Олӧм 34 - Коми Библия 2023

Дина чойысь водзӧс перйӧм

¹ Ӧтчыд Яковлӧн да Лиялӧн Дина нылыс муніс аддзысьны сикемса нывъяскӧд.

² Динаӧс аддзис Хаморлӧн Сикем пиыс. Хамор вӧлі Ханаан муын олысь хивей войтырлӧн ӧксы. Сикем мырдӧн босьтіс Динаӧс да узис сыкӧд.

³ Сикемӧс кутіс кыскыны Яковлӧн Дина нылыс дінӧ. Дина лои муса Сикемлы, и сійӧ зілис бурасьны Динакӧд.

⁴ Хамор батьыслы Сикем шуис: «Корав тайӧ нывсӧ меным гӧтырӧ».

⁵ Яковлы висьталісны, мый Хаморлӧн пиыс янӧдӧма сылысь Дина нывсӧ. Но сійӧ нинӧм эз кут вӧчны, а виччысис, кор пияныс локтасны ыж-мӧс йирсьӧданінысь.

⁶ Сикемлӧн Хамор батьыс локтіс Яков дінӧ сёрнитны.

⁷ Тайӧ кадас видз вылысь локтісны Яковлӧн пияныс. Найӧ кылісны лоӧмтор йылысь да ёна скӧрмисны, ӧд Яковлысь нывсӧ мырдӧналӧмнас – тайӧ шогмытӧмторсӧ вӧчӧмнас – Сикем янӧдіс Израильӧс.

⁸ Хамор кутіс сёрнитны: «Сикем пиӧй радейтӧ нывнытӧ. Сетӧй сійӧс пиӧйлы гӧтырӧ.

⁹ Рӧдвужасьӧй миянкӧд, нывъястӧ миян пиян сайӧ сетӧй, а миянлысь нывъяснымӧс мед тіян пиянныд босьтасны гӧтырӧ.

¹⁰ Олӧй миян пӧвстын. Тайӧ [паськыд] муыс тіян водзын, ветлӧдлӧй сэті, босьтӧй аслыныд муяс да овмӧдчӧй сэтчӧ».

¹¹ Сикем шуис Диналӧн батьыслы да вокъясыслы: «Лоӧй бур сьӧлӧмаӧсь ме дінӧ, и ме сета тіянлы ставсӧ, мый коранныд.

¹² Урчитӧй медыджыд дон да козинъяс. Ме сета, мый коранныд, сӧмын сетӧй меным гӧтырӧ тайӧ нывсӧ».

¹³ Дина чойнысӧ янӧдӧмысь Яковлӧн пиян наяна вочавидзисны Сикемлы да сылӧн Хамор батьыслы.

¹⁴ Шуисны [Диналӧн Симеон да Левий вокъясыс, Лиялӧн пияныс]: «Огӧ вермӧй сетны чойнымӧс вундыштчытӧм морт сайӧ, ӧд тайӧ миянӧс янӧдӧ.

¹⁵ Ті кӧ лоанныд миян кодьӧсь, миян моз вундыштанныд став айуловнытӧ, сэки ми воам ӧти кывйӧ тіянкӧд [да кутам овны тіянкӧд].

¹⁶ Сэки кутам сетны тіян сайӧ нывъяснымӧс да ас саяным босьтны тіянлысь нывъяснытӧ. Кутам овны тіянкӧд да лоам ӧти войтырӧн.

¹⁷ А онӧ кӧ кывзысьӧй да онӧ вундыштчӧй, ми босьтам чойнымӧс да мунам».

¹⁸ Татшӧм вӧзйӧмыс кажитчис Хаморлы да сылӧн Сикем пиыслы.

¹⁹ Том зон пырысьтӧм-пыр кӧсйысис, ӧд сылы муса вӧлі Яковлӧн нылыс. Сикем вӧлі бать керкаас медся пыдди пуктанаӧн.

²⁰ Хамор батьыскӧд сійӧ муніс карса дзиръя дорӧ. Сэні найӧ сёрнитісны карса олысьяскӧд да шуисны:

²¹ «Тайӧ йӧзыс миянкӧд вӧліны бурӧсь. Мед овмӧдчасны миян муӧ да ветлӧдласны сэті, ӧд муным паськыд. Налысь нывъяссӧ ми кутам босьтны гӧтырӧ, а нывъяснымӧс кутам сетны налӧн пиян сайӧ.

²² Найӧ кӧсйысисны овны миян пӧвстын да лоны ӧти войтырӧн, миян кӧ став айуловыс на моз вундыштчас.

²³ Ми кӧ вӧчам на ног, найӧ кутасны овны миянкӧд. Налӧн ыж-мӧсныс да эмбурныс тшӧтш лоӧ миян».

²⁴ Тыр арлыда став айуловыс кывзысисны Хаморлысь да Сикем пиыслысь да вундыштчисны.

²⁵ Коймӧд луннас, кор ставныс куйлісны эбӧстӧг, Яковлӧн Симеон да Левий пияныс, Диналӧн вокъясыс, босьтісны шыпуртнысӧ, повтӧг пырисны карас да виалісны став айуловсӧ.

²⁶ Хаморӧс да Сикем писӧ бытшкисны шыпуртӧн. Динаӧс босьтісны Сикем керкаысь да петісны карсьыс.

²⁷ Сэсся Яковлӧн пияныс бӧр локтісны да петкӧдісны карсьыс став озырлунсӧ. Тадзи найӧ вӧчисны Дина чойнысӧ янӧдӧм вӧсна.

²⁸ Найӧ босьтісны ыж-мӧс, осёлъяс да ставсӧ, мый вӧлі карас да видз-му вылас.

²⁹ Босьтісны став озырлунсӧ, тшӧтш челядьӧс да аньясӧс. Петкӧдісны-нуисны ставсӧ, мый вӧлі [карас да] керкаясас.

³⁰ Яков шуис Симеонлы да Левийлы: «Ті шогӧ уськӧдінныд менӧ. Ті вӧчинныд менӧ мустӧмӧн татчӧс олысьяслы, ханаансаяслы да перезейяслы. Ми ӧд этшаӧнӧсь. Найӧ кӧ чукӧртчасны миянлы паныд, сэки пасьвартасны миянӧс, бырӧдасны менӧ и гортсаӧс».

³¹ Симеон да Левий вочавидзисны: «Мыйла найӧ чойнымкӧд тадзи вӧчисны? Сійӧ ӧд абу асьсӧ вузавлысь ань!»