Петӧм 16 - Коми Библия 2023

Енэжсянь сёян

¹ Элимысь мӧдӧдчӧм бӧрын став Израиль войтыр воис Син овтӧминӧ. Тайӧ овтӧминыс куйліс Элим да Синай костын. Египетысь петӧмсянь мӧд тӧлысьлӧн дас витӧд лунӧ воисны сэтчӧ.

² Овтӧминын Израиль войтыр кутіс ропкыны Мӧисей да Аарон вылӧ.

³ «Бурджык миянлы вӧлі кувны Египет муын Господьлӧн ки помысь, – шуасисны Израиль пиян. – Сэні миян вӧліны яй тыра пӧртъяс, и няньсӧ ми пӧттӧдз сёйлім. А ӧні ті вайӧдінныд татчӧ овтӧминас, медым став тайӧ войтырыс тшыгйысла куліс».

⁴ Господь шуис Мӧисейлы: «Ме сета тіянлы енэжсянь нянь, зэр моз кисьта сійӧс. Войтырыд мед быд лун петас чукӧртны няньсӧ, кодлы мыйта колӧ лун кежлӧ. Тадзи Ме тӧдмала, кутасны-ӧ найӧ овны Менам Индӧд серти.

⁵ Квайтӧд луннас чукӧртӧм няньысь дасьтанныд кык пӧв унджык сёян мукӧд лунъясӧ чукӧртӧм дорысь».

⁶ Мӧисей да Аарон шуисны Израиль войтырлы: «Рытнас ті тӧдмаланныд, мый Господь петкӧдіс тіянӧс Египет муысь,

⁷ а асывнас ті аддзанныд Господьлысь дзирдлунсӧ. Ӧд Господь кыліс, кыдзи ті ропканныд Сы вылӧ. А ми нӧ кодъяс? Миян вылӧ мый ропканныд?»

⁸ Мӧисей водзӧ шуис: «Рытнас Господь сетас тіянлы сёйны яй, а асывнас сетас нянь, и ті пӧттӧдзныд сёянныд. Ӧд Господь кыліс, кыдзи ті ропканныд Сы вылӧ. А ми нӧ кодъяс? Ті ӧд он миян вылӧ ропкӧй, а Господь вылӧ».

⁹ Мӧисей шуис Ааронлы: «Висьтав Израиль войтырлы, мед найӧ сувтасны Господь водзӧ, ӧд Господь кыліс налысь ропкӧмсӧ».

¹⁰ Кор Аарон висьталіс Израиль войтырлы, найӧ бергӧдчисны овтӧминлань, кӧні кымӧр пытшкын петкӧдчис Господьлӧн дзирдлуныс.

¹¹ Господь шуис Мӧисейлы:

¹² «Ме кылі Израиль пиянлысь ропкӧмсӧ. Висьтав налы тадзи: рытнас ті кутанныд сёйны яй, а асывнас ті пӧттӧдзныд сёянныд нянь. Сэки ті тӧдмаланныд, мый Ме – Господь, тіян Енныд».

¹³ Рытнас Израиль войтырлӧн чомъяс дінӧ жбыр пуксялісны квайтпалич пӧткаяс, найӧ вевттисны сувтанінсӧ. А асывнас лысвааліс.

¹⁴ Лысва косьмӧм бӧрас овтӧмин веркӧсӧ коли пуж кодь шыдӧс.

¹⁵ Израиль пиян кор аддзисны тайӧс, пондісны юасьны ӧта-мӧдныслысь: «Мый нӧ тайӧ?» Ӧд найӧ эз тӧдны, мый тайӧ. Мӧисей шуис налы: «Тайӧ нянь. Господь сетӧ сійӧс тіянлы сёйны.

¹⁶ Со мый тшӧктіс Господь: ”Чукӧртӧй няньсӧ чомйын олысьяслӧн лыд серти, мыйта найӧ сёясны. Чукӧртӧй морт вылӧ ӧти омер”».

¹⁷ Израиль пиян тадзи и вӧчисны. Кодкӧ чукӧртіс унджык, а кодкӧ – этшаджык.

¹⁸ Но мурталігӧн казявлісны, мый уна чукӧртысьлӧн эз вӧв вывтіыс, этша чукӧртысьлӧн эз вӧв тырмытӧмыс. Быдӧн, вӧлӧм, чукӧртӧма колана мында.

¹⁹ Мӧисей шуис: «Чукӧртӧмсьыныд асылӧдзыс нинӧм энӧ кольӧй».

²⁰ Но ӧткымынӧн эз кывзысьны Мӧисейлысь, а чукӧртӧмсьыныс мыйтакӧ колисны асылӧдзыс. Но сэні чужисны номыръяс, и ставыс дуксис. Сэки Мӧисей скӧрмис войтырыс вылӧ.

²¹ Водз асывнас быдӧн чукӧртліс, мыйта коліс. Мыйӧн шондіыс кутліс пӧжны, чукӧрттӧг кольӧмаыс сывліс.

²² Квайтӧд луннас чукӧртлісны няньсӧ кык пӧв унджык, быд морт вылӧ кык омер. Войтырлӧн юралысьяс локтісны Мӧисей дінӧ висьтавны та йылысь.

²³ Сійӧ вочавидзис: «Господь висьталіс, мый аски шойччан лун – Господьлӧн вежа шойччан лун. Талун пӧжалӧй, мый кӧсъянныд пӧжавны, да пуӧй, мый кӧсъянныд пуны, а мый онӧ сёйӧй, кольӧй аски кежлӧ».

²⁴ Мый эз сёйны, колисны мӧд лун кежлас, кыдзи тшӧктіс Мӧисей. Шойччан лун кежлӧ кольӧм сёяныс эз дуксьы, эз номырзьы.

²⁵ Мӧисей шуис: «Сёйӧй талун кежлӧ кольӧм сёянсӧ, ӧд талун Господьлы сиӧм шойччан лун, и му вылысь няньсӧ ті онӧ аддзӧй.

²⁶ Квайт лун чукӧртӧй, а сизимӧд луныс – шойччан лун, сэки няньыс оз ло».

²⁷ Сизимӧд луннас ӧткымынӧн петісны чукӧртнысӧ, но нинӧм эз аддзыны.

²⁸ Сэки Господь шуис Мӧисейлы: «Дыр-ӧ на ті кутанныд торкны Менсьым индӧд-тшӧктӧмъясӧс?

²⁹ Видзӧдӧй, Господь сетіс тіянлы шойччан лун, та вӧсна квайтӧд лунӧ Сійӧ сетӧ тіянлы няньсӧ кык лун кежлӧ. Сизимӧд лунӧ мед некод оз пет аслас оланінысь».

³⁰ Сизимӧд луннас войтырыс шойччис.

³¹ Израильсаяс шуисны тайӧ няньсӧ маннаӧн. Манна вӧлі еджыд, кориандр тусь кодь, кӧрнас маа сӧчӧн кодь.

³² Мӧисей шуис: «Со мый тшӧктіс Господь. Ӧти омер мында маннасӧ видзӧй тіянсянь чужысьяслы, медым найӧ аддзисны, кутшӧм няньӧн Господь вердіс тіянӧс овтӧминын Египет муысь петкӧдӧм бӧрын».

³³ Мӧисей шуис Ааронлы: «Босьт [зарни] дозмук, пукты сэтчӧ ӧти омер мында маннасӧ, медым Господь водзын видзны сійӧс миян бӧрся чужысьяслы».

³⁴ Аарон пуктіс маннасӧ Йитӧд куд водзӧ, медым видзны сійӧс, кыдзи Господь тшӧктіс Мӧисейлы.

³⁵ Израиль пиян сёйисны маннасӧ нелямын во чӧж, кытчӧдз эз воны Ханаан му дорӧдз, кӧні олісны йӧз.

³⁶ Омер вӧлі ефалӧн дасӧд юкӧныс.