Петӧм 11 - Коми Библия 2023

Бӧръя бырӧдантор йылысь юӧртӧм

¹ Господь шуис Мӧисейлы: «Нӧшта ӧти бырӧдантор Ме мӧдӧда фараон да Египет вылӧ. Та бӧрын фараон лэдзас тіянӧс, сійӧ вӧтлӧмӧн вӧтлас тіянӧс.

² Войтырыдлы [гусьӧн] висьтав, медым айулов да аньяс корасны эзысь-зарни [да паськӧм] орччӧн олысьяслысь».

³ Господь небзьӧдіс египетсалысь сьӧлӧмсӧ Израиль войтыр дінӧ [и египетсаяс сетісны налы корӧмторъяссӧ]. Мӧисейӧс ӧд пыдди пуктісны Египет муын [фараон,] фараонлы кесъялысь йӧз и став войтырыс.

⁴ Мӧисей шуис фараонлы: «Господь тадзи висьталӧ: ”Войшӧрнас Ме муна Египет пыр.

⁵ Сэки Египет муын кулас быд медводдза чужысь, ыджыдалысь фараонлӧн-ӧ сійӧ либӧ изки бердын уджалысь кесйӧг аньлӧн. Весиг ыж-мӧслӧн став медводдза чужысьыс кулас.

⁶ Египет пасьтала кутас кывны сэтшӧм ыджыд бӧрдӧм, кутшӧм эз на вӧвлы, и водзӧ сэсся оз ло.

⁷ Но Израиль войтыр вылӧ ни налӧн ыж-мӧс вылӧ весиг пон оз лысьт увтыштны, медым ті тӧдінныд, мый Господь торйӧдіс Израиль войтырӧс египетсаысь”.

⁸ Став тэнад йӧзыд локтасны меным копыртчыны да корасны менӧ петны татысь войтырӧйкӧд. Сэки ме пета». И Мӧисей муніс фараон дінысь скӧрмӧмӧн.

⁹ Господь шуис Мӧисейлы: «Фараон оз кывзы тіянӧс. Та вӧсна Менам шензьӧданаторъяслӧн [да Менам индысьпасъяслӧн] лыдыс содас Египет муын».

¹⁰ Мӧисей да Аарон вӧчисны став тайӧ [индысьпассӧ да] шензьӧданаторсӧ фараон водзын, но Господь чорзьӧдіс фараонлысь сьӧлӧмсӧ. Фараон эз лэдз Израиль пиянӧс аслас муысь.