Олӧм 38 - Коми Библия 2023

Иудалӧн мыж

¹ Сійӧ кадас Иуда торйӧдчис аслас вокъясысь да овмӧдчис Адулламӧ Хир нима морт дінӧ.

² Иуда аддзис сэтысь Шуай нима ханаанса мортлысь нылӧс, босьтіс сійӧс гӧтырӧ да узис сыкӧд.

³ Гӧтырыс кынӧмасис да чужтіс пиӧс. Иуда пуктіс пиыслы Ир ним.

⁴ Ань бара кынӧмасис да чужтіс пиӧс, пуктіс сылы Онан ним.

⁵ Нӧшта чужтіс пиӧс да пуктіс сылы Шелай ним. Иуда сэк вӧлі Кезивын, кор пиыс чужис.

⁶ Ирлы, аслас медводдза пилы, Иуда бӧрйис Фамар нима гӧтырӧс.

⁷ Ир эз вӧв шогмана Господьлы, и Господь бырӧдіс сійӧс.

⁸ Иуда шуис Онанлы: «Босьт вокыдлысь дӧвасӧ гӧтырӧ. Узь сыкӧд, мед тэсянь чужас вокыдлы пи».

⁹ Онан тӧдіс, мый пиыс оз сылӧн ло. Та вӧсна вок гӧтырыскӧд узигӧн сійӧ кисьтліс кӧйдыссӧ му вылӧ, медым эз ло вокыслы пиыс.

¹⁰ Господьлӧн син водзын тайӧ вӧлі лёк вӧчӧмӧн, и та вӧсна Онан куліс. Господь бырӧдіс сійӧс.

¹¹ Иуда шуис Фамар моньыслы: «Мун овны дӧваӧн бать керкаад да виччысь Шелай пиӧйлысь быдмӧмсӧ». Шуис тадзи, ӧд поліс, мый Шелай вокъясыс моз кулас. Фамар бӧр муніс овны бать ордас.

¹² Дыр кад мысти куліс Иудалӧн гӧтырыс, Шуайлӧн нылыс. Бӧрдан лунъяс бӧрын Иуда мӧдӧдчис адулламса Хир ёртыскӧд Тимнаӧ, кӧні шырисны сылысь ыжъяссӧ.

¹³ Фамарлы висьталісны, тэнад айкаыд пӧ локтӧ Тимнаӧ шырны ассьыс ыжъяссӧ.

¹⁴ Сэки Фамар пӧрччис дӧва паськӧмсӧ, вевттис чужӧмсӧ да гартыштчис дӧраӧн. Сэсся муніс Тимнаӧ мунан туйӧд Энаим сиктлань да пуксис сэтчӧс дзиръя дорӧ. Фамар тӧдіс, мый Шелай быдмӧма нин, но гӧтырӧ мыйлакӧ сійӧс пыр на эз босьтны.

¹⁵ Иуда аддзис Фамарӧс, но эз тӧд, чайтіс сійӧс кырсалысь аньӧн, чужӧмсӧ вӧлі тупкӧма да.

¹⁶ Иуда матыстчис ань дінӧ да шуис: «Ме кӧсъя тэкӧд талун узьны». Ӧд эз тӧд ассьыс моньсӧ. Мӧдыс юаліс: «Узя кӧ тэкӧд, мый сетан меным?»

¹⁷ Иуда вочавидзис: «Ме мӧдӧда тэныд аслам пемӧс чукӧрысь кӧзапиӧс». Ань шуис: «Сет меным водзӧсӧн мыйкӧ, кытчӧдз он мӧдӧд».

¹⁸ Иуда юаліс: «Мый тэныд сетны водзӧсӧн?» Ань шуис: «Ассьыд печатьтӧ, мый кӧв йылын, да ассьыд бедьтӧ, мый киад». Иуда сетіс да узис анькӧд, и ань кынӧмасис.

¹⁹ Фамар чеччис да муніс, пӧрччис дӧрасӧ да бӧр пасьталіс дӧва паськӧмсӧ.

²⁰ Иуда аслас адулламса ёртыслы тшӧктіс нуны аньлы кӧзапиӧс да бӧр босьтны аньлысь сійӧ, мый кольліс. Но аньӧс сійӧ эз аддзы

²¹ да кутіс юасьны сэтчӧс олысьяслысь: «Кӧні нӧ кырсалысь аньыс, коді пукаліс Энаим сиктса туй бокын?» Сылы вочавидзисны: «Некутшӧм кырсалысь ань тані эз вӧвлы».

²² Хир бӧр локтіс Иуда дінӧ да шуис: «Ме эг аддзы сійӧс. Сэтчӧс олысьяс шуисны, эз пӧ вӧвлы тані некутшӧм кырсалысь ань».

²³ Иуда шуис: «Мед аслыс кольӧдӧ менсьым печатьӧс да беддьӧс. Сӧмын мед миянӧс серамвыв эз лэптыны. Ме ӧд мӧдӧдлі кӧзапи, а тэ эн аддзы аньсӧ».

²⁴ Коли тӧлысь куим. Иудалы висьталісны, мый сылӧн Фамар моньыс кырсалӧма да кынӧмасьӧма. Иуда шуис: «Петкӧдӧй сійӧс да сотӧй».

²⁵ Но кор сійӧс петкӧдісны сотны, сійӧ тшӧктіс висьтавны аслас айкалы: «Ме кынӧма сійӧ мортсянь, кодлӧн тайӧ печатьыс, кӧвйыс да беддьыс. Тӧдмав, кодлӧн тайӧ».

²⁶ Иуда тӧдіс да шуис: «Сійӧ ме дорысь веськыда вӧчис, ӧд ме эг сет сійӧс Шелай пиӧйлы». Сэсся Иуда эз нин узьлы Фамаркӧд.

²⁷ Чужтігас тыдовтчис, мый Фамарлӧн кык кага.

²⁸ Медводз мыччысис ӧтиыслӧн киыс. Гӧгиньыс кӧрталіс сылы киас гӧрд сунис да шуис: «Тайӧыс петіс медводдзаӧн».

²⁹ Но кагаыс кисӧ бӧр кыскис, да сы пыдди петіс сылӧн вокыс. Гӧгиньыс шуис: «Кыдзи тэ вермин писькӧдчынысӧ?» Та вӧсна сылы Парес ним пуктісны.

³⁰ Сэсся петіс гӧрд суниса вокыс. Сылы Зерах ним пуктісны.