Ӧксыяслӧн 4 небӧг 15 - Коми Библия 2023

Иуда муын Азарийлӧн ӧксыалӧм

¹ Израильса Еровам ӧксылӧн кызь сизимӧд веськӧдлан воӧ Иуда муын ӧксыӧ пуксис Амасейлӧн Азарий пиыс.

² Ӧксыӧ пуксигас Азарийлы вӧлі дас квайт арӧс. Ветымын кык во чӧж сійӧ юраліс Ерусалимын. Сылӧн мамыс вӧлі Ерусалимысь Еколия.

³ Амасей батьыс моз Азарий вӧчис Господь водзын шогманасӧ.

⁴ Но сійӧ эз бырӧд вись ваян мылькъяс, и войтырыс важ мозыс вайліс сэні висьяс да тшынӧдчис.

⁵ Та вӧсна Господь мыждіс ӧксыӧс. Аслас кулан лунӧдз сійӧ висис проказаӧн да оліс торъя керкаын. Ӧксы керкаӧн да Иуда войтырӧн веськӧдліс сылӧн Иотам пиыс.

⁶ Азарий ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.

⁷ Азарий куліс да вуджис батьясыс дінӧ. Сійӧс дзебисны Давид карӧ батьясыскӧд орччӧн. Азарий бӧрти ӧксыӧ пуксис сылӧн Иотам пиыс.

Израиль муын Закарлӧн ӧксыалӧм

⁸ Иудаса Азарий ӧксылӧн комын кӧкъямысӧд веськӧдлан воӧ Израиль муын ӧксыӧ пуксис Еровамлӧн Закар пиыс. Квайт тӧлысь чӧж сійӧ юраліс Самария карын.

⁹ Батьясыс моз Закар вӧчис Господь водзын шогмытӧмсӧ, эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.

¹⁰ Явислӧн Шаллум пиыс кыпӧдчис Закар ӧксылы паныд. Виис сійӧс став войтырыс водзын да пуксис сы пыдди ӧксыӧ.

¹¹ Закар ӧксыалӧм дырйи мукӧд лоӧмторъяс йылысь гижӧма израильса ӧксыяслӧн каднебӧгӧ.

¹² Тадзи иніс Господьлӧн шуӧмыс, мый Сійӧ висьталіс Ехулы: «Тэсянь чужысьяс нёльӧд чужанвужйӧдз пондасны пукавны Израильлӧн юралан пуклӧсын». Тадзи и лоис.

Израиль муын Шаллумлӧн ӧксыалӧм

¹³ Иудаса Озей ӧксылӧн комын ӧкмысӧд веськӧдлан воӧ Израиль муын ӧксыӧ пуксис Явислӧн Шаллум пиыс. Ӧти тӧлысь чӧж сійӧ юраліс Самария карын.

¹⁴ Гадилӧн Менаим пиыс локтіс Тирза карысь да уськӧдчис Самария кар вылӧ. Сэні сійӧ виис Явислысь Шаллум писӧ да пуксис сы пыдди ӧксыӧ.

¹⁵ Шаллум ӧксыалӧм дырйи мукӧд лоӧмторъяс йылысь да сылӧн паныд кыпӧдчӧм йылысь гижӧма израильса ӧксыяслӧн каднебӧгӧ.

¹⁶ Тирза карысь петӧм бӧрын Менаим пасьвартіс Типсах кар да матігӧгӧр став кар-сиктсӧ. Сылы эз восьтны карса дзиръясӧ, та вӧсна сійӧ виис сэтчӧс став олысьсӧ, а нӧбасьысь аньяслысь кынӧмсӧ вожӧдіс.

Израиль муын Менаимлӧн ӧксыалӧм

¹⁷ Иудаса Азарий ӧксылӧн комын ӧкмысӧд веськӧдлан воӧ Израиль муын ӧксыӧ пуксис Гадилӧн Менаим пиыс. Дас во чӧж сійӧ юраліс Самария карын.

¹⁸ Менаим вӧчис Господь водзын шогмытӧмсӧ. Став олан лунъяс чӧжыс Менаим эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.

¹⁹ Ассурса Пул ӧксы уськӧдчис Израиль му вылӧ. Менаим сетіс Пуллы сюрс талант эзысь, медым мӧдыс отсаліс сылы зумыдмӧдны юралӧмсӧ.

²⁰ Эзысьсӧ Менаим чукӧртіс израильса озыр йӧзлысь. Быдӧнлы колӧ вӧлі вайны ветымын сикель эзысь, мед сетны ассурса ӧксылы. Та бӧрын ассурса ӧксы эновтіс Израиль му да бӧр муніс аслас муӧ.

²¹ Менаим ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.

²² Менаим куліс да вуджис батьясыс дінӧ. Сы бӧрти ӧксыӧ пуксис сылӧн Пекахий пиыс.

Израиль муын Пекахийлӧн ӧксыалӧм

²³ Иудаса Азарий ӧксылӧн ветымынӧд веськӧдлан воӧ Израиль муын ӧксыӧ пуксис Менаимлӧн Пекахий пиыс. Кык во чӧж сійӧ юраліс Самария карын.

²⁴ Пекахий вӧчис Господь водзын шогмытӧмсӧ, эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.

²⁵ Ремальлӧн Пеках пиыс, ӧксылӧн отсасьысь, кыпӧдчис аслас ӧксылы паныд. Самарияын ӧксы керкаын пыді жыръяс сійӧ виис ӧксыӧс, нӧшта виис Арговӧс да Арийӧс. Пекахкӧд тшӧтш вӧліны Галаадысь ветымын морт. Пекахий ӧксыӧс виӧм бӧрын Пеках пуксис сы пыдди ӧксыӧ.

²⁶ Пекахий ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.

Израиль муын Пекахлӧн ӧксыалӧм

²⁷ Иудаса Азарий ӧксылӧн ветымын кыкӧд веськӧдлан воӧ Израиль муын ӧксыӧ пуксис Ремальлӧн Пеках пиыс. Кызь во чӧж сійӧ юраліс Самария карын.

²⁸ Пеках вӧчис Господь водзын шогмытӧмсӧ, эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.

²⁹ Пекахлӧн ӧксыалӧм дырйи Израиль вылӧ уськӧдчис ассурса Тиглатпаласар ӧксы. Сійӧ босьтіс Ийон, Авел-Бет-Маака, Янох, Кедеш да Хацор каръяс, Галаад, Галилея да Неффалим муяс. Сэтчӧс олысьяссӧ нуӧдіс Ассурӧ.

³⁰ Ремальлӧн Пеках пилы паныд кыпӧдчис Элайлӧн Осий пиыс да виис сійӧс. Ачыс сы пыдди пуксис ӧксыӧ. Тайӧ вӧлі иудаса Озей Иотам ӧксылӧн кызьӧд веськӧдлан воӧ.

³¹ Пеках ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.

Иуда муын Иотамлӧн ӧксыалӧм

³² Израильса Пеках ӧксылӧн, Ремаль пилӧн, мӧд веськӧдлан воӧ Иуда муын ӧксыӧ пуксис Озейлӧн Иотам пиыс.

³³ Ӧксыӧ пуксигас Иотамлы вӧлі кызь вит арӧс. Дас квайт во чӧж сійӧ юраліс Ерусалимын. Сылӧн мамыс вӧлі Еруша, Садоклӧн нылыс.

³⁴ Озей батьыс моз Иотам вӧчис Господь водзын шогманасӧ.

³⁵ Но сійӧ эз бырӧд вись ваян мылькъяс, и войтырыс важ мозыс вайліс сэні висьяс да тшынӧдчис. Господьлӧн крам йӧрын Иотам вӧчис Вылыс дзиръя.

³⁶ Иотам ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.

³⁷ Иотам ӧксылӧн веськӧдлан кадӧ Господь кутіс мӧдӧдны арамейяслысь Рецин ӧксысӧ да Ремальлысь Пеках писӧ, медым найӧ уськӧдчисны Иуда му вылӧ.

³⁸ Иотам куліс да вуджис батьясыс дінӧ. Сійӧс дзебисны Давид пӧльыслӧн карӧ батьясыскӧд орччӧн. Иотам бӧрти ӧксыӧ пуксис сылӧн Ахаз пиыс.