Ӧксыяслӧн 4 небӧг 12 - Коми Библия 2023

Иуда муын Йоаслӧн ӧксыалӧм

¹ Израильса Еху ӧксылӧн сизимӧд веськӧдлан воӧ Иуда муын ӧксыӧ пуксис Йоас. Нелямым во чӧж сійӧ юраліс Ерусалимын. Сылӧн мамыс вӧлі Бер-Шеваысь Цивия.

² Аслас олан лунъяс чӧж Йоас вӧчис Господь водзын шогманасӧ, кытчӧдз Иодай поп туйдӧдіс-велӧдіс сійӧс.

³ Но сійӧ эз бырӧд вись ваян мылькъяс, и войтырыс важ мозыс вайліс сэні висьяс да тшынӧдчис.

⁴ Йоас шуис попъяслы: «Господьлӧн крамӧ мед ваясны вежа сетанторъяс: ас пондаыс вештысян дон, Господьлы сиӧм мортысь вештысян дон да ас кӧсйӧм серти ваян сьӧм.

⁵ Босьтӧй аслыныд тайӧ сетанторъяссӧ крамӧ локтысьяслысь да дзоньталӧй крамсӧ».

⁶ Йоас ӧксы веськӧдліс кызь коймӧд во нин, но попъяс эз на дзоньтавны крамсӧ.

⁷ Та вӧсна Йоас ӧксы корис Иодайӧс, тшӧтш мукӧд попъясӧс да юаліс: «Мыйла ті онӧ дзоньталӧй крамсӧ? Ӧнісянь ті онӧ кутӧй босьтны аслыныд сьӧмсӧ крамӧ локтысьяслысь, но кутанныд сетны сійӧс крам дзоньталӧм вылӧ».

⁸ Попъяс кӧсйысисны, мый найӧ оз кутны босьтны войтырыслысь сьӧмсӧ, но и оз кывкутны крам дзоньталӧм вӧсна.

⁹ Иодай поп босьтіс куд, вӧчис вевт вылас розь да пуктіс кудсӧ Господьлӧн крам пыранінӧ, висьпуктанін веськыдладорӧ. Пыранін видзысь попъяс локтысьяслысь вайӧм сьӧмсӧ чӧвталісны кудйӧ.

¹⁰ Кор попъяс аддзылісны, мый кудъяс сьӧмыс уна нин, корлісны ӧксылысь гижалысьсӧ да аркирейӧс. Найӧ пуктывлісны сьӧмсӧ мешӧкъясӧ да веситлісны.

¹¹ Тайӧ сьӧмсӧ найӧ сетлісны Господьлысь крамсӧ дзоньталӧм вӧсна кывкутысьяслы, а кывкутысьяс мынтысьлісны пуысь вӧчасьысьяслы, керка лэптысьяслы,

¹² стен кыпӧдысьяслы да из кералысьяслы. Нӧшта тайӧ сьӧм вылас ньӧблісны кер, из да мукӧдторсӧ, мый колӧ вӧлі Господьлысь крамсӧ дзоньталӧм вылӧ.

¹³ Господьлӧн крамӧ вайӧм сьӧм вылӧ эз вӧчлыны крамын вӧдитчанторъяс: эзысь дозмукъяс, пуртъяс, вир резан тасьтіяс, трубаяс да мукӧдпӧлӧс эзысь-зарни дозъяс.

¹⁴ Став сьӧмыс муніс Господьлӧн крам дзоньталӧм вылӧ да сэні уджалысьяслы.

¹⁵ Крам дзоньталӧм вӧсна кывкутысьяс вӧчисны ассьыныс уджнысӧ пӧръясьтӧг, та вӧсна налысь эз корлыны сьӧм видзӧм йылысь пасйӧдъяс.

¹⁶ Мыж вештан висьысь да мыжысь вайӧм висьысь сьӧмсӧ сетлісны попъяслы. Господьлӧн крам дзоньталӧм вылӧ тайӧ сьӧмыс эз мунлы.

¹⁷ Сійӧ кадас арамейяслӧн Азаил ӧксы уськӧдчис Геф кар вылӧ да босьтіс сійӧс. Лӧсьӧдчис уськӧдчыны тшӧтш Ерусалим вылӧ.

¹⁸ Иудаса Йоас ӧксы чукӧртіс сыӧдз вӧвлӧм иудаса ӧксыяслысь – Иосафат, Иорам да Ахазий батьясыслысь – вежа вайӧмторъяссӧ, тшӧтш ассьыс вежа вайӧмторъяссӧ, нӧшта Господьлӧн крамса озырлун видзанінъясысь да ӧксы керкаса озырлун видзанінъясысь став зарнисӧ да мӧдӧдіс арамейяслӧн Азаил ӧксылы. Та бӧрын Азаил вешйис Ерусалим кар дорысь.

¹⁹ Йоас ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.

²⁰ Йоаслӧн кесйӧгъясыс кыпӧдчисны сылы паныд. Гусьӧн сёрнитчӧм бӧрын виисны сійӧс Бет-Миллоын, кысянь туйыс мунӧ Силлаӧ.

²¹ Виысьяснас вӧліны Шимеаталӧн Иозакар пиыс да Шомерлӧн Ехозавад пиыс. Йоасӧс дзебисны Давид карӧ батьясыскӧд орччӧн. Йоас бӧрти ӧксыӧ пуксис сылӧн Амасей пиыс.