн. Куд гӧгӧрыс вылытіыс вӧч [серлӧдлӧм] зарни дорыш.

¹² Кисьт зарниысь нёль кольча да йит найӧс кудлӧн нёльнан улі пельӧсас: кыксӧ – ӧтар бокас, а мӧд кыксӧ – мӧдар бокас.

¹³ Вӧч акация пуысь потшъяс да эж найӧс зарниӧн.

¹⁴ Потшъяссӧ сюй кудлӧн кыкнанбокса кольчаясӧ, медым на отсӧгӧн позис новлӧдлыны кудсӧ.

¹⁵ Потшъясыс мед пыр лоасны кудлӧн кольчаясас, энӧ перйӧй найӧс сэтысь.

¹⁶ Ме сета тэныд изпӧвъяс, пукты найӧс тайӧ кудъяс.

¹⁷ Вӧч весалӧм зарниысь кудйыслы вевт: кузьтанас кык да джын гырддза, пасьтанас гырддза да джын.

¹⁸ Вевт помъясӧ дор кык зарни херувимӧс.

¹⁹ Ӧти херувимыс мед лоас вевт ӧтар помас, мӧдыс – мӧдар помас. Вевтыскӧд найӧ мед лоасны ӧтторъяӧсь.

²⁰ Вывлань шевкнитчӧм бордъяснас херувимъяс мед тупкасны куд вевтсӧ да воча сулалӧмӧн видзӧдасны вевт вылас.

²¹ Кор Ме сета тэныд изпӧвъяс, пукты изпӧвъяссӧ кудъяс да тупкы сійӧс вевтнас.

²² Йитӧд кудлӧн вевт вывтсянь, куд вылын сулалысь кык херувим костысь, Ме кута шыасьны тэ дінӧ, кута сетны Израиль пиянлы тшӧктӧмъяс тэ пыр».

Вежа няньлы пызан

²³ «Вӧч акация пуысь пызан: кузьтанас кык гырддза, пасьтанас ӧти гырддза, судтанас гырддза да джын.

²⁴ Эж пызансӧ весалӧм зарниӧн да гӧгӧрыс вӧч [серлӧдлӧм] зарни дорыш.

²⁵ Вӧч пызанлы ки пыдӧс судта дор, а сылысь дорышсӧ вӧч зарниысь.

²⁶ Вӧч нёль зарни кольча да йит найӧс пызанлӧн нёльнан пельӧсас кокъяс бердас.

²⁷ Кольчаясыс мед лоӧны пызан дор бердас, медым сэтчӧ позис сюйны потшъяс да новлӧдлыны пызансӧ.

²⁸ Потшъяссӧ вӧч акация пуысь да эж [весалӧм] зарниӧн.

²⁹ Вӧч весалӧм зарниысь тасьтіяс, дозмукъяс, кисьтан вись дозъяс да кӧшъяс.

³⁰ Пызан вылас тэныд колӧ пыр пуктыны Ме водзӧ вежа нянь».

Сизим вожа бикок

³¹ «Весалӧм зарниысь серлӧдлӧмӧн дор бикок. Сылӧн заыс, вожъясыс, чашаясыс, чаша подъясыс да дзоридзьясыс мед лоӧны ӧтторъяӧсь.

³² Квайт вожсьыс куимыс мед каяс ӧтарсяньыс, а мӧд куимыс – мӧдарсяньыс.

³³ Вож вылас мед лоӧ куим чаша, найӧ мед лоӧны миндаль дзоридз сяма, подъяса да коръяса. Тадзи мед лоӧ квайтнан вож вылас.

³⁴ Бикок за вылас мед лоӧ нёль чаша, найӧ мед лоасны миндаль дзоридз сяма, подъяса да коръяса.

³⁵ Бикоклӧн медводдза кык вож улас мед лоӧ чаша под, мӧд кык вож улас – чаша под, коймӧд кык вож улас – чаша под. [Бикок вылын мед лоасны миндальлӧн восьса дзоридз кодь нёль чаша.]

³⁶ Чаша подъясыс да вожъясыс бикокыскӧд мед лоӧны ӧтторъяӧсь, сійӧс ставнас колӧ серлӧдлӧмӧн дорны весалӧм зарниысь.

³⁷ Вӧч сизим би доз, пукты найӧс бикок вылас, медым сетасны югыд.

³⁸ Вӧч петельлы чепӧлясӧ да пӧим воръяссӧ весалӧм зарниысь.

³⁹ Бикок да сылы став коланаторсӧ мед вӧчасны талант мында весалӧм зарниысь.

⁴⁰ Ставсӧ вӧч дзик сідзи, кыдзи вӧлі петкӧдлӧма тэныд керӧс вылын».