Ӧксыяслӧн 3 небӧг 9 - Коми Библия 2023

Господь петкӧдчӧ Соломонлы

¹ Соломон помаліс вӧчны Господьлысь крамсӧ, ассьыс ӧксы керкасӧ да ставсӧ, мый кӧсйис вӧчны.

² Гаваонын моз Господь мӧдысь петкӧдчис Соломонлы.

³ Господь шуис сылы: «Ме кылі тэнсьыд кевмысьӧмтӧ да корӧмтӧ [и ставсӧ вӧчи тэнад кевмӧм-корӧм серти]. Тайӧ крамсӧ, мый тэ лэптін, Ме вежӧді, медым сэні пыр вӧлі Менам нимӧй. Менам синмӧй пыр кутас видзӧдны сы вылӧ, сійӧ пыр лоӧ Менам сьӧлӧмын.

⁴ Кутан кӧ тэ ветлыны Менам чужӧмбан водзын Давид батьыд моз сӧстӧм сьӧлӧмӧн да веськыда, кутан кӧ вӧчны ставсӧ, мый Ме тшӧкта тэныд, кутан кӧ овны Менам индӧд-тшӧктӧмъяс серти,

⁵ сэки Ме пыр кежлӧ зумыдмӧда тэнсьыд ӧксыалӧмтӧ Израильын, кыдзи ме кӧсйысьлі тэнад Давид батьлы. Ме шулі сылы, мый сылӧн рӧдысь петӧм морт кутас пыр пукавны Израильлӧн юралан пуклӧсын.

⁶ Но ті да тіянсянь чужысьяс кӧ кежанныд Меысь, онӧ кутӧй овны Менам индӧд-тшӧктӧмъяс серти, мый Ме сеті тіянлы, кутанныд кӧ кесъявны да юрбитны мукӧд енъяслы,

⁷ сэки Ме бырӧда Израиль войтырӧс сійӧ му вывсьыс, мый Ме сеті налы. А тайӧ крамсӧ, мый Ме вежӧді-торйӧді Аслым, Ме ӧтдорта Аслам чужӧмбан водзысь, и Израиль войтыр лоӧ серамтуйын войтыръяс пӧвстын.

⁸ Тайӧ ыджыд крам дінті мунысь весьӧпӧрӧмӧн да шутёвтӧмӧн юалас: ”Мый вӧсна нӧ Господь тадзи вӧчис тайӧ муыскӧд да тайӧ крамыскӧд?”

⁹ Сылы вочавидзасны: ”Израиль войтыр эновтіс Господьӧс, ассьыс Енсӧ, коді петкӧдіс налысь батьяссӧ Египет муысь. Найӧ сирасисны мукӧд енъяс дінӧ, юрбитісны-кесъялісны налы. Та вӧсна Господь ыстіс налы став тайӧ лёксӧ”».

Соломонлӧн уджъяс

¹⁰ Кызь во чӧжӧн Соломон лэптіс кык керка – Господьлы крам да аслыс ӧксы керка.

¹¹ Тирса Хирам ӧксы сетіс Соломонлы сус пуяс, кипарис пуяс да зарни сы мында, мыйта Соломон корис. Таысь Соломон ӧксы сетіс Хирамлы Галилея муысь кызь кар.

¹² Хирам локтіс Тирысь, медым видзӧдлыны Соломонӧн сетӧм каръяссӧ. Но каръясыс сылы эз кажитчыны.

¹³ Сійӧ шуис Соломонлы: «Мыйсяма каръяс тэ меным сетін, вокӧй?» Сійӧ нимтіс тайӧ каръяс гӧгӧр мусӧ Кавул муӧн. Тадзи ӧнӧдз шусьӧ.

¹⁴ Тайӧ каръяслӧн доныс, мый Хирам мынтіс Соломонлы, вӧлі сё кызь талант зарни.

¹⁵ Медым лэптыны Господьлы крам, аслыс ӧксы керка, Милло, Ерусалим стенъяс, Хацор, Мегиддо да Гезер каръяс, Соломон ӧксы уджӧдіс йӧзӧс, кодъяс уджалӧмнас мынтісны вот.

¹⁶ Фараон, египетса ӧксы, водзынджык уськӧдчыліс Гезер кар вылӧ да сотіс сійӧс. Сэтчӧс олысь ханаансаясӧс виаліс, а карсӧ сетіс козин пыдди аслас нывлы, Соломонлӧн гӧтырлы.

¹⁷ Соломон лэптіс Гезер кар да Улыс Бет-Хорон.

¹⁸ Овтӧминын сійӧ лэптіс Баалат да Тадмор каръяс.

¹⁹ Нянь да эмбур, тарантасъяс да вӧвъяс видзӧм могысь кыпӧдіс аслыс каръяс. Ерусалимын, Ливанын да аслас киподувса муын сійӧ лэптіс ставсӧ, мый кӧсйис.

^20-21 Аморейясысь, хеттейясысь, перезейясысь, [ханаансаясысь,] хивейясысь, евуссаясысь [да гергесейясысь] ловйӧн кольӧмаясӧс Соломон уджӧдіс. Тадзи найӧ талунӧдз мынтӧны сылы вот. Тайӧ йӧзыс эз вӧвны Израиль войтырысь, а чужисны Израиль муын мукӧд войтыръяссянь, кодъясӧс израильсаяс эз вермыны дзикӧдз бырӧдны.

²² Израильсаясӧс Соломон эз пуктыв кесйӧгъясӧн. Ӧксылы найӧ кесъялісны веськӧдлысьясӧн да тышкайӧзӧн, веськӧдлісны тарантаса тышкайӧзӧн да верзьӧмаясӧн.

²³ Соломонлӧн вӧлі витсё ветымын морт, кодъяс юралісны-веськӧдлісны сылӧн уджалысьясӧн.

²⁴ Фараонлӧн нылыс вуджис Давид карысь аслас керкаӧ. Тайӧ керкасӧ сылы вӧчис Соломон, сійӧ лэптіс тшӧтш Милло, Давид карлысь юкӧнсӧ.

²⁵ Куимысь вонас Соломон вайліс сотан да бурасян висьяс висьпуктанін вылын, мый сійӧ лэптіс Господьлы, и сэні Господь водзын тшынӧдчис. Крамыс сэки вӧлі дась нин.

²⁶ Соломон вӧчис корабльяс Эцион-Гевер карын. Карыс сулаліс Эдом муын Гӧрд саридз дорын, Элат карсянь матын.

²⁷ Хирам мӧдӧдіс корабльясӧн ассьыс йӧзсӧ, кодъяс бура кужисны кывтны саридз вывті. Соломонлӧн кесйӧгъяскӧд

²⁸ найӧ кывтісны Офирӧ да вайисны сэтысь Соломон ӧксылы нёльсё кызь талант зарни.