Олӧм 9 - Коми Библия 2023

Енма-морта костын йитӧд

¹ Ен бурсиис Нойӧс да сылысь пиянсӧ: «Чужтысьӧй-рӧдмӧй, овмӧдӧй мусӧ [да видзӧй сійӧс].

² Мед став вӧрса [да гортса] пемӧсыс, став енэжвыв лэбачыс, му вылас став котралысь-веглясьысьыс да став саридзса чериыс поласны-тіраласны тіянысь – Ме сета найӧс тіян киӧ.

³ Став пемӧссӧ сета тіянлы сёян пыдди, кыдзи водзынджык сеті тіянлы веж быдмӧгъяс.

⁴ Сӧмын энӧ сёйӧй яй, кӧні эм вир, ӧд вирын – олӧмыс.

⁵ Тіян вир вӧсна – олӧмнытӧ мырддьӧм вӧсна – Ме водзӧс перъя сылысь, коді кисьтас вирнытӧ, пемӧс-ӧ сійӧ либӧ морт.

⁶ Коді кисьтас мортлысь вир, сылысь вирсӧ тшӧтш кисьтасны, ӧд мортсӧ вӧчӧма Ен кодьӧн.

⁷ Чужтысьӧй-рӧдмӧй да паськӧдчӧй му вылас».

⁸ Ен шуис Нойлы да пияныслы:

⁹ «Ме кӧртала йитӧд тіянкӧд да тіянсянь чужысьяскӧд,

¹⁰ му вылын став ловъя олысьыскӧд, кодъяс петісны тіянкӧд ковчегысь: лэбачьяскӧд да мувыв пемӧсъяскӧд.

¹¹ Ме кӧртала тіянкӧд йитӧд да кӧсйыся, мый ойдӧмнас водзӧ ог кут бырӧдны ловъя олысьясӧс ни мусӧ».

¹² [Господь] Ен шуис: «Ме кӧртала тіянкӧд да став ловъя олысьыскӧд нэмъяс кежлӧ йитӧд. Тайӧ йитӧдыслы лоӧ татшӧм пас:

¹³ кымӧръясӧ Ме пукта Ассьым ӧшкамӧшка. Сійӧ лоас Ме да мувыв олысьяс костын кӧрталӧм йитӧдлӧн пасӧн.

¹⁴ Кор Ме чукӧрта му весьтӧ кымӧръяс, и кымӧръясын мыччысяс [Менам] ӧшкамӧшка,

¹⁵ сэки Ме уськӧда тӧд вылӧ Ассьым йитӧдӧс, мый Ме кӧрталі тіянкӧд да став ловъя олысьыскӧд. Сэсся став олӧмсӧ бырӧдысь ойдӧмыс оз нин ло.

¹⁶ Кор кымӧръясын мыччысяс [Менам] ӧшкамӧшка, Ме видзӧдла сы вылӧ да уськӧда тӧд вылӧ Ме да мувывса став ловъя олысьыс костын нэмъяс кежлӧ кӧрталӧм йитӧдӧс».

¹⁷ Ен шуис Нойлы: «Тайӧ лоӧ Ме да мувывса став олысьыс костын кӧрталӧм йитӧдлӧн пасӧн».

Ной да сылӧн пиян

¹⁸ Нойлӧн пияныс, кодъяс петісны ковчегысь: Сим, Хам да Яфет. Хам вӧлі Ханаанлӧн бать.

¹⁹ Куимнанныс найӧ Нойлӧн пиян, насянь рӧдмис став йӧзыс.

²⁰ Ной вӧдитіс му. Сійӧ вӧлі медводдза морт, коді пуктіс виноград.

²¹ Ӧтчыд сійӧ вина юӧм бӧрас коддзис да пасьтӧгыс куйліс аслас чомйын.

²² Сійӧс пасьтӧгыс аддзис Хам пиыс, Ханаанлӧн батьыс, да висьталіс та йылысь вокъясыслы.

²³ Сим да Яфет пуктісны пельпом выланыс паськӧм да мышнас бергӧдчӧмӧн пырисны вевттьыны батьсӧ. Найӧ эз видзӧдны батьыс вылӧ да эз аддзывны сійӧс пасьтӧгыс.

²⁴ Ас садяс воӧм бӧрын Ной тӧдмаліс, мый вӧчис медічӧт пиыс,

²⁵ да шуис: «Ёрӧма Ханаанӧс, сійӧ лоас кесйӧгӧн вокъясыслӧн кесйӧгъяслы».

²⁶ Сэсся шуис: «Ошкӧм Господьлы, Симлӧн Енлы! Ханаан мед лоас кесйӧгӧн Симлы.

²⁷ А Яфетлысь рӧдсӧ Ен мед паськӧдас Сим рӧдлӧн оланінӧдз. И налы кыкнанныслы мед кесъялас Ханаан».

²⁸ Ва ойдлӧмсянь Ной оліс на куимсё ветымын во.

²⁹ Ставнас Ной оліс ӧкмыссё ветымын арӧсӧдз, сэсся куліс.