Олӧм 2 - Коми Библия 2023

Ен бурсиӧ сизимӧд лунсӧ

¹ Тадзи вӧлі вӧчӧма енэжсӧ, мусӧ да ставсӧ, мый сэні эм.

² Став Ассьыс уджсӧ помалӧм бӧрын Ен шойччис сизимӧд луннас.

³ Ен бурсиис сизимӧд лунсӧ да вежӧдіс сійӧс, ӧд сэки шойччис став Аслас уджысь.

⁴ Тадзи вӧлі вӧчӧма енэжсӧ да мусӧ. Кор Господь Ен вӧчис енэжсӧ да мусӧ,

Мортӧс вӧчӧм

⁵ пуыс да туруныс эз на вӧв му вылас, ӧд Господь Ен эз на кисьт зэрсӧ му вылӧ, да эз на вӧв мортыс, мед вӧдитны мусӧ.

⁶ Зэр пыдди мусянь кыпӧдчыліс ру да юкталіс му веркӧссӧ.

⁷ Господь Ен вӧчис муысь мортӧс, пӧльыштіс сылы ныр-вомас олӧмыслысь ловсӧ, и морт лоис ловъя олысьӧн.

⁸ Асыввылӧ, Эдэм муӧ, Господь Ен пуктіс сад йӧр да овмӧдіс сэтчӧ мортӧс, кодӧс вӧчис.

⁹ Господь Ен быдтіс-петкӧдіс муысь быдсяма пусӧ – синтӧ гажӧданасӧ и бур вотӧс вайысьсӧ. Нӧшта пуктіс сад йӧр шӧрӧ олӧмыслысь пу да бурсӧ и лёксӧ тӧдмалан пу.

¹⁰ Эдэм муысь визувтіс ю, сійӧ юкталіс сад йӧр, и водзӧ юыс вожаліс нёль пельӧ.

¹¹ Ӧти юыслӧн нимыс Писон, сійӧ кытшолӧн визувтӧ Хавила муӧд, кӧні эм зарни.

¹² Сэтчӧс зарниыс бур, пуясысь петӧ чӧскыд дука сир, эм тшӧтш оникс из.

¹³ Мӧд юыслӧн нимыс Гихон, сійӧ кытшолӧн визувтӧ Куш муӧд.

¹⁴ Коймӧд юыслӧн нимыс Тигр, сійӧ визувтӧ Ассур дорті. Нёльӧдыс – Ефрат ю.

¹⁵ Господь Ен овмӧдіс мортӧс Эдэм мулӧн сад йӧрӧ, медым дӧзьӧритны сійӧс.

¹⁶ Господь Ен шуис: «Быд пуысь тэ верман сёйны вотӧссӧ,

¹⁷ сӧмын бурсӧ и лёксӧ тӧдмалан пуысь эн сёй. Сёян кӧ, сійӧ жӧ лунӧ кулан».

¹⁸ Господь Ен шуис: «Абу бур овны мортлы ӧтнаслы. Вӧчамӧй сылы лӧсялана отсасьысьӧс».

¹⁹ Господь Ен вӧчис муысь став мувывса пемӧссӧ да енэжвыв лэбачсӧ, вайӧдіс найӧс морт водзӧ да видзӧдіс, кыдзи сійӧ кутас нимтыны быд ловъя олысьӧс. Кыдзи морт нимтіс быд ловъя олысьӧс, сэтшӧм ним и лои налы.

²⁰ Морт сеталіс нимъяс вӧрса да гортса став пемӧслы, став енэжвыв лэбачлы. Но мортлы лӧсялана отсасьысьыс эз на вӧв.

²¹ Сэки Господь Ен унмовськӧдіс мортӧс. Кор мортыс чорыда узис, Ен босьтіс сылысь ӧти ордлы, а босьтӧминсӧ тупкис яйӧн.

²² Босьтӧм ордлыысь Господь Ен вӧчис аньӧс да вайӧдіс сійӧс морт дінӧ.

²³ Морт шуис: «Со тайӧ менам лы бердысь босьтӧм лы, менам вир-яйысь босьтӧм вир-яй. Сійӧ кутас шусьыны аньӧн, ӧд сійӧс босьтӧма аймортысь.

²⁴ Та вӧсна морт кольӧ бать-мамсӧ да ӧтлаасьӧ гӧтырыскӧд, и тайӧ кыкыс лоӧ ӧти вир-яй».

²⁵ Кыкнанныс, Адам да сылӧн гӧтырыс, вӧліны пасьтӧмӧсь, но эз яндысьны ӧта-мӧдсьыныс.