Олӧм 29 - Коми Библия 2023

Яков Лаван ордын

¹ Яков мӧдӧдчис асыввывса войтырлӧн муясӧ [арамей Бетуэллӧн Лаван пиыс дінӧ, коді вӧлі Ревеккалӧн вокыс, Яковлӧн да Исавлӧн чожныс].

² Мунігас аддзис видз-му вылысь юкмӧс, кӧні юктавлісны ыжъясӧс. Юкмӧс гӧгӧрыс куйліс куим ыж чукӧр. Юкмӧссӧ вӧлі тупкӧма ыджыд изйӧн.

³ Кор сэтчӧ чукӧртлісны став ыжсӧ, ыж видзысьяс вештылісны изсӧ юкмӧс вомсьыс да юктавлісны ыжъяссӧ, а сэсся изнас бӧр тупкылісны юкмӧс вомсӧ.

⁴ Яков юаліс ыж видзысьяслысь: «Вокъяс, ті кытысьӧсь?» Найӧ шуисны: «Харанысь».

⁵ «Тӧданныд-ӧ ті Нахорлысь Лаван писӧ?» – юаліс Яков. Найӧ шуисны: «Тӧдам».

⁶ «Дзоньвидза-ӧ сійӧ?» – юаліс Яков. Найӧ шуисны: «Дзоньвидза. Со, сылӧн Ракель нылыс ыжъяссӧ вайӧдӧ».

⁷ Яков шуис: «Водз на вайӧдны ыжъястӧ. Юкталӧй да йирсьӧдӧй на».

⁸ Найӧ шуисны: «Огӧ вермӧй юктавнысӧ, кытчӧдз став ыжыс оз чукӧрмы. Юкмӧс вылысь изсӧ вештасны, кор став ыжыс чукӧрмас, и сэки ми юкталам».

⁹ Сёрнитігкостіныс Ракель вайӧдіс ыжъясӧс, ӧд сійӧ видзис батьыслысь ыжъяссӧ.

¹⁰ Кор Яков аддзис Ракельӧс, мамыслӧн Лаван воклысь нывсӧ, да Лаванлысь ыжъяссӧ, матыстчис да вештіс юкмӧс вомысь изсӧ, сэсся юкталіс Лаванлысь ыжъяссӧ.

¹¹ Яков окыштіс Ракельӧс да бӧрддзис.

¹² Яков висьталіс, мый сійӧ – Ревеккалӧн пи, Ракельлӧн батьыслы рӧдвуж. Ракель котӧртіс висьтавны тайӧс батьыслы.

¹³ Лаван мыйӧн кыліс чойыслӧн Яков пи йывсьыс, котӧртіс сы дінӧ, кутліс-окаліс сійӧс, сэсся вайӧдіс гортас. Яков висьталіс сылы ставсӧ.

¹⁴ Лаван шуис сылы: «Збыльысь, ми тэкӧд ӧти лыысь да ӧти яйысь, тэ менам рӧдвуж!» Яков оліс Лаван ордын тӧлысь чӧж.

¹⁵ Лаван шуис сылы: «Тэ менам рӧдвуж, но ме тэнӧ удждонтӧг ог уджӧд. Висьтав, кутшӧм удждон кӧсъян».

¹⁶ Лаванлӧн вӧлі кык ныв: ыджыдджыкыс – Лия, ичӧтджыкыс – Ракель.

¹⁷ Лия вӧлі слаб синма, а Ракель чужӧмнас и мыгӧрнас вӧлі мича.

¹⁸ Яковлы мусмис Ракель. Та вӧсна Яков шуис Лаванлы: «Тэнад ичӧтджык Ракель ныв вӧсна ме кута уджавны тэныд сизим во».

¹⁹ Лаван шуис: «Мӧд сайӧ дорысь бурджык тэ сайӧ нылӧс сетны. Ов ме ордын».

²⁰ Яков кесъяліс Ракель вӧсна сизим во. Воясыс лэбыштісны, быттьӧ лун-мӧд коли, ӧд сылы сэтшӧм муса вӧлі Ракель.

²¹ Яков шуис Лаванлы: «Сет меным гӧтырӧс, медым сыкӧд ӧтлаын овны, ӧд кадыс воис нин».

²² Лаван чукӧртіс став йӧзсӧ да лӧсьӧдіс гаж.

²³ Рыт пемыднас Лаван вайӧдіс Яков дінӧ ассьыс Лия нывсӧ, и Яков узис сыкӧд.

²⁴ Лаван ассьыс Зелфа кесйӧг аньсӧ сетіс Лиялы.

²⁵ Асывнас Яков аддзис, вӧлӧмкӧ, узьӧма Лиякӧд. Яков шуис Лаванлы: «Мый тэ вӧчин мекӧд! Эг-ӧ ме Ракель вӧсна кесъяв тэныд? Мыйла тэ ылӧдлін менӧ?»

²⁶ Лаван шуис: «Ми ыджыд чойсьыс водзджык ичӧтджыксӧ верӧс сайӧ огӧ сетӧй.

²⁷ Тайӧ вежонсӧ такӧд ов, сэсся сетам тэныд мӧдсӧ, но кутан кесъявны меным нӧшта сизим во».

²⁸ Вежон чӧж Яков оліс Лиякӧд. Сэсся Лаван сетіс Ракель нывсӧ Яков сайӧ.

²⁹ Ассьыс Валла кесйӧг аньсӧ Лаван сетіс Ракельлы.

³⁰ Яков узис Ракелькӧд. Сійӧ радейтіс Ракельӧс Лия дорысь ёнджыка да кесъяліс Лаванлы нӧшта на сизим во.

Яковлӧн ныв-пи

³¹ Господь [Ен] аддзис, мый Лия эз вӧв радейтана, да сетіс сылы сьӧктыны, а Ракель эз вермы сьӧктынысӧ.

³² Лия нӧбасис да чужтіс [Яковлы] пиӧс, пуктіс сылы Рувим ним, ӧд шуис: «Господь аддзис менсьым шогсьӧмӧс [да сетіс меным пи]. Ӧні верӧсӧй кутас радейтны менӧ».

³³ Лия бара нӧбасис да чужтіс [Яковлы мӧд] пиӧс, сэк шуис: «Господь кыліс, мый ме абу муса верӧслы, да сетіс меным тайӧ писӧ». Сійӧ пуктіс пиыслы Симеон ним.

³⁴ Лия бара нӧбасис да чужтіс пиӧс, сэк шуис: «Ӧні ляскысяс верӧсӧй ме дінӧ, ӧд ме чужті сылы куим пиӧс». Та вӧсна сійӧ пуктіс пиыслы Левий ним.

³⁵ Сэсся Лия нӧшта на нӧбасис да чужтіс пиӧс, сэк шуис: «Ӧні ме ошка Господьӧс». Та вӧсна сійӧ пуктіс пиыслы Иуда ним. Сэсся эз нин чужты ныв-пиӧс.