Ӧксыяслӧн 4 небӧг 9 - Коми Библия 2023

Ехуӧс пуктӧны израильса ӧксыӧ

¹ Елисей пророк корис ӧти пророк-велӧдчысьӧс да шуис сылы: «Вӧнясь, босьт тайӧ вый тыра дозсӧ да мун галаадса Рамот карӧ.

² Кор воан сэтчӧ, корсь сэтысь Нимши Иосафатлысь Еху писӧ. Матыстчы сы дінӧ, чукӧст сійӧс ёртъяс пӧвстсьыс да нуӧд пыді вежӧсас.

³ Сэні кисьт сылы юр вылас дозсьыд выйтӧ да шу, мый Господь тадзи висьталӧ: ”Ме мавтышта тэнӧ ӧксыӧ Израиль войтырлы”. Сэсся восьт ӧдзӧссӧ да котӧрӧн пышйы сэтысь».

⁴ Пророк-велӧдчысь, том морт, муніс галаадса Рамот карӧ.

⁵ Кор воис сэтчӧ, аддзис тышкайӧзӧн веськӧдлысьясӧс, найӧ ставныс пукалісны ӧтлаын. Пророк-велӧдчысь шыасис: «Веськӧдлысьӧй, менам эм сёрни тэ дінӧ». Еху юаліс: «Код дінӧ миян пиысь?» Пророк-велӧдчысь вочавидзис: «Тэ дінӧ, веськӧдлысьӧй».

⁶ Еху чеччис да пырис сыкӧд керкаас. Сэні пророк-велӧдчысь кисьтіс сылы юр вылас вый да шуис: «Господь, Израильлӧн Ен, тадзи висьталӧ: ”Ме мавтышта тэнӧ ӧксыӧ Господьлӧн войтырлы – Израильлы.

⁷ Тэ бырӧдан аслад Ахав ыджыдлысь рӧдсӧ. Тадзи Ме, Господь, водзӧс перъя пророкъяс вӧсна да Аслам став мукӧд кесйӧгъяс вӧсна, кодъясӧс виис Езавель.

⁸ Ахавлӧн рӧдыс бырас. Ме бырӧда Израильын Ахав рӧдысь став айуловсӧ ичӧтсянь ыджыдӧдз.

⁹ Ме вӧча Ахав рӧдкӧд сійӧ жӧ, мый вӧчи Неват Еровамлӧн рӧдкӧд да Ахий Вааслӧн рӧдкӧд.

¹⁰ А Езавельлысь шойсӧ сёясны понъяс Изреель кар сайын, и некод сійӧс оз гуав”». Сэсся пророк-велӧдчысь восьтіс ӧдзӧссӧ да пышйис.

¹¹ Кор Еху бӧр бергӧдчис ӧксылӧн киподувса веськӧдлысьяс дінӧ, найӧ юалісны сылысь: «Ставыс-ӧ тэнад бур? Мыйла воліс тэ дінӧ тайӧ выжывыс?» Еху вочавидзис: «Ті ӧд асьныд тӧданныд, мыйсяма тайӧ морт, и мый сійӧ вермас висьтавны».

¹² «Тэ ылӧдлан миянӧс, – шуисны веськӧдлысьяс. – Висьтав миянлы збыльсӧ». Сэки Еху висьталіс налы, мый пророк-велӧдчысь шуис сылы. Нӧшта содтіс: «Сійӧ висьталіс меным, Господь пӧ тадзи висьталӧ: ”Ме мавтышта тэнӧ ӧксыӧ Израиль войтырлы”».

¹³ Веськӧдлысьяс дзик пыр пӧрччисны вылыс паськӧмнысӧ да вольсалісны сод тшупӧдъяс вылӧ Ехулы кок улас. Сэсся букӧстісны буксанӧн да горӧдісны: «Еху – миян ӧксы!»

Еху виӧ израильса да иудаса ӧксыясӧс

¹⁴ Нимши Иосафатлӧн Еху пиыс кыпӧдчис Иорам ӧксылы паныд. Иорам став израильса тышкайӧзкӧд вӧлі галаадса Рамот карын, дорйис карсӧ арамейяслӧн Азаил ӧксыысь.

¹⁵ Тыш дырйи арамейяс ёна дойдісны Иорам ӧксыӧс, та вӧсна сійӧ бӧр муніс Изреельӧ, мед бурдӧдчыны. Тышкайӧзӧн веськӧдлысьяслы Еху шуис: «Ті кӧ ме дор, сідзкӧ, некодлы энӧ лэдзӧй петны карсьыс нуны юӧр Изреельӧ».

¹⁶ Ачыс Еху пуксис аслас тарантасӧ да муніс Изреельӧ, кӧні куйліс израильса Иорам ӧксы. [Сійӧс ёна дойдалісны арамейяс Рамот кар вӧсна тышкасигӧн, кор сійӧ вермасис арамейяслӧн вына да ён Азаил ӧксыкӧд.] Сэтчӧ Иорамӧс видлыны локтіс тшӧтш иудаса Ахазий ӧксы.

¹⁷ Изреельын башня вывсянь видзӧдысь аддзис Ехулысь тышкайӧзсӧ да горӧдіс: «Тышкайӧз локтӧны!» Иорам шуис: «Мӧдӧд налы паныд верзьӧмаӧс юавны, бур могӧн-ӧ найӧ локтӧны?»

¹⁸ Верзьӧма петіс налы воча да шуис: «Ӧксы юасьӧ, бур могӧн-ӧ ті локтанныд?» Еху вочавидзис: «Тэныд мыйла тайӧс тӧднысӧ? Бергӧд вӧвтӧ да лок ме бӧрся». Башня вывсянь видзӧдысь юӧртіс ӧксылы, верзьӧмаыд пӧ воис на дінӧдз, но бӧрсӧ оз лок.

¹⁹ Сэки мӧдӧдісны мӧд верзьӧмаӧс. Сійӧ муніс да шуис Ехулӧн тышкайӧзлы: «Ӧксы юасьӧ, бур могӧн-ӧ ті локтанныд?» Еху вочавидзис: «Тэныд мыйла тайӧс тӧднысӧ? Бергӧд вӧвтӧ да лок ме бӧрся».

²⁰ Башня вывсянь видзӧдысь юӧртіс ӧксылы: «Верзьӧмаыд воис на дінӧдз, но бӧрсӧ оз лок. А медводдза тарантасын рӧдтысьыс лэбӧмӧн-лэбӧ Нимшилӧн Еху пи моз».

²¹ «Доддялӧй меным тарантас!» – тшӧктіс Иорам ӧксы. Кесйӧгъяс доддялісны. Сэки израильса Иорам ӧксы да иудаса Ахазий ӧксы быдӧн аслас тарантасын петісны Ехулы воча. Паныдасисны сыкӧд изреельса Навотлӧн му вылын.

²² Ехуӧс аддзигӧн Иорам юаліс: «Бур могӧн-ӧ тэ локтан, Еху?» Мӧдыс вочавидзис: «Кутшӧм бур вермас лоны тані, кор тэнад Езавель мамыд быдлаын паськӧдӧ зывӧк идолъяслы юрбитӧм да тшыкӧдчӧм?»

²³ Иорам бӧр бергӧдіс тарантассӧ да пышйигас Ахазийлы горӧдіс: «Ахазий, миянӧс вузалісны!»

²⁴ Сэки Еху зэлӧдіс ньӧввужсӧ да лыйис Иорамлы. Ньӧвйыс веськаліс Иорамлы мышкуас кык пуліпом костас да муніс сьӧлӧм пырыс. Иорам усис тарантасас.

²⁵ Еху шуис аслас Бидэкар отсасьысьлы: «Босьт Иорамлысь шойсӧ да шыбит изреельса Навотлӧн му вылӧ. Кор ми тэкӧд вӧлі мунам таті Иорамлӧн Ахав батьыс бӧрся, Господь висьталіс, мый лоас Ахавкӧд. Эн вунӧд, мый Сійӧ тадзи шуис:

²⁶ ”Тӧрыт Ме аддзылі Навотлысь да пияныслысь вирсӧ, – висьталӧ Господь. – Тані Ме водзӧс перъя тэнсьыд на вӧсна, – висьталӧ Господь”. Сідзкӧ, босьт да шыбит Иорамлысь шойсӧ тайӧ видз-му вылас».

²⁷ Иудаса Ахазий ӧксы кор аддзис Иорамлысь кулӧмсӧ, уськӧдчис пышйыны Бет-Хагганлань. Еху вӧтчис сы бӧрся аслас йӧзлы горзӧмӧн: «Виӧй тшӧтш сійӧс тарантасас!» Ахазийӧс дойдісны Ивлеам кар дорын Гур керӧсын. Но сійӧ воӧдчис на Мегиддо карӧдз, и сэні куліс.

²⁸ Ахазийлӧн кесйӧгъяс нуисны сылысь шойсӧ Ерусалимӧ да дзебисны Давид карӧ аслас дзебанінӧ батьясыскӧд орччӧн.

²⁹ Ахазий ӧксыаліс Иуда муын израильса Иорам ӧксылӧн, Ахав пилӧн, дас ӧтиӧд веськӧдлан восянь.

Езавельлӧн кулӧм

³⁰ Еху локтіс Изреельӧ. Кор Езавель тӧдмаліс став лоӧмтор йывсьыс, мавтіс синсӧ, баситіс-лӧсьӧдіс юрсисӧ да сувтіс видзӧдны ӧшинь дорас.

³¹ Кор Еху вӧлі пырӧ карса дзиръяӧд, Езавель горӧдіс: «Бурмис-ӧ тэнад сьӧлӧмыд? Зимри моз тэ виин ассьыд ӧксытӧ».

³² Ӧшиньлань юрсӧ лэптӧмӧн Еху юаліс: «Эм-ӧ тані кодкӧ ме дор?» Ӧшиньӧдыс мыччысисны кык-куим ыджыд чина морт.

³³ «Шыбитӧй тайӧ аньсӧ!» – тшӧктіс Еху. Найӧ шыбитісны Езавельӧс ӧшиньӧдыс. Сылӧн вирыс резыштіс стенмас и вӧвъяс вылӧ. Еху аслас тарантасӧн муніс ань вывті.

³⁴ Еху пырис ӧксы керкаӧ, сёйис-юис да шуис: «Тӧждысьӧй тайӧ ёрӧм аньлӧн шойыс вӧсна, гуалӧй сійӧс, ӧд сійӧ ӧксылӧн ныв».

³⁵ Но Езавельлӧн шойысла мунысьяс юрлыыс да ки-кокыс кындзи нинӧм эз аддзыны.

³⁶ Кор локтісны да висьталісны та йылысь Ехулы, сійӧ шуис: «Господьлӧн шуӧмыс иніс. Аслас тишбиса Илля кесйӧг пыр Господь шуліс: ”Изреель кар сайын понъяс сёясны Езавельлысь шойсӧ.

³⁷ Сылӧн шойыс разалас изреельса видз-му вылын куйӧд моз. И некод оз вермы шуны, мый тайӧ Езавельлӧн шойыс”».