Ӧксыяслӧн 3 небӧг 6 - Коми Библия 2023

Соломон лэптӧ крам

¹ Соломон пондіс лэптыны Господьлы крам Израильын аслас нёльӧд ӧксыалан воӧ, зиф нима мӧд тӧлысьӧ. Тайӧ вӧлі Израиль войтырлӧн Египетысь петӧмсянь нёльсё кӧкъямысдасӧд воын.

² Крамыс, кодӧс Соломон ӧксы лэптіс Господьлы, вӧлі квайтымын гырддза кузьта, кызь гырддза пасьта да комын гырддза судта.

³ Крамлӧн посводзыс пасьтанас вӧлі ӧткодь крам пасьтаыскӧд – кызь гырддза. Посводзыс петыштіс крамсьыс дас гырддзаӧн водзӧджык.

⁴ Крамас Соломон вӧчис таса ӧшиньяс. Крам пытшкӧссяньыс найӧ вӧліны гырысьджыкӧсь ортсысянь дорысь.

⁵ Крам ортсыас, Вежаин да Вежасьыс-вежаин стенъяс бердӧ, сійӧ вӧчис жыръяс.

⁶ Жыръясыс вӧліны ӧта-мӧд вылас куим судтаӧн. Улыс судтаыс вӧлі вит гырддза пасьта, шӧр судтаыс – квайт гырддза пасьта, вылыс судтаыс – сизим гырддза пасьта. Крам ортсы стенъяссянь чурвидзисны тшупӧдъяс. На вылӧ мыджсисны жыръяссӧ кутысь брусъясыс. Тадзи брусъяссӧ эз ковмы йитны крам стенмас.

⁷ Крамсӧ вӧчисны водзвыв лӧсалӧм-шыльӧдӧм изъясысь. Крам лэптігӧн эз кыв кӧрт нӧш ни чер шы.

⁸ Жыръясӧ пыраніныс вӧлі крам лунвывладорсянь. Шӧр судтаас кайисны поскӧд, а сэсянь водзӧ кайисны вылыс судтаас.

⁹ Крамсӧ лэптӧм бӧрын Соломон эжис сійӧс сус пу пӧвъясӧн.

¹⁰ Крам гӧгӧрыс вӧчис вит гырддза судта жыръяс. Жыръясыс йитчисны крамыскӧд сус пу керъясӧн.

¹¹ Соломонлы вӧлі Господьсянь кыв:

¹² «Со, ӧні тэ лэптан крам. Тэ кӧ кутан овны Менам индӧд-тшӧктӧмъяс серти, Ме збыльмӧда кӧсйысьӧмӧс, мый тэ йылысь шулі Давид батьыдлы.

¹³ Ме ог эновт Ассьым Израиль войтырӧс, но пыр кута овны на пӧвстын».

¹⁴ Крамсӧ лэптӧм бӧрын Соломон

¹⁵ тшӧктіс эжны крампытшкӧсса стенъяссӧ джоджсяньыс йиркӧдзыс сус пу пӧвъясӧн, джоджсӧ тшӧктіс вевттьыны кипарис пӧвъясӧн.

¹⁶ Крам помас Соломон вӧчис вежӧс да торйӧдіс сійӧс сус пу пӧвъясысь вӧчӧм стенмӧн. Тайӧ пыді вежӧсыс вӧлі Вежасьыс-вежаин, сылӧн кузьтаыс вӧлі кызь гырддза.

¹⁷ Крамлӧн воддза вежӧсыс кузьтанас вӧлі нелямын гырддза.

¹⁸ Пытшкӧссяньыс крамсӧ ставнас вӧлі эжӧма сус пу пӧвъясӧн, весиг ӧти изтор эз тыдав. Сус пу пӧвъяс вылас вӧлі вундалӧмӧн серпасалӧма тыкваяс да дзоридзьяс.

¹⁹ Крам пытшкӧ вӧлі вӧчӧма Вежасьыс-вежаин, медым пуктыны сэтчӧ Господьлысь Йитӧд кудсӧ.

²⁰ Вежасьыс-вежаиныс вӧлі кызь гырддза пасьта, кызь гырддза кузьта да кызь гырддза судта. Стенъяссӧ Соломон эжис весалӧм зарниӧн, сус пуысь вӧчӧм висьпуктанінсӧ тшӧтш эжис зарниӧн.

²¹ Крам пытшкӧссӧ Соломон эжис весалӧм зарниӧн. Вежасьыс-вежаинлӧн пыранін водзӧ нюжӧдіс зарни чепъяс.

²² Крам пытшкӧссӧ дзоньнас эжис зарниӧн, Вежасьыс-вежаин водзвылын сулалысь висьпуктанінсӧ тшӧтш эжис зарниӧн.

²³ Соломон тшӧктіс олив пуысь вӧчны дас гырддза судта кык херувимӧс да пуктыны найӧс Вежасьыс-вежаинӧ.

²⁴ Херувимлӧн ӧти бордйыс вӧлі вит гырддза пасьта, и мӧд бордйыс вӧлі вит гырддза пасьта. Бордъяслӧн пасьтаыс ӧти помсянь мӧд помӧдзыс вӧлі дас гырддза.

²⁵ Мӧд херувимыс бордъяснас тшӧтш вӧлі дас гырддза пасьта. Кыкнан херувимыс вӧліны ӧткодьӧсь, судта-пасьтанас тшӧтш вӧліны ӧткодьӧсь.

²⁶ Быд херувимлӧн судтаыс вӧлі дас гырддза.

²⁷ Соломон сувтӧдіс херувимъясӧс Вежасьыс-вежаинӧ. Налӧн бордъясыс вӧлі шевкнитчӧмаӧсь: ӧтиыслӧн ӧти бордйыс инмис крамлӧн ӧтар стенмас, мӧдыслӧн – мӧдар стенмас, а мӧд борднас найӧ йитчисны ӧта-мӧдныскӧд.

²⁸ Херувимъяссӧ Соломон эжис зарниӧн.

²⁹ Крамлӧн став стен вылас пыді и воддза вежӧсас Соломон вундалӧмӧн серпасаліс херувимъясӧс, пальма пуяс да дзоридзьяс.

³⁰ Пыді вежӧслысь и воддза вежӧслысь джоджсӧ Соломон эжис зарниӧн.

³¹ Вежасьыс-вежаинлысь кык ӧдзӧссӧ вӧчис олив пуысь. Ӧдзӧсъяссӧ вӧчис вит пельӧса куричӧн.

³² Олив пуысь вӧчӧм кык ӧдзӧс вылас вундалӧмӧн серпасаліс херувимъясӧс, пальма пуяс да дзоридзьяс. Ставсӧ эжис зарниӧн.

³³ Крамӧ пыран ӧдзӧсъяслысь куричсӧ вӧчис олив пуысь нёль пельӧсаӧн,

³⁴ а кык ӧдзӧссӧ вӧчис кипарисысь. Быд ӧдзӧс вӧчис кык воссьысь юкӧнысь.

³⁵ На вылӧ тшӧтш вундалӧмӧн серпасаліс херувимъясӧс, пальма пуяс да дзоридзьяс, вылытіыс найӧс эжис зарниӧн.

³⁶ Пытшкӧс йӧрлысь стенсӧ Соломон вӧчис шыльӧдӧм изйысь да сус пуысь. Быд куим судта кералӧм из вылӧ пуктісны сус пу керъяс.

³⁷ Аслас юралігӧн нёльӧд вонас зиф тӧлысьӧ [мӧд тӧлысьӧ] Соломон пуктіс крамлы подувсӧ,

³⁸ а дас ӧтиӧд вонас бул нима кӧкъямысӧд тӧлысьӧ сійӧ помаліс крам лэптӧмсӧ. Крамсӧ да сэні кесъялӧм могысь став коланаторсӧ вӧлі вӧчӧма, кыдзи вӧлі водзвыв шуӧма вӧчны. Крамсӧ лэптісны сизим во чӧж.