Петӧм 15 - Коми Библия 2023

Мӧисейлӧн сьыланкыв

¹ Сьыла Господьлы, ӧд Сійӧ ыджыд. Вӧвъясӧс да верзьӧмаясӧс Сійӧ саридзын пӧдтіс!

² Господь – менам выныс да сьыланкывйыс, Сійӧ мездіс менӧ. Сійӧ – менам Ен, ме нимӧда Сійӧс, Сійӧ – батьӧйлӧн Ен, медвылӧ кыпӧда Сійӧс.

³ Господь – тышын Вермысь, Сылӧн нимыс – Господь!

⁴ Фараонлысь тарантасъяссӧ да тышкайӧзсӧ Сійӧ пӧдтіс саридзын, тышкайӧзӧн медбур веськӧдлысьяс вӧйисны Гӧрд саридзӧ.

⁵ Вабергач ньылыштіс найӧс, из моз найӧ лэччисны ва пыдӧсӧдз.

⁶ Господьӧй, Тэнад веськыд киыд ошкана да вына, Тэнад веськыд киыд, Господьӧй, пасьвартіс паныд сувтысьӧс.

⁷ Паныд кыпӧдчысьясӧс Тэ уськӧдін шензьӧдана выннад, скӧрлуныд ӧзйис да идзасӧс моз найӧс сотіс.

⁸ Тэ пӧльыштін, и ваыс шӧри потіс. Визувтысь ваыс стен моз сувтіс, саридз шӧрын пыдӧстӧм ваыс едмис.

⁹ «Суӧда, – шуис вӧтӧдысь, – тшапнита да юкла кыйдӧсӧс, тадзи бурмӧда сьӧлӧмӧс. Перъя шыпуртӧс да ставнысӧ сутшкала».

¹⁰ Тэ пӧльыштін, и саридзыс вевттис найӧс, свинеч моз найӧ вӧйисны джуджыд ваӧ.

¹¹ Господьӧй, енъяс пӧвстын Тэ кодьыс абу! Тэ кодь мӧдыс абу! Аслад вежалуннад Тэ нималан, Тэ – повзьӧдана да ошкана, вӧчан шензьӧданаторъяс.

¹² Тэ лэптін веськыд китӧ, и муыс ньылыштіс найӧс.

¹³ Аслад буралӧмнад Тэ нуӧдін войтыртӧ, кодӧс Тэ мездін, Аслад вынӧн Тэ нуӧдан найӧс вежа оланінад.

¹⁴ Войтыръяс повзисны, кор кылісны та йылысь, Филистим муын олысьяс полӧмнысла дзӧрисны.

¹⁵ Эдомса юралысьяс шӧйӧвошисны, моавса ыджыдалысьяс тіралісны, Ханаан муын олысьяс шогӧ усисны.

¹⁶ Мед дзӧрӧны-полӧны найӧ! Тэнад вына киыд из сюръяӧ пӧртлӧ найӧс, кытчӧдз Тэнад войтырыд оз мун на дінті, войтырыд, кодӧс Тэ ньӧбин Аслыд.

¹⁷ Тэ вайӧдан да овмӧдан войтыртӧ Аслад керӧс вылӧ, мый Тэ, Господьӧй, вӧчин Аслыд оланінӧн, кытчӧ Тэ, Ыджыдӧй, Аслад киӧн кыпӧдін вежаин.

¹⁸ Господь юралӧ нэмъяс чӧж!

¹⁹ Кор фараонлӧн вӧла-тарантаса тышкайӧзыс воисны саридз шӧрӧдз, Господь бергӧдіс гыяссӧ на вылӧ. А Израиль пиян мунісны саридз шӧрӧд косінті.

Мирьям сьылӧ

²⁰ Мирьям пророк, Ааронлӧн чойыс, босьтіс тимпан, сы бӧрся мукӧд аньыс тимпанӧн тшӧтш петісны сьывны-йӧктыны.

²¹ Мирьям сьыліс: «Сьылӧй Господьлы, ӧд Сійӧ ыджыд! Вӧвъясӧс да верзьӧмаясӧс Сійӧ саридзын пӧдтіс».

Израиль войтырлӧн ропкӧм

²² Гӧрд саридзсянь Мӧисей нуӧдіс Израиль войтырӧс Шур овтӧминӧ. Куим лун мунісны овтӧминті, и некӧн эз вӧв ваыс.

²³ Воисны Мараӧ, но сэні васӧ курыд вӧснаыс юны эз шогмы. Та вӧсна и нимтӧмаӧсь местасӧ Мараӧн.

²⁴ Войтырыс кутіс шуасьны Мӧисей вылӧ: «Кытысь миянлы юнысӧ?»

²⁵ Мӧисей шыасис Господь дінӧ. Господь индіс сылы путор. Тайӧ путорсӧ сійӧ шыбитіс ваӧ, и ваыс лои юмов. Мараын Енмыс сетіс войтырыслы индӧд-тшӧктӧмъяс, сэні тӧдмаліс найӧс.

²⁶ Ен шуис: «Ті кӧ кутанныд кывзыны асланыд Господь Енлысь гӧлӧс шысӧ да вӧчны Сы водзын шогманасӧ, кутанныд кӧ кывзыны Сылысь индӧд-тшӧктӧмъяссӧ да овны на серти, Ме ог мӧдӧд тіян вылӧ весиг ӧти висьӧм, кутшӧмӧс мӧдӧдлі Египет вылӧ, ӧд Ме – Господь [тіян Енныд], тіянӧс Бурдӧдысь».

²⁷ Израиль пиян воисны Элимӧ. Сэні вӧлі дас кык ва петанін да сизимдас финик пу. Сэтчӧ ва дорас найӧ сувтӧдісны чомъяснысӧ.