Ӧксыяслӧн 4 небӧг 16 - Коми Библия 2023

Иуда муын Ахазлӧн ӧксыалӧм

¹ Израильса Пеках ӧксылӧн, Ремаль пилӧн, дас сизимӧд веськӧдлан воӧ Иуда муын ӧксыӧ пуксис Иотамлӧн Ахаз пиыс.

² Ӧксыӧ пуксигас Ахазлы вӧлі кызь арӧс. Дас квайт во чӧж сійӧ юраліс Ерусалимын. Сійӧ эз вӧч аслас Господь Ен водзын шогманасӧ, эз ов Давид пӧльыс моз.

³ Сійӧ ветліс израильса ӧксыяслӧн туйӧд, весиг сотіс биын ассьыс писӧ, тадзи вӧчис пежсӧ войтыръяс моз, кодъясӧс Господь вӧтліс Израиль войтыр водзысь.

⁴ Ахаз вайліс висьяс, тшынӧдчис мылькъяс да керӧсъяс вылын и быд пашкыр пу улын.

⁵ Арамейяслӧн Рецин ӧксы да израильса Пеках ӧксы, Ремальлӧн пиыс, петісны тышӧ Ахазлы паныд. Найӧ кытшалісны Ерусалим, но эз вермыны босьтны сійӧс.

⁶ Сійӧ кадас арамейяслӧн Рецин ӧксы бӧр бергӧдіс Арамлы Элат кар да вӧтліс сэтысь Иуда войтырӧс. Сэтчӧ овмӧдчисны эдомсаяс, и найӧ ӧнӧдз сэні олӧны.

⁷ Ахаз мӧдӧдіс юӧртысьясӧс ассурса Тиглатпаласар ӧксы дінӧ да тшӧктіс шуны сылы: «Ме – тэнад кесйӧг, тэнад пи. Лок да мезды менӧ арамса да израильса ӧксыяслӧн киысь, ӧд найӧ тышӧ петісны меным паныд».

⁸ Ахаз босьтіс Господьлӧн крамысь да ӧксы керкаса озырлун видзанінъясысь став эзысь-зарнисӧ да ыстіс ассурса ӧксылы козин пыдди.

⁹ Ассурса ӧксы вӧчис Ахазлӧн корӧм серти. Сійӧ уськӧдчис Дамаск кар вылӧ да босьтіс сійӧс. Олысьяссӧ нуӧдіс Кирӧ, а Рецинӧс виис.

¹⁰ Ахаз ӧксы муніс Дамаскӧ, мед аддзысьлыны ассурса Тиглатпаласар ӧксыкӧд. Дамаскын сійӧ аддзис висьпуктанін да ыстіс Урий поплы висьпуктанінлысь серпассӧ да сійӧс вӧчанноглысь баласӧ.

¹¹ Ахаз ӧксылӧн бӧрсӧ локтӧдз Урий поп вӧчис висьпуктанінсӧ дзик сійӧ серпасыс да балаыс серти, мый Ахаз ӧксы ыстыліс сылы Дамаскысь.

¹² Дамаскысь локтӧм бӧрын ӧксы муніс видзӧдлыны висьпуктанінсӧ. Сійӧ матыстчис висьпуктанін дорӧ да вайис сы вылын висьяс.

¹³ Сотан висьсӧ да нянь висьсӧ сотӧм бӧрын ӧксы кисьтіс вина вись, сэсся аслас бурасян висьлӧн вирнас резіс висьпуктанінсӧ.

¹⁴ Сійӧ босьтіс Господь водзын сулалысь ыргӧн висьпуктанінсӧ крам водзладорысь – крам да выль висьпуктанін костысь – да вештіс сійӧс выль висьпуктанінсянь войвывладорӧ.

¹⁵ Ахаз ӧксы шуис Урий поплы: «Выль ыджыд висьпуктанін вылас сот асъя сотан вись да рытъя нянь вись, ӧксылысь сотан висьсӧ да нянь висьсӧ, войтырлысь сотан висьсӧ, нянь висьсӧ да вина висьяссӧ. Сотан вись пыдди да мукӧд вись пыдди вайӧм пемӧсъяслӧн вирнас рез висьпуктанінсӧ. А ыргӧн висьпуктаніныс мед сулалас, кытчӧдз ме ог тшӧкты, мый вӧчны».

¹⁶ Урий поп вӧчис ставсӧ сідзи, кыдзи тшӧктіс сылы Ахаз ӧксы.

¹⁷ Ахаз ӧксы тшӧктіс босьтны мыссян дозъяссӧ джекъяс вылысь да перйыны джекъяслысь дор пӧвъяссӧ. Ыджыд ыргӧн вайӧртӧдсӧ, коді сулаліс ыргӧн ӧшъяс вылын, лэдзис да пуктіс изйысь вӧчӧм подув вылӧ.

¹⁸ Ахаз вештіс лэбув, кӧні сійӧ пукавліс шойччан лунӧ. Сійӧ тупкис пыранін, кыті ӧксыяс пырлісны Господьлӧн крам йӧрӧ. Ставсӧ тайӧс вӧчис ассурса ӧксы вӧсна.

¹⁹ Ахаз ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.

²⁰ Ахаз куліс да вуджис батьясыс дінӧ. Сійӧс дзебисны Давид карӧ батьясыскӧд орччӧн. Ахаз бӧрти ӧксыӧ пуксис сылӧн Езекей пиыс.