Олӧм 28 - Коми Библия 2023

Исаак ыстӧ Яковӧс Лаван дінӧ

¹ Исаак корис Яковӧс, бурсиис да шуис: «Ханаанса нылӧс аслыд гӧтырӧ эн босьт.

² Мун Месопотамияӧ, мамыдлӧн Бетуэл батьыс дінӧ да сэтысь мамыдлӧн Лаван вок нывъяс пӧвстысь ӧтиӧс босьт гӧтырӧ.

³ Мед бурсиас тэнӧ Ставсӧвермысь Ен! Мед Сійӧ сетас тэныд зэв уна чужысьӧс! Тэ лоан унасьыс-уна войтырлы бать.

⁴ Мед Сійӧ бурсиас тэнӧ да тэсянь чужысьясӧс менам Ӧвраам батьлӧн бурсиӧмӧн, медым тэныд вуджас муыс, кӧні тэ олан локтысь морт моз, ӧд тайӧ мусӧ Ен сетіс Ӧвраамлы».

⁵ Исаак ыстіс Яковӧс, и сійӧ мӧдӧдчис Месопотамияӧ арамей Бетуэллӧн Лаван пиыс дінӧ. Лаван вӧлі Ревеккалӧн вокыс, Яковлӧн да Исавлӧн чожныс.

⁶ Исав тӧдмаліс, мый Исаак бурсиӧма Яковӧс да бурсиӧмӧн мӧдӧдӧма сійӧс Месопотамияӧ, мед сэтчӧс нылӧс босьтас аслыс гӧтырӧ, а оз ханаанса нылӧс.

⁷ Исав аддзис, мый Яков кывзысис бать-мамыслысь да муніс Месопотамияӧ.

⁸ Сэки гӧгӧрвоис, мый ханаанса нывъяс Исаак батьыслы абу сьӧлӧм сертиыс.

⁹ Та вӧсна Исав муніс Измаил дінӧ да нӧшта гӧтырӧ босьтіс Махалатаӧс, Ӧвраамлӧн Измаил пилысь нывсӧ, Невайотлысь чойсӧ.

Яковлӧн вӧт

¹⁰ Яков петіс Бер-Шеваысь да мӧдӧдчис Харанӧ.

¹¹ Шонді пуксьӧм бӧрын сувтіс шойччыны, босьтіс из, пуктіс юр улас да водіс.

¹² Узигас Яков вӧтасис, мый му вылын сулаліс сод. Содйыс судзис енэжӧдз, сэті лэччисны-кайисны Енлӧн анделъяс.

¹³ Господь сулаліс сэні да шуис: «Ме Господь, тэнад Ӧвраам батьлӧн Ен да Исааклӧн Ен. [Эн пов.] Мусӧ, кӧні тэ куйлан, Ме сета тэныд да тэсянь чужысьяслы.

¹⁴ Тэсянь чужысьыс лоӧ лыа чир мында. Тэ паськӧдчан рытыввылӧ и асыввылӧ, войвылӧ и лунвылӧ. Тэ да тэсянь чужысьяс пыр бурсиӧмыс вуджас быд войтырлы.

¹⁵ Ме лоа тэкӧд. Ме видза тэнӧ быдлаын, кытчӧ тэ мунан, да бӧр вайӧда тэнӧ тайӧ муас. Ме ог коль тэнӧ, а вӧча сійӧ, мый кӧсйыси тэныд».

¹⁶ Яков садьмис да шуис: «Збыльысь Господь тані, а ме эг тӧд!»

¹⁷ Полӧм босьтіс сійӧс, и сійӧ шуис: «Кутшӧм повзьӧдана тайӧ местаыс. Тайӧ збыльысь Ен керка, енэжӧ пыранін».

¹⁸ Асывводзнас Яков босьтіс изсӧ, мый вылын юрсӧ пуктӧмӧн узис, сувтӧдіс сійӧс вежа пас пыдди да кисьтіс сы вылӧ олив вый.

¹⁹ Тайӧ местасӧ Яков нимтіс Вефильӧн, а таӧдз нимыс вӧлі Луз.

²⁰ Яков кыв сетіс: «Лоас кӧ мекӧд [Господь] Ен да видзас менӧ туйын, сетас меным нянь да паськӧм,

²¹ и ме кӧ лӧнь сьӧлӧмӧн бӧр локта бать керкаӧ, сэки Господь лоас менам Енмӧн.

²² Тайӧ изйыс лоас [меным] Ен керкаӧн. И ставсьыс, мый Тэ сетан меным, ме сета Тэныд дасӧд юкӧнсӧ».