Ӧксыяслӧн 4 небӧг 2 - Коми Библия 2023

Господь кыпӧдӧ Илляӧс енэжӧ

¹ Со кыдзи Господь тӧвнырӧн кыпӧдіс Илляӧс енэжӧ. Кор Илля Елисейкӧд вӧлі мунӧны Галгал карысь,

² Илля шуис Елисейлы: «Тэ кольччы татчӧ, а менӧ Господь тшӧктӧ мунны Вефильӧ». Но Елисей вочавидзис: «Ловъя Господь водзын да тэ водзын шуа: ме тэысь ог кольччы». И найӧ ӧтлаын мунісны Вефильӧ.

³ Вефильын Елисейлы воча петісны сэтчӧс пророк-велӧдчысьяс да шуисны: «Тӧдан-ӧ, мый талун Господь босьтас Ас дінас тэнсьыд ыджыдтӧ?» Елисей вочавидзис: «Тӧда. Но ті чӧв олӧй!»

⁴ Илля шуис Елисейлы: «Кольччы татчӧ, Елисей, а менӧ Господь тшӧктӧ мунны Ериконӧ». Но Елисей вочавидзис: «Ловъя Господь водзын да тэ водзын шуа: ме тэысь ог кольччы». И найӧ ӧтлаын мунісны Ериконӧ.

⁵ Ериконын Елисей дінӧ матыстчисны сэтчӧс пророк-велӧдчысьяс да юалісны сылысь: «Тӧдан-ӧ, мый талун Господь босьтас Ас дінас тэнсьыд ыджыдтӧ?» Елисей вочавидзис: «Тӧда. Но ті чӧв олӧй!»

⁶ Илля бара шуис Елисейлы: «Кольччы татчӧ, а менӧ Господь тшӧктӧ мунны Йӧрдан ю дорӧ». Но Елисей вочавидзис: «Ловъя Господь водзын да тэ водзын шуа: ме тэысь ог кольччы». И найӧ водзӧ мунісны.

⁷ Пророк-велӧдчысьяс пӧвстысь ветымынӧн мунісны на бӧрся. Кор Илля Елисейкӧд воисны Йӧрдан ю дорӧ, пророк-велӧдчысьяс сувтісны ылӧджык.

⁸ Илля пӧрччис ассьыс кышансӧ, гартыштіс сійӧс да кучкис сыӧн ваӧ. Ваыс шӧри потіс, и найӧ вуджисны юсӧ косінті.

⁹ Вуджӧм бӧраныс Илля юаліс Елисейлысь: «Тэ дінысь менӧ босьттӧдз мый тэ кӧсъян, мед ме вӧчи тэныд?» Елисей вочавидзис: «Тэын олысь лолыс мед лоас ме пытшкын кык пӧвстӧн унджык мукӧд велӧдчысьяс пытшкын дорысь».

¹⁰ Илля шуис: «Зэв сьӧкыдтор тэ коран. Аддзылан кӧ, кыдзи менӧ лоӧ босьтӧма тэ дінысь, сэки тэнад корӧмыд збыльмас. Он кӧ аддзыв – оз збыльмы».

¹¹ Мунігмозныс Илля да Елисей сёрнитісны ас костаныс. Виччысьтӧг тыдовтчисны биа тарантаса вӧвъяс да торйӧдісны найӧс. Тӧвныр кыпӧдіс Илляӧс енэжӧ.

¹² А Елисей видзӧдіс да горзіс: «Батьӧй, батьӧй! Тэ – Израильлӧн лачаыс, а абу верзьӧмаяс да тарантасъяс!» Кор Илля вошис Елисейлӧн син водзысь, Елисей косяліс паськӧмсӧ кык пельӧ.

¹³ Сійӧ лэптіс Иллялысь му вылӧ усьӧм кышансӧ да бӧр муніс Йӧрдан ю дорӧ.

¹⁴ Сэні Елисей кучкис Иллялӧн кышаннас ваӧ да шуис: «Кӧні ӧні Господь, Иллялӧн Енмыс?» Кор Елисей кучкис ваас, юыс шӧри потіс, и Елисей вуджис юсӧ.

¹⁵ Ериконысь локтӧм пророк-велӧдчысьяс аддзылісны, мый вӧчис Елисей, да шуисны, Иллялӧн лолыс пӧ Елисей вылын. Найӧ матыстчисны Елисей дінӧ да муӧдзыс копыртчӧмӧн

¹⁶ шуисны сылы: «Миян пӧвстын, тэнад кесйӧгъяс пӧвстын, эм ветымын ён морт. Найӧ мед ветласны да корсясны тэнсьыд ыджыдтӧ. Гашкӧ, Господьлӧн Лолыс нуис сійӧс кытчӧкӧ да шыбитіс кутшӧмкӧ керӧс йылӧ либӧ ковтысӧ». Елисей вочавидзис: «Оз ков мунны».

¹⁷ Но пророк-велӧдчысьяс мырдӧн корисны. Елисей дӧзмис да шуис: «Мӧдӧдӧй, колӧ кӧ». Сэки мӧдӧдісны ветымын мортӧс, и найӧ мунісны да куим лун чӧж корсисны Илляӧс, но эз аддзыны.

¹⁸ Кор найӧ локтісны Елисей дінӧ Ериконӧ, сійӧ шуис: «Ме ӧд шулі, мый оз ков тіянлы муннысӧ».

Елисей вӧчӧ шензьӧданаторъяс

¹⁹ Ериконын олысьяс шуисны Елисейлы: «Ыджыдӧй, тэ ачыд аддзан, мый миян карным сулалӧ бур местаын. Но тані ваыс шогмытӧм, муыс вынтӧм».

²⁰ Елисей шуис: «Пуктӧй выль дозйӧ сов да вайӧй меным». Тадзи и вӧчисны.

²¹ Елисей муніс ва петанін дорӧ, шыбитіс сэтчӧ совсӧ да шуис: «Господь тадзи висьталӧ: ”Ме бурдӧді-сӧстӧммӧді васӧ. Водзӧвылӧ сійӧ некодлы оз кут вайны кулӧм, и му вылас ставыс кутас быдмыны”».

²² Елисейлӧн шуӧм серти ваыс бурмис, сэні ӧнӧдз ваыс бур.

²³ Ериконсянь Елисей муніс Вефильӧ. Туй кузя мунігас карсьыс петісны зонпосни да пондісны серавны сы вылын: «Куш юра, мун татысь! Куш юра, мун татысь!»

²⁴ Елисей бергӧдчис налань, видзӧдліс на вылӧ да ёрис Господь нимӧн. Сэки кык ош петісны вӧрсьыс да косявлісны зонпосни пӧвстысь нелямын кык зонкаӧс.

²⁵ А Елисей муніс водзӧ да кайис Кармил керӧсӧ. Сэтысянь сійӧ бӧр локтіс Самария карӧ.