Петӧм 2 - Коми Библия 2023

Мӧисей чужӧ

¹ Левий чужанкотырысь ӧти морт гӧтрасис аслас чужанкотырысь нывкӧд.

² Гӧтырыс сылӧн кынӧмасис да чужтіс пиӧс. Кагаыс вӧлі зэв мичаник, и мамыс куим тӧлысь чӧж дзеблаліс сійӧс.

³ Но кор дзеблавнысӧ эз нин вермы, босьтіс юсьпӧлянысь кыӧм куд, мавтіс кудсӧ медводз сьӧд сирӧн, а сэсся пу сирӧн. Кагасӧ пуктіс кудйӧ, нуис кудсӧ Нил ю бокӧ да лэдзис ваӧ эжӧр пиӧ.

⁴ Кагаыслӧн чойыс кольччис неылӧ, медым видзӧдны, мый лоас вокыскӧд.

⁵ Ю дорӧ локтіс фараонлӧн нылыс. Сійӧ кутіс мыссьыны, а сылӧн кесйӧг аньясыс ветлӧдлісны ю пӧлӧнті. Фараон ныв аддзис эжӧр пиысь куд да тшӧктіс кесйӧг аньыслы судзӧдны сійӧс.

⁶ Кудсӧ восьтӧм бӧрас аддзис сэтысь кагаӧс. Кагаыс бӧрдіс. Фараон нывлӧн нормис сьӧлӧмыс, и сійӧ шуис: «Тайӧ кагаыс еврейяслӧн».

⁷ Кагалӧн чойыс юаліс фараон нывлысь: «Гашкӧ, ме ветла да кора тэныд еврей аньӧс, мед сійӧ нёньӧдас тайӧ кагасӧ?»

⁸ «Ветлы», – шуис сылы фараон ныв. Кагалӧн чойыс ветліс да вайӧдіс мамсӧ.

⁹ Фараон ныв шуис кагалӧн мамыслы: «Босьт тайӧ кагасӧ да верд сійӧс, а ме мынтыся тэныд». Ань босьтіс кагасӧ, медым вердны-нёньӧдны сійӧс.

¹⁰ Кага быдмыштіс, и мамыс вайӧдіс сійӧс фараон ныв дінӧ, коді босьтіс сійӧс аслыс пи пыдди. Фараон ныв пуктіс сылы Мӧисей ним, шуис, ме пӧ ваысь лэпті сійӧс.

Мӧисей пышйӧ

¹¹ Коли кад. Мӧисей верстяммис. Ӧтчыд сійӧ локтіс еврей вокъяс дінӧ да аддзис налысь сьӧкыда уджалӧмсӧ. Мӧисейлы син улас уси, кыдзи египетса морт нӧйтӧ еврейӧс.

¹² Мӧисей видзӧдліс, аддзӧ-ӧ кодкӧ сійӧс, и кор гӧгӧрвоис, мый некод оз аддзы, виис египетсаӧс, а шойсӧ лыаӧн тыртіс.

¹³ Мӧд луннас Мӧисей бара локтіс еврей вокъяс дінӧ да аддзис, кыдзи кык еврей тышкасьӧны ӧта-мӧдыскӧд. Тышсӧ панысьлы Мӧисей шуис: «Мыйла тэ нӧйтан ассьыд матыссатӧ?»

¹⁴ Сійӧ вочавидзис: «Коді тэнӧ пуктіс миян вылын ыджыдалысьнас да миянӧс мыждысьнас? Гашкӧ, [тӧрытъя] египетсаӧс моз тэ тшӧтш кӧсъян вины менӧ?» Мӧисей повзис. Сійӧ мӧвпыштіс: «Тыдалӧ, тӧдмалісны, мый ме вӧчи».

¹⁵ Фараонлы кывсис, мый вӧчис Мӧисей. Сійӧ кӧсйис вины Мӧисейӧс, но Мӧисей пышйис Мадиан муӧ. Сэтчӧ воӧм бӧрын сійӧ пуксис юкмӧс дорӧ.

¹⁶ Сэтчӧ локтісны мадианса поплӧн сизимнан нылыс [кодъяс видзисны Иофор батьныслысь ыжъяссӧ]. Найӧ гумлалісны юкмӧсысь ва да тыртісны воръяссӧ, кытысь юисны батьныслӧн ыжъясыс.

¹⁷ Но локтісны ыж видзысьяс да вӧтлісны найӧс. Сэки Мӧисей чеччис дорйыны нывъясӧс [сійӧ гумлаліс налы юкмӧсысь васӧ] да юкталіс налысь ыжъяссӧ.

¹⁸ Кор нывъяс локтісны Регуэл батьныс дінӧ, сійӧ юаліс: «Талун нӧ мый сэтшӧм водз локтінныд?»

¹⁹ Найӧ вочавидзисны: «Кутшӧмкӧ египетса морт дорйис миянӧс ыж видзысьясысь, весиг гумлаліс миянлы ва да ыжъяснымӧс юкталіс».

²⁰ «Кӧні сійӧ? – юаліс батьыс. – Мыйла колинныд сійӧс? Мунӧй корӧй сійӧс сёйны».

²¹ Мӧисейлы кажитчис овны мадианса морт ордын. Иофор сетіс ассьыс Сеппора нывсӧ Мӧисейлы гӧтыр пыдди.

²² Сеппора [кынӧмасис да] чужтіс пиӧс. Мӧисей пуктіс пиыслы Гершом ним, ӧд шуис: «Йӧз муын ме лои локтысь мортӧн». [Сеппора нӧшта кынӧмасис да чужтіс мӧд пиӧс. Мӧисей пуктіс сылы Элизер ним, ӧд шуис: «Батьӧйлӧн Енмыс отсаліс меным да мездіс менӧ фараон киысь».]

Ен корӧ Мӧисейӧс

²³ Уна во коли. Египетса ӧксы куліс. Израиль пиян ойзӧмӧн ойзісны сьӧкыд уджысь. Налӧн горзӧмыс воис Енмӧдз.

²⁴ Ен кыліс ойзӧмсӧ налысь да уськӧдіс тӧд вылас Ассьыс йитӧдсӧ, мый Сійӧ кӧрталіс Ӧвраамкӧд, Исааккӧд да Яковкӧд.

²⁵ Ен бергӧдіс Ассьыс чужӧмбансӧ Израиль пиянлань.