Ӧксыяслӧн 4 небӧг 6 - Коми Библия 2023

Чер кыптӧ ваысь

¹ Пророк-велӧдчысьяс шуисны Елисейлы: «Тайӧ вежӧсас, кӧні ми ӧні олам да велӧдчам, дзескыд миянлы.

² Лэдз миянлы ветлыны Йӧрдан ю дорӧ, медым пӧрӧдны кер. Сэтысь ми быдӧн ваям ӧти керйӧн да лэптам керка, медым сэні овны-велӧдчыны». «Ветлӧй», – шуис Елисей.

³ Ӧти пророк-велӧдчысь шуис Елисейлы: «Ми, тэнад кесйӧгъяс, кӧсъям, мед тэ тшӧтш мунін миянкӧд». «Муна», – шуис Елисей

⁴ да мӧдӧдчис накӧд. Найӧ воисны Йӧрдан ю дорӧ да пондісны пӧрӧдны пуяс.

⁵ Пусӧ пӧрӧдігӧн ӧтилӧн черыс мыніс черпусьыс да усис ваӧ. «Ойя, ыджыдӧй! – горӧдіс сійӧ. – Черсӧ ӧд ме водзӧсӧн босьті!»

⁶ Енлӧн морт юаліс: «Кытчӧджык сійӧ усис?» Мӧдыс петкӧдліс местасӧ. Елисей керыштіс путор да шыбитіс сійӧс чер усянінӧ. Черыс пырысьтӧм-пыр кыптіс ва веркӧсӧ.

⁷ Елисей шуис: «Босьт чертӧ». Мӧдыс нюжӧдіс кисӧ да босьтіс черсӧ.

Арамейясӧс синтӧммӧдӧм

⁸ Арамейяслӧн ӧксы тышӧ петіс Израильлы паныд. Сійӧ сёрнитліс тышкайӧзӧн веськӧдлысьяскӧд, кытчӧ мунны да кӧні панны тышсӧ.

⁹ А Енлӧн морт Елисей тайӧ кадас ыстыліс юӧр израильса ӧксылы, мед сійӧ оз мун сэтчӧ, кытчӧ лӧсьӧдчӧны локны арамейяс.

¹⁰ Израильса ӧксы мӧдӧдліс ассьыс йӧзсӧ сійӧ местаас, мый йылысь висьтавліс Енлӧн морт. Татшӧм ногӧн Елисей унаысь ӧлӧдліс ӧксыӧс.

¹¹ Арамейяслысь ӧксысӧ тайӧ ёна скӧрмӧдіс. Сійӧ чукӧртіс тышкайӧзӧн веськӧдлысьяссӧ да шуис: «Висьталӧй, коді тіян пӧвстысь гусьӧн новлӧдлӧ юӧр израильса ӧксылы!»

¹² Веськӧдлысьяс пӧвстысь ӧти шуис: «Некод, ӧксыӧй-ыджыдӧй. Но Израильын эм Елисей нима пророк. Сійӧ висьтавлӧ израильса ӧксылы ставсӧ, весиг сійӧ, мый йылысь тэ, ӧксыӧй, сёрнитан аслад узьлан жырйын».

¹³ «Мунӧй да тӧдмалӧй, кӧні сійӧ, – тшӧктіс ӧксы. – Ме сэсся мӧдӧда ассьым йӧзӧс босьтны сійӧс». Ӧксылы юӧртісны, Елисей пӧ Дотанын.

¹⁴ Ӧксы мӧдӧдіс сэтчӧ вӧла-тарантаса ыджыд тышкакотыр. Войнас найӧ локтісны да кытшалісны карсӧ.

¹⁵ Водз асывнас Ен мортлӧн кесйӧгыс петіс ывлаӧ да аддзис, мый карсӧ кытшалӧмаӧсь тарантаса тышкайӧз. Кесйӧгыс повзьӧмпырысь юаліс пророклысь: «Ыджыдӧй, мый вӧчны?»

¹⁶ «Эн пов, – вочавидзис Елисей. – Налӧн дорысь миян дор сувтысьыс унджык».

¹⁷ Сэсся Елисей кевмысис: «Господьӧй, восьт менам кесйӧглысь синсӧ, мед сійӧ аддзас». Господь восьтіс кесйӧглысь синсӧ, и мӧдыс аддзис, мый Елисей гӧгӧр керӧс пасьтала сулалӧны биа вӧвъяс да тарантасъяс.

¹⁸ Кор арамейяс матыстчисны Елисей дінӧ, сійӧ шыасис Господь дінӧ: «Господьӧй, синтӧммӧд найӧс». Господь кыліс Елисейлысь корӧмсӧ – синтӧммӧдіс арамейясӧс.

¹⁹ Елисей шуис налы: «Тайӧ абу сійӧ туйыс и абу сійӧ карыс, кутшӧм тіянлы колӧ. Локтӧй ме бӧрся. Ме нуӧда тіянӧс сійӧ мортыс дінӧ, кодӧс ті корсянныд». Елисей вайӧдіс найӧс Самарияӧ.

²⁰ Сэні сійӧ бара шыасис Господь дінӧ: «Господьӧй, восьт тайӧ йӧзыслысь синсӧ, мед найӧ бӧр кутасны аддзыны». Господь восьтіс налысь синсӧ. Арамейяс чуймисны, мый найӧ Самария кар шӧрынӧсь.

²¹ Кор израильса ӧксы аддзис арамейясӧс, юаліс Елисейлысь: «Гашкӧ, меным вины найӧс, ыджыдӧй?»

²² «Эн ви, – вочавидзис Елисей. – Тэ ӧд эн аслад шыпуртӧн да ньӧввужйӧн босьт найӧс. Верд найӧс, мед сёясны-юасны, а сэсся бӧр мунасны асланыс ӧксы дінӧ».

²³ Арамейяслы дасьтісны ыджыд пызан. Вердӧм-юкталӧм бӧрын израильса ӧксы лэдзис найӧс асланыс ӧксы дінӧ. Та бӧрын арамейяс дугдісны усьласьны Израиль му вылӧ.

Самарияын ыджыд тшыгъялӧм

²⁴ Кутшӧмкӧ кад мысти арамейяслӧн Бен-Хадад ӧксы аслас став тышкайӧзкӧд уськӧдчис Самария кар вылӧ да кытшаліс сійӧс.

²⁵ Самарияын йӧзыс пондісны ёна тшыгъявны. Осёл юрысь найӧ мынтылісны кӧкъямысдас сикель эзысь, а китыр мында гулю сітысь – вит сикель эзысь.

²⁶ Ӧтчыд израильса ӧксы вӧлі мунӧ карса стен вывті. Сэки ӧти ань гораа шыасис сы дінӧ: «Отсав меным, ӧксыӧй-ыджыдӧй!»

²⁷ Ӧксы вочавидзис: «Господь кӧ оз отсав тэныд, мыйӧн нӧ ме отсала? Менам гумлаӧй и виноград пычкан гуӧй дзик куш».

²⁸ Ӧксы нӧшта юаліс: «А мый тэкӧд?» Мӧдыс висьталіс: «Этайӧ аньыс шуис меным, талун пӧ вай сёям тэнсьыд питӧ, а аски пӧ – менсьым.

²⁹ Ми пуим да сёйим менсьым пиӧс. Мӧд луннас ме шуи сылы, мый талун сэсся тэнсьыд питӧ сёям. Но сійӧ дзебис ассьыс писӧ».

³⁰ Аньлысь кывъяссӧ кылӧм бӧрын ӧксы косяліс ассьыс вылыс паськӧмсӧ. Ӧксы вӧлі сулалӧ карса стен вылын, и войтырыс аддзис, мый ӧксылӧн куш яй вылас вӧлі шогалан паськӧм.

³¹ Ӧксы шуис: «Талун кӧ оз ло керыштӧма Шафатлӧн Елисей пилысь юрсӧ, Енмыс мед чорыда мыждас менӧ».

³² Елисей пукаліс гортас карса юрнуӧдысьяскӧд, кор ӧксы мӧдӧдіс сы дінӧ ассьыс мортсӧ. Но сылӧн локтӧдз на, Елисей шуис юрнуӧдысьяслы: «Аддзанныд, морт виысьлӧн пиыс мӧдӧдіс ме дінӧ мортӧс, медым керыштны менсьым юрӧс. Кор мортыс локтас, пӧдлалӧй сы водзын ӧдзӧссӧ да ёна пыкӧй сійӧс. Со, сы бӧрся локтысь ыджыдыслӧн кок шыыс кылӧ!»

³³ Налӧн сёрнитігкості пырис на дінӧ ӧксылӧн мӧдӧдӧм мортыс да шуис, кыдзи ӧксы тшӧктіс: «Тайӧ ыджыд шогсӧ ыстіс миянлы Господь! Мый меным водзӧ виччысьны Сысянь?»