Олӧм 37 - Коми Библия 2023

Яковлӧн пияныс вузалӧны Ӧсип вокнысӧ

¹ Яков оліс Ханаан муын, кӧні коркӧ сылӧн батьыс оліс локтысь морт моз.

² Яков да сысянь чужысьяс йылысь. Кор Ӧсиплы вӧлі дас сизим арӧс, сійӧ видзис [батьыслысь] ыжъяссӧ ӧтлаын вокъясыскӧд, Валлалӧн да Зелфалӧн пиянкӧд. Валла да Зелфа вӧліны батьыслӧн гӧтыръяс. Вокъясыслӧн лёк вӧчӧм йылысь Ӧсип висьтавліс батьныслы.

³ Израиль радейтіс Ӧсипӧс мукӧд пиянсьыс ёнджыка, ӧд сійӧ чужис сылӧн пӧрысь кадӧ. Батьыс козьналіс Ӧсиплы уна рӧма кузь дӧрӧм.

⁴ Вокъяс аддзисны, мый батьныслы Ӧсип мусаджык на дорысь, да кутісны мустӧмтны сійӧс, весиг лӧгпырысь сёрнитісны сыкӧд.

⁵ Ӧсип аддзыліс вӧт да висьталіс сійӧс вокъясыслы. Таысь найӧ ёнджыка на кутісны мустӧмтны сійӧс.

⁶ «Кывзӧй, – висьталіс налы Ӧсип. – Ме вӧтаси,

⁷ ми быттьӧ кӧртавлам кольтаяс вундӧм му вылын. Сэсся менам кольтаӧй сувтіс, а тіян кольтаясныд сувталісны гӧгӧрыс да копыртчылісны менам кольталы».

⁸ Вокъяс шуисны: «Тэ ӧмӧй лоан миян ӧксыӧн? Збыль ӧмӧй тэ кутан ыджыдавны миян вылын?» Ӧсиплӧн вӧтъясысь да сёрниысь найӧ нӧшта на ёнджыка пондісны мустӧмтны сійӧс.

⁹ Ӧсип бара вӧталіс да висьталіс [батьыслы да] вокъясыслы: «Ме нӧшта аддзылі вӧт. Шонді, тӧлысь да дас ӧти кодзув копыртчылісны меным».

¹⁰ Кор сійӧ висьталіс тайӧс батьыслы да вокъясыслы, батьыс видыштіс сійӧс: «Мыйсяма вӧтъяс тэ вӧталан? Меным, мамыдлы да вокъясыдлы ӧмӧй ковмас локны да муӧдз копыртчыны тэныд?»

¹¹ Вокъяс лӧгалісны Ӧсип вылӧ, а батьыс сьӧлӧмас босьтіс сылысь висьталӧмсӧ.

¹² Ӧтчыд Ӧсиплӧн вокъясыс мунісны Сикемӧ йирсьӧдны батьныслысь ыжъяссӧ.

¹³ Израиль шуис Ӧсиплы: «Вокъясыд Сикемын йирсьӧдӧны ыжъясӧс. Ветлы на дінӧ». «Ветла», – вочавидзис батьыслы Ӧсип.

¹⁴ Израиль шуис сылы: «Мун да видзӧдлы, дзоньвидзаӧсь-ӧ тэнад вокъясыд да ставыс-ӧ бур ыжъяскӧд. Сэсся лок да висьтав меным». Ӧсип мӧдӧдчис Хеврон ковтыссянь да воис Сикемӧ.

¹⁵ Кор Ӧсип кытшлаліс видзьяс вывті, сійӧс аддзис кутшӧмкӧ морт да юаліс: «Мый тэ корсян?»

¹⁶ Ӧсип шуис: «Ме корся ассьым вокъясӧс. Висьтав, кӧні найӧ йирсьӧдӧны ыжъяссӧ?»

¹⁷ Сійӧ вочавидзис: «Найӧ татысь мунісны. Ме кывлі налысь сёрнисӧ, найӧ кӧсйисны мунны Дотанӧ». Ӧсип муніс вокъясыс бӧрся да аддзис найӧс Дотанысь.

¹⁸ Вокъяс ылісянь аддзисны Ӧсипӧс да кутісны ӧта-мӧдныскӧд сёрнитны сійӧс виӧм йылысь.

¹⁹ Ӧта-мӧдныслы шуисны: «Со локтӧ вӧтъяс вӧталысьыд!

²⁰ Мунамӧй, виам сійӧс да шыбитам юкмӧсӧ. Гортаным висьталам, мый лёк звер сійӧс косявліс. Сэки видзӧдлам, инасны оз сылӧн вӧтъясыс».

²¹ Та йылысь кыліс Рувим вокыс да Ӧсипӧс мездӧм могысь шуис: «Огӧ виӧй.

²² Энӧ кисьтӧй вир. Шыбитӧй сійӧс овтӧминса косьмӧм юкмӧсӧ, но энӧ виӧй». Тадзи шуис, ӧд кӧсйис мездыны Ӧсипӧс налӧн киысь да бӧр мӧдӧдны батьыс дінӧ.

²³ Кор Ӧсип матыстчис вокъясыс дінӧ, найӧ пӧрччӧдісны сы вылысь батьӧн козьналӧм дӧрӧмсӧ.

²⁴ Сэсся шыбитісны Ӧсипӧс юкмӧсӧ. Юкмӧсыс вӧлі куш, ваыс сэні эз вӧв.

²⁵ Сёйны пуксиганыс вокъяс аддзисны, мый налань локтӧны верблюдъяс. Тайӧ измаил войтыр нуисны Галаадсянь Египетӧ чӧскыд дука сиръяс, мавтасъяс да ладан.

²⁶ Иуда сэк шуис вокъясыслы: «Мый бурыс миянлы сыысь, ми кӧ вокнымӧс виам, а вир кисьтӧмсӧ гусьӧн видзны кутам?

²⁷ Вай вузаламӧй Ӧсипӧс тайӧ локтысьясыслы. Мыйла миянлы мыжмыны вир кисьтӧмысь? Ӧд ми ӧти вирсянь, и сійӧ миян вок». Вокъяс кывзысисны Иудалысь.

²⁸ Кор мадианса вузасьысьяс матыстчисны Ӧсиплӧн вокъяс дінӧ, найӧ кыскисны Ӧсипӧс юкмӧсысь да вузалісны сійӧс кызь сикель эзысьысь. Ӧсипӧс нуисны Египетӧ.

²⁹ Кор Рувим локтіс юкмӧс дорӧ да аддзис, мый Ӧсип вокыс абу сэні, косяліс ассьыс паськӧмсӧ.

³⁰ Сэсся муніс вокъясыс дінӧ да шуис: «Зонмыд абу! Мый меным вӧчны?»

³¹ Ӧсиплысь дӧрӧмсӧ вокъяс вирӧсьтісны начкӧм кӧза вирӧн

³² да вайисны батьыслы. Найӧ шуисны: «Ми аддзим тайӧ дӧрӧмсӧ. Видзӧдлы, пиыдлӧн-ӧ сійӧ?»

³³ Сійӧ тӧдіс да шуис: «Тайӧ ӧд пиӧйлӧн дӧрӧмыс! Лёк звер тай сійӧс сёйӧма! Збыльысь тай Ӧсипӧс чашйӧма!»

³⁴ Яков косяліс паськӧмсӧ да гартыштіс коскас чорыд дӧра. Уна лун чӧж сійӧ бӧрдіс пиыс вӧсна.

³⁵ Ныв-пиыс чукӧртчисны бурӧдны сійӧс, но сійӧ эз сибӧд бурӧдӧмсӧ, а шуис: «Шог сьӧлӧмӧн ме вуджа кулӧмаяслӧн оланінӧ пиӧй дінӧ». Тадзи бӧрдіс батьыс Ӧсип вӧсна.

³⁶ Египетын мадиансаяс вузалісны Ӧсипӧс фараонлӧн ыджыд чина мортлы – Потифарлы, фараонӧс видзысьясӧн веськӧдлысьлы.