Ӧксыяслӧн 4 небӧг 5 - Коми Библия 2023

Нееманӧс проказаысь бурдӧдӧм

¹ Арамса ӧксылӧн вӧлі тышкайӧзӧн веськӧдлысь, кодлӧн нимыс вӧлі Нееман. Ӧксы сійӧс пыдди пуктіс, ӧд сы пыр Господь сетіс арамейяслы унаысь вермыны. Но тайӧ вына тышкасьысьыс висис проказаӧн.

² Ӧтчыд, кор арамейяс уськӧдчисны Израиль вылӧ, найӧ босьтісны пленӧ израильса нывкаӧс. Сійӧ лои Нееман гӧтырлы кесйӧгӧн.

³ Нывка шуис Нееманлӧн гӧтырлы: «Ветлас кӧ менам ыджыдӧй Самарияын олысь пророк дінӧ, пророк эськӧ бурдӧдас сійӧс проказасьыс».

⁴ Нееман муніс аслас ӧксы дінӧ да юӧртіс сылы, мый висьталіс израильса нывка.

⁵ Арамейяслӧн ӧксы шуис Нееманлы: «Ветлы. Ме ыста тэкӧд израильса ӧксылы гижӧд». Нееман муніс. Сійӧ босьтіс аскӧдыс дас талант эзысь, квайт сюрс сикель зарни да дас вӧччан паськӧм.

⁶ Нееман локтіс израильса ӧксы дінӧ да сетіс сылы гижӧдсӧ. Сэні вӧлі гижӧма: «Тайӧ гижӧдсӧ ваяс тэныд менам Нееман кесъялысьӧй. Ме мӧдӧді сійӧс тэ дінӧ, медым тэ бурдӧдін сійӧс проказаысь».

⁷ Гижӧдсӧ лыддьӧм бӧрын израильса ӧксы косяліс ассьыс паськӧмсӧ да шуис: «Ме ӧмӧй Ен? Мортыслӧн олӧмыс да кулӧмыс ӧмӧй менам киын? Мыйла арамейяслӧн ӧксы мӧдӧдӧма тайӧ мортсӧ ме дінӧ, медым ме бурдӧді сійӧс проказаысь? Аддзанныд, сійӧ корсьӧ помка зыксьыны мекӧд».

⁸ Кор Енлӧн морт Елисейлы кывсис, мый израильса ӧксы косялӧма ассьыс паськӧмсӧ, сійӧ мӧдӧдіс мортӧс да тшӧктіс висьтавны ӧксылы: «Мый вӧсна тэ паськӧмтӧ косялін? Сійӧ мортыс, код вӧсна тэ тадзи вӧчин, мед локтас ме дінӧ да тӧдмалас, мый Израильын эм пророк».

⁹ Аслас вӧвъясӧн да тарантасъясӧн Нееман локтіс Елисей керка дінӧ да сувтіс ӧдзӧс дорас.

¹⁰ Елисей мӧдӧдіс Нееман дінӧ юӧртысьӧс, тшӧктіс висьтавны сылы: «Мун Йӧрдан ю дорӧ да сизимысь мыссьы юас. Сэки тэнад кучикыд выльмас да лоас сӧстӧм».

¹¹ Нееман скӧрмис да муніс шуасьӧмӧн: «Ме чайті, пророк ачыс петас ме дінӧ, кевмысяс Господьлы, аслас Енлы, нюжӧдлас кисӧ висянін весьтӧ да бурдӧдас менӧ проказаысь.

¹² Дамаскса Авана да Фарфар юяс абу ӧмӧй бурджыкӧсь израильса юяс дорысь? Ме ӧмӧй ог вермы сэні мыссьыны да сӧстӧммыны?» Скӧралігтырйи Нееман муніс сэтысь.

¹³ Нееманлӧн кесйӧгъяс матыстчисны сы дінӧ да шуисны: «Ыджыдӧй, пророк кӧ тшӧктіс тэныд вӧчны мыйкӧ ыджыдджыктор, тэ ӧмӧй эн вӧч? А ӧні сійӧ тшӧктіс тэныд сӧмын мыссьыны, мед тэ сӧстӧммин».

¹⁴ Сэки Нееман муніс Йӧрдан ю дорӧ да Ен мортлӧн шуӧм серти сизимысь дзумгысьліс юас. Нееман лои сӧстӧм, сылӧн кучикыс лои кагалӧн кодь.

¹⁵ Нееман аслас йӧзкӧд бӧр локтіс Енлӧн морт дінӧ, сувтіс сы водзӧ да шуис: «Ӧні ме тӧда, мый му вылас эм сӧмын ӧти Ен – тайӧ Израильлӧн Ен. Босьт месянь, аслад кесйӧгсянь, тайӧ козинсӧ».

¹⁶ Но Елисей вочавидзис: «Ловъя Господь водзын, кодлы ме кесъяла, шуа: ог босьт». Нееман мырдӧн корис босьтны козинсӧ, но Елисей эз босьт.

¹⁷ «Тэ кӧ он кӧсйы нинӧм босьтны, – шуис Нееман, – сідзкӧ, лэдз меным, аслад кесйӧглы, нуны аскӧд Израильысь сы мында му, мыйта вермасны нуны кык мул. Водзӧвылӧ ме, тэнад кесйӧг, кута вайны сотан висьяс да мукӧд висьяс Господьлы, ог мукӧд енъяслы.

¹⁸ Но Господь мед прӧститас менӧ, тэнсьыд кесйӧгтӧ, мый ме копрася Риммон идоллы аслам ӧксыкӧд, кор сійӧ мунӧ юрбитанінӧ. Ӧд ӧксыӧс видзӧм могысь меным быть колӧ мунны сэтчӧ, и тшӧтш копрасьны сыкӧд. Мед Господь прӧститас менӧ таысь».

¹⁹ Елисей шуис Нееманлы: «Мун лӧнь сьӧлӧмӧн». Кор Нееман вӧлі ылынкодь нин,

²⁰ Енлӧн морт Елисейлӧн Гезий кесйӧгыс мӧвпыштіс: «Сыысь, мый арамей Нееман вайліс, менам ыджыдӧй нинӧм эз босьт. Ловъя Господь водзын шуа: котӧртла Нееман бӧрся. Гашкӧ, сійӧ мыйкӧ сетас меным».

²¹ Гезий котӧртіс суӧдны Нееманӧс. Нееман кор аддзис сылань котӧртысьӧс, чеччис тарантассьыс да воча петіс сылы. Нееман юаліс: «Мыйкӧ лоис?»

²² «Ставыс бур, – вочавидзис Гезий. – Ыджыдӧй ыстіс менӧ висьтавны, мый Ефрем керӧсвыв муысь локтісны сы дінӧ кык том пророк-велӧдчысь. Корӧ, мед тэ сетін налы ӧти талант эзысь да кык вӧччан паськӧм».

²³ «Дерт сета, – шуис Нееман. – Босьт кык талант». Нееман мырдӧн корис Гезийӧс босьтны кык талант эзысь да сӧвтіс эзысьсӧ кык мешӧкӧ. Нееман сетіс эзысьсӧ да кык вӧччан паськӧм аслас кык кесйӧглы, и ставсӧ тайӧс найӧ нуисны Гезий водзвылын.

²⁴ Кор найӧ воисны ыбвывса карӧ, Гезий босьтіс Нееманлӧн кесйӧгъяслысь козинсӧ да дзебис гортас. Сэсся тшӧктіс кесйӧгъяслы мунны.

²⁵ Кор Гезий локтіс Елисей ыджыдыс дінӧ, Елисей юаліс: «Кытчӧ тэ ветлін, Гезий?» Гезий вочавидзис: «Тэнад кесйӧгыд некытчӧ эз ветлы».

²⁶ Елисей шуис сылы: «Ме ӧд ловнам вӧлі тэкӧд, кор Нееман чеччис тарантассьыс да петіс тэныд воча. Ӧні абу сійӧ кадыс, мед босьтны эзысь, паськӧм, олив пуяс да виноград йӧръяс, ыж-мӧскӧс да кесйӧг пыдди йӧзӧс.

²⁷ Нееманлӧн проказаыс мед пыр кежлӧ вуджас тэ вылӧ да тэнад рӧд вылӧ». Гезий петіс Елисей ордысь. Сылӧн вир-яйыс вӧлі вевттьысьӧма лым кодь еджыд проказаӧн.