Ӧксыяслӧн 4 небӧг 20 - Коми Библия 2023

Езекейлӧн бурдӧм

¹ Сійӧ кадас Езекей чорыда висьмис да вӧлі куланвыйын. Сы дінӧ локтіс Исай пророк, Амослӧн пиыс, да шуис: «Господь тадзи висьталӧ: ”Висьтав гортсаыдлы ассьыд бӧръя кӧсйӧмтӧ, ӧд тэ он бурд, но кулан”».

² Сэки Езекей бергӧдчис стенланьыс да кевмысис Господьлы:

³ «Господьӧй, казьтышт, мый ме олі Тэ водзын веськыда, став сьӧлӧмсянь кесъялі Тэныд да вӧчи Тэ водзын шогманасӧ». Сэсся Езекей ёна бӧрддзис.

⁴ Исай эз на удит петны ӧксы керка йӧрысь, сылы вӧлі Господьсянь кыв:

⁵ «Бӧр бергӧдчы да висьтав Езекейлы, Менам войтырлӧн юралысьлы, мый Господь, Давид пӧльыдлӧн Ен, тадзи висьталӧ: ”Ме кылі тэнсьыд кевмӧмтӧ да аддзи тэнсьыд синватӧ. Ме бурдӧда тэнӧ. Кык лун мысти тэ мунан Господьлӧн крамӧ.

⁶ Ме сета тэныд овны нӧшта дас вит во. Ме мезда тэнӧ да тайӧ карсӧ ассурса ӧксылӧн киысь. Ме видза тайӧ карсӧ Ас ради да Аслам Давид кесйӧгӧй ради”».

⁷ Исай тшӧктіс вайны косьтӧм инжир. Сійӧс вайисны да пуктісны Езекейлы орзьӧминас, и Езекей бурдіс.

⁸ Езекей юаліс Исайлысь: «Мый серти ме тӧдмала, мый Господь бурдӧдіс менӧ, и кык лун мысти ме верма мунны Господьлӧн крамӧ?»

⁹ Исай вочавидзис Езекейлы: «Господь сетас тэныд пас, мый Сійӧ вӧчас Аслас кӧсйысьӧм серти. Висьтав, мый тэ кӧсъян. Шонді вуджӧрыс мед усяс дас тшупӧдӧн водзлань али дас тшупӧдӧн бӧрлань?»

¹⁰ Езекей вочавидзис: «Вуджӧрлы кокньыд усьны дас тшупӧдӧн водзлань. Мед сійӧ бергӧдчас дас тшупӧдӧн бӧрлань».

¹¹ Сэки Исай пророк кевмысис Господьлы, и Господь бергӧдіс Ахазлӧн пос вылӧ шондісянь усьӧм вуджӧрсӧ дас тшупӧдӧн бӧрлань.

Езекей петкӧдлӧ ассьыс озырлунсӧ Вавилонысь локтысьяслы

¹² Сійӧ кадас вавилонса Меродах-Валадан ӧксы, Валаданлӧн пиыс, тӧдмаліс Езекейлӧн висьмылӧм йылысь. Та вӧсна сійӧ мӧдӧдіс Езекейлы гижӧд да козинъяс.

¹³ Локтысьясӧс кывзӧм бӧрын Езекей петкӧдліс налы ассьыс озырлун видзанінъяссӧ да ставсӧ, мый сэні вӧлі: эзысь-зарни, чӧскыд ӧвтанторъяс да дона мавтасъяс. Нӧшта петкӧдліс шыпурт видзанінсӧ. Ӧксы керкаысь да аслас муысь Езекей петкӧдліс налы став озырлунсӧ.

¹⁴ Исай пророк локтіс Езекей ӧксы дінӧ да юаліс: «Мый висьталісны тайӧ йӧзыс? Кытысь найӧ волісны тэ дінӧ?» Езекей вочавидзис: «Найӧ волісны ылі муысь, Вавилонысь».

¹⁵ «Мый найӧ аддзылісны тэнад керкаысь?» – юаліс Исай. Езекей вочавидзис: «Найӧ аддзылісны ставсӧ. Ме петкӧдлі налы озырлун видзанінъясысь ставсӧ».

¹⁶ Сэки Исай шуис Езекейлы: «Кывзы Господьлысь кывсӧ.

¹⁷ Воасны лунъяс, кор тэнад керкаысь ставсӧ нуасны Вавилонӧ. Нуасны тшӧтш сійӧ, мый тэнад батьясыд чукӧртісны тайӧ лунӧдзыс. Нинӧм оз коль, – висьталӧ Господь. –

¹⁸ Тэсянь чужысьясӧс нуӧдасны вавилонса ӧксы керкаӧ, и налы ковмас кесъявны сэні евнукъясӧн».

¹⁹ Езекей мӧвпыштіс: «Сідзкӧ, менам олан кадӧ тані лоӧ лӧньлун да бур олӧм». Та вӧсна сійӧ шуис Исайлы: «Господьлӧн кывйыс, мый ӧні висьталін меным – бур».

²⁰ Езекей ӧксыалӧм дырйи мукӧд лоӧмторъяс йылысь да сылӧн тӧдчана уджъясыс йылысь гижӧма иудаса ӧксыяслӧн каднебӧгӧ. Сэтчӧ нӧшта гижӧма, мый сійӧ кодйис вайӧртӧд да ва визувтанін, и карас нюжӧдіс ва.

²¹ Езекей куліс да вуджис батьясыс дінӧ. Сы бӧрти ӧксыӧ пуксис сылӧн Манассей пиыс.