Ӧксыяслӧн 4 небӧг 8 - Коми Библия 2023

Шунемса ань ӧксы дінын

¹ Елисей шуис аньлы, кодлысь писӧ сійӧ ловзьӧдіс: «Мун гортсаясыдкӧд Израиль муысь мӧдлаӧ, ӧд Господь ыстас тайӧ муас тшыгъялӧм сизим во кежлӧ».

² Ань вӧчис Ен мортлӧн шуӧм серти. Босьтіс став ассьыс гортсасӧ да муніс Филистим муӧ. Оліс сэні сизим во.

³ Сизим во мысти ань бӧр локтіс Филистим муысь Израиль муӧ. Сійӧ муніс ӧксы дінӧ, мед бӧр корны ассьыс мусӧ да керкасӧ.

⁴ Буретш сэки ӧксы ордын вӧлі Елисейлӧн, Ен мортлӧн, Гезий кесйӧгыс. Ӧксы корис Гезийӧс висьтавны Елисейлӧн ыджыд уджъясыс йылысь.

⁵ Кор Гезий вӧлі висьталӧ, кыдзи Елисей ловзьӧдіс кулӧм мортӧс, ӧксы дінӧ локтіс сійӧ аньыс, кодлысь писӧ Елисей ловзьӧдіс. Ань корис ӧксылысь ассьыс мусӧ да керкасӧ. Гезий шуис: «Ӧксыӧй-ыджыдӧй, тайӧ – буретш сійӧ аньыс да сылӧн пиыс, кодӧс Елисей ловзьӧдіс».

⁶ Ӧксы юасис аньлысь лоӧмтор йывсьыс, а мӧдыс ставсӧ сьӧрсьӧн-бӧрсьӧн висьталіс сылы. Сэки ӧксы тшӧктіс аслас ыджыд чина мортлы отсавны тайӧ аньыслы. Ӧксы шуис: «Видзӧд, мед аньлысь став овмӧссӧ бӧр сетасны сылы. Нӧшта аньлы мед мынтысясны няньсьыс, мый сылӧн му вылын быдмис сійӧ лунсяньыс, кор сійӧ петіс тайӧ мусьыс».

Арамса Бен-Хадад ӧксылӧн кулӧм

⁷ Елисей локтіс Дамаск карӧ. Арамейяслӧн Бен-Хадад ӧксы сэки вӧлі висьӧ. Ӧксылы юӧртісны, карас пӧ локтіс Енлӧн морт.

⁸ Ӧксы шуис Азаиллы: «Босьт аскӧдыд козин да ветлы Енлӧн морт дінӧ. Сійӧ мед юалас Господьлысь, бурда-ӧ ме тайӧ висьӧмсьыс».

⁹ Азаил босьтіс Дамаскысь медбур козинъяс, сӧвтіс нелямын верблюд вылӧ да муніс Енлӧн морт Елисей дінӧ. Кор воис сэтчӧ, сувтіс Енлӧн морт водзӧ да шуис: «Арамейяслӧн Бен-Хадад ӧксы, тэнад кесйӧг, мӧдӧдіс менӧ юавны, бурдас-ӧ сійӧ тайӧ висьӧмсьыс».

¹⁰ Елисей вочавидзис: «Мун да висьтав сылы, мый бурдас. Но Господь восьтіс меным, мый сійӧ кулас».

¹¹ Елисей синсӧ вештывтӧг видзӧдіс Азаил вылӧ. Сылӧн видзӧдӧмысь Азаил шӧйӧвошис. Сэсся Енлӧн морт бӧрддзис.

¹² «Ыджыдӧй, мыйла тэ бӧрдан?» – юаліс Азаил. Елисей вочавидзис: «Ме тӧда, мыйта лёксӧ тэ вӧчан Израиль войтырлы. Налысь изкаръяссӧ тэ сотан, том зонъяссӧ шыпуртӧн бытшйӧдлан, ичӧт кагаяссӧ муас лясйӧдлан, нӧбасьысь аньяслысь кынӧмсӧ вожӧдан».

¹³ Азаил шуис: «Коді ме сэтшӧмыс, тэнад кесйӧг, медым вӧчны татшӧмторсӧ? Ме ӧд сӧмын пон [шой]». Елисей шуис: «Господь петкӧдліс меным, мый тэ арамса ӧксыӧн лоан».

¹⁴ Елисейкӧд сёрнитӧм бӧрын Азаил муніс аслас ӧксы дінӧ. Ӧксы юаліс: «Мый нӧ висьталіс тэныд Елисей?» Азаил вочавидзис: «Шуис, бурдан пӧ».

¹⁵ Мӧд луннас Азаил босьтіс шебрас, кӧтӧдіс сійӧс ваӧн да пуктіс ӧксылы чужӧм вылас, и ӧксы куліс. Азаил пуксис сы пыдди ӧксыӧ.

Иуда муын Иорамлӧн ӧксыалӧм

¹⁶ Израильса Иорам ӧксылӧн, Ахав пилӧн, витӧд веськӧдлан воӧ Иуда муын Иосафат бӧрти ӧксыӧ пуксис сылӧн Иорам пиыс.

¹⁷ Ӧксыӧ пуксигас Иорамлы вӧлі комын кык арӧс. Кӧкъямыс во чӧж сійӧ юраліс Ерусалимын.

¹⁸ Иорам ветліс израильса ӧксыяслӧн туйӧд. Сылӧн гӧтырыс вӧлі Ахавлӧн нылыс, та вӧсна Ахав рӧд моз сійӧ вӧчис Господь водзын шогмытӧмсӧ.

¹⁹ Но Аслас Давид кесйӧг вӧсна Господь эз кӧсйы бырӧдны Иуда му. Ӧд Господь вӧлі кӧсйысьӧма Давидлы, мый сысянь чужысь кутас юравны нэмъяс чӧж.

²⁰ Иудаса Иорам ӧксылӧн веськӧдлан кадӧ эдом войтыр кыпӧдчис сылы паныд да пуктіс аслыс ӧксыӧс.

²¹ Иорам аслас тарантаса тышкайӧзкӧд муніс Цаирӧ. Эдомса тышкайӧз кытшалісны Иорамӧс да тарантаса тышкайӧзӧн веськӧдлысьяссӧ, но войнас Иорам пасьвартіс найӧс. Эдомсаяс пышйисны асланыс гортӧ.

²² Эдом войтыр мыніс Иуда кипод улысь, и ӧнӧдз тайӧ тадз. Сійӧ жӧ кадӧ иудаса ӧксылы паныд кыпӧдчисны тшӧтш Ливна карын олысьяс.

²³ Иорам ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.

²⁴ Иорам куліс да вуджис батьясыс дінӧ. Сійӧс дзебисны Давид пӧльыслӧн карӧ батьясыскӧд орччӧн. Иорам бӧрти ӧксыӧ пуксис сылӧн Ахазий пиыс.

Иуда муын Ахазийлӧн ӧксыалӧм

²⁵ Израильса Иорам ӧксылӧн, Ахав пилӧн, дас кыкӧд веськӧдлан воӧ Иуда муын ӧксыӧ пуксис иудаса Иорам ӧксылӧн Ахазий пиыс.

²⁶ Ӧксыӧ пуксигас сылы вӧлі кызь кык арӧс. Ӧти во чӧж сійӧ юраліс Ерусалимын. Сылӧн мамыс вӧлі Аталия, израильса Омри ӧксылӧн нылыс.

²⁷ Ахазий ветліс Ахав рӧдлӧн туйӧд. Сылӧн мамыс вӧлі Ахав рӧдысь, и Ахав рӧд моз Ахазий вӧчис Господь водзын шогмытӧмсӧ.

²⁸ Ахавлӧн Иорам пикӧд Ахазий петіс тышӧ арамейяслӧн Азаил ӧксылы паныд. Найӧ тышкасисны галаадса Рамот карын, кӧні арамейяс дойдісны Иорамӧс.

²⁹ Медым бурдны тайӧ дойяссьыс, Иорам бӧр локтіс Изреельӧ. Иудаса Ахазий ӧксы локтіс Изреельӧ видлыны доймалӧм Иорам ӧксыӧс.