Осий 11 - Коми Библия 2023

Господь оз эновт Израильӧс

¹ – Кор Израиль вӧлі том на, сійӧ вӧлі муса Меным. Египет муысь Ме кори пиӧс.

² Сійӧс чукӧстісны, и сійӧ муніс Ме дінысь, пондіс вись вайны Ваал идолъяслы, сотны висьяс бӧлбанъяслы.

³ Ме велӧді Ефремӧс ветлӧдлыны, новлӧдлі сійӧс Аслам ки вылын, но сійӧ эз гӧгӧрво, мый Ме тӧждыси сы вӧсна.

⁴ Муслуныслӧн кӧвъясӧн морт моз Ме кыски найӧс Ас дінӧ. Ме босьтлі на вылысь сийӧссӧ, копыртчӧмӧн пуктывлі на водзӧ сёян.

⁵ Найӧ эз кӧсйыны бергӧдчыны Ме дінӧ, та вӧсна налы бӧр ковмас мунны Египетӧ, Ассур кутас ыджыдавны на вылын.

⁶ Шыпурт кутас ӧвтчыны налӧн каръясын, сійӧ жуглас налысь иганъяссӧ, бырӧдас найӧс сыысь, мый найӧ кӧсйисны вӧчны лёксӧ.

⁷ Менам войтыр пыр бергӧдчӧ Меысь. Налы шуӧны: «Шыасьӧй Медвылыссаыс дінӧ», но найӧ оз шыасьны, оз нимӧдны-кыпӧдны Менӧ.

⁸ Верма-ӧ Ме эновтны тэнӧ, Ефрем? Верма-ӧ Ме кольны тэнӧ, Израиль? Верма-ӧ эновтны тэнӧ Адмаӧс моз, вӧчны тэкӧд Севоимкӧд моз? Менам сьӧлӧмӧй небзьӧ, Менам пытшкӧсӧй нормӧ.

⁹ Ме ог лэдз ыпъявны Аслам скӧрлунӧйлы, Ме ог нин бырӧд Ефремӧс, ӧд Ме – Ен, абу морт. Ме, Вежаыс, тэ пӧвстын, скӧрлунӧн тэ дінӧ ог лок.

¹⁰ Господь равӧстас лев моз, и Ефрем мунас Сы бӧрся. Господь равӧстас – сэки тіралӧмӧн локтасны рытыввывсянь Сылӧн пияныс,

¹¹ повзьӧдӧм лэбачьяс моз найӧ жбыркнитасны Египетысь, гулюяс моз – Ассур муысь. Ме овмӧда найӧс асланыс керкаясӧ, – висьталӧ Господь.

Израильлӧн пӧръясьӧм

¹² – Ефрем кытшаліс Менӧ аслас пӧръясьӧмӧн, Израиль – аслас ылӧдчӧмӧн. А Иуда кутчысьӧ на Ен дорас, эскӧ на вежа Енлы.