Ӧксыяслӧн 4 небӧг 3 - Коми Библия 2023

Моав войтыркӧд тыш

¹ Иудаса Иосафат ӧксылӧн дас кӧкъямысӧд веськӧдлан воӧ Израиль муын ӧксыӧ пуксис Ахавлӧн Иорам пиыс. Дас кык во чӧж сійӧ юраліс Самария карын.

² Иорам вӧчис Господь водзын шогмытӧмсӧ, но эз сы мында, мыйта вӧчисны бать-мамыс. Иорам жугліс-бырӧдіс Вааллы вӧчӧм юрбитан из, мый сувтӧдліс сылӧн батьыс.

³ Но Иорам эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.

⁴ Моавса Мешай нима ӧксылӧн вӧлі зэв уна ыж-меж. Сійӧ ыстыліс вот пыдди израильса ӧксылы сё сюрс баля да сё сюрс шыртӧм меж.

⁵ Но Ахавлӧн кулӧм бӧрын моавса ӧксы кыпӧдчис израильса Иорам ӧксылы паныд.

⁶ Сэки Иорам ӧксы петіс Самария карысь да чукӧртіс став израильса тышкайӧзсӧ.

⁷ Сійӧ мӧдӧдіс иудаса Иосафат ӧксы дінӧ ассьыс йӧзсӧ да тшӧктіс висьтавны сылы: «Моавса ӧксы кыпӧдчис меным паныд. Мунан-ӧ тэ мекӧд тышӧ Моавлы паныд?» «Муна, – вочавидзис Иосафат. – Ме муна тэ моз тышӧ. Менам тышкайӧзӧй мунасны тэнад тышкайӧзыд моз, менам вӧвъясӧй мунасны тэнад вӧвъясыд моз».

⁸ Иосафат юаліс: «Кысянь ми уськӧдчам?» Израильса ӧксы вочавидзис: «Эдом овтӧминсянь».

⁹ Израильса, иудаса да эдомса ӧксыяс петісны туйӧ. Кытшола туйӧд сизим лун мунӧм бӧрын налӧн помасис ваныс – тышкайӧзлы да накӧд мунысь пемӧсъяслы нинӧм вӧлі юнысӧ.

¹⁰ «Курыд шог миянлы! – горӧдіс израильса ӧксы. – Господь татчӧ вайӧдіс миянӧс, куим ӧксыӧс, мед сетны миянӧс моавсаяс киӧ».

¹¹ Иосафат юаліс: «Эм-ӧ миян пӧвстын Господьлӧн пророк, кодлысь эськӧ ми вермам юавны, мый Господь шуас миянлы?» Израильса ӧксылӧн кесйӧгъясысь ӧти шуис: «Тані эм Шафатлӧн Елисей пиыс, сійӧ коркӧ кесъявліс Илля пророклы».

¹² Иосафат шуис: «Сылӧн эм Господьсянь кыв». Иудаса Иосафат ӧксы, израильса ӧксы да эдомса ӧксы мунісны Елисей дінӧ.

¹³ Елисей шуис израильса ӧксылы: «Мыйла тэ локтін ме дінӧ? Мун аслад бать-мамыдлӧн пророкъяс дінӧ». «Ог мун, – вочавидзис израильса ӧксы. – Господь вайӧдіс миянӧс, куим ӧксыӧс, татчӧ, мед сетны миянӧс моавсаяс киӧ».

¹⁴ Елисей воча шуис: «Ловъя Господь Саваоф водзын, кодлы ме кесъяла, шуа: ме кӧ эг пыдди пукты Иосафатӧс, иудаса ӧксыӧс, ме эськӧ эг и видзӧдлы тэ вылӧ».

¹⁵ Сэсся Елисей тшӧктіс вайӧдны гуслиӧн ворсысьӧс. Сылӧн ворсігӧн Господьлӧн вына киыс инмӧдчис Елисей дінӧ.

¹⁶ Елисей шуис: «Господь тадзи висьталӧ: ”Кодйӧй гуранъяс тайӧ ковтыс пасьталаыс”.

¹⁷ Ӧд Господь тадзи висьталӧ: ”Тӧвзьысьӧм да зэрӧм ті онӧ аддзылӧй, но тайӧ ковтысыс тырас ваӧн. Сэтысь кутанныд юны асьныд, тшӧтш тіян пемӧсъясныд”.

¹⁸ Господьлы абу сьӧкыд вӧчны тайӧс. Нӧшта Сійӧ сетас тіян киӧ моавсаясӧс.

¹⁹ Ті босьтанныд налысь став изкарсӧ да ыджыд каръяссӧ, кераланныд налысь бур пуяссӧ, тырталанныд ва петанінъяссӧ да налӧн бур видз-муяс вылӧ шыблаланныд изъяс».

²⁰ Мӧд асывнас, нянь вись ваян кадӧ, Эдомсянь став ковтыс пасьтала пондіс визувтны ва.

²¹ Моавсаяс кор тӧдмалісны, мый ӧксыяс петісны налы паныд тышӧ, чукӧртісны став ассьыныс айуловсӧ – томӧс и пӧрысьӧс – да сувтӧдісны найӧс видзны ассьыныс мунысӧ.

²² Сійӧ асывнас моавсаяс чеччисны водз. Асъя шонді югӧрсьыс ковтысын ваыс тыдаліс налы чим гӧрдӧн, быттьӧ вир.

²³ «Тайӧ вир! – шуалісны моавсаяс. – Ӧксыяс, буракӧ, тышкасьӧмаӧсь ас костаныс да виалӧмаӧсь ӧта-мӧднысӧ. Моавсаяс, мунамӧй да босьтамӧй налысь эмбурсӧ!»

²⁴ Кор моавсаяс локтісны израильсаяслӧн сувтанінӧ, израильсаяс уськӧдчисны на вылӧ. Моавсаяс пондісны пышйыны, но израильсаяс вӧтчисны на бӧрся да виалісны найӧс.

²⁵ Израильсаяс кушӧдз бырӧдісны налысь каръяссӧ. Налӧн бур видз-муяс вылӧ быд израильса тышкаморт шыбитіс из, тадзи видз-муясыс тырисны изъясӧн. Ва петанінъяссӧ тырталісны, бур пуяссӧ кералісны. Пасьвартісны ставсӧ, сӧмын Кир-Харешет кар колис сулавны. Но и сійӧс кытшалісны да пасьвартісны изйӧн лыйсьысьяс.

²⁶ Моавса ӧксы кор аддзис, мый найӧс вермӧны, босьтіс аскӧдыс сизимсё шыпуртаӧс, мед уськӧдчыны эдомса ӧксы вылӧ да тадзикӧн петны кытшалӧм карсьыс. Но сылӧн тайӧ эз артмы.

²⁷ Сэки босьтіс ассьыс медыджыд писӧ, кодлы вуджӧ вӧлі ӧксыалӧмыс, да карса стен вылын сотіс сійӧс вись пыдди. Тайӧ лоӧмторйыс ёна скӧрмӧдіс израильсаясӧс. Найӧ эновтісны моавсаясӧс да бӧр локтісны асланыс муӧ.